tatumfwikishe icintu cimo, umucetekanya ukatwaafwa ukwiluko kuti tatufwile ukutamisha pa mbali ukutetekela kwesu mu fintu fyacindama fyonse ifyo twasambilila pali Lesa, Kristu, ne mifwaile ya bulesa.

20. Ni shani fintu umucetekanya wa ku mupashi wingapaka muli ifwe?

²⁰ Umucetekanya wa ku mupashi ukapaka muli ifwe nga lyonse tuleampanya amatontonkanyo yesu ne ncitilo ku Cebo ca kwa Lesa. (2 Abena Korinti 13:5) Ukulacite fyo mu nshila ya kukuulilila kukatwaafwa ukuicefya, ukukaanaba bamano kuikwatila no kulalengulula bambi. Umucetekanya ukatwaafwa ukumwenamo mu kulungikwa no kushininkishe fintu ifyacilapo kucindama. (Amapinda 3:7) Apo tufwaisha ukutemuna Yehova, kanshi, natufwaye ukwisulamo no kwishiba kwalungikwa ukwa Cebo cakwe. Ici cikatulenga ukucetekanya icalungama ukufuma ku calubana, ukupima icili mu cituntulu icacindama, na muli bucishinka ukulambatila ku kwampana kwesu ukwaumo mutengo na Yehova. Ici conse kuti cacitika fye nga twayalwila umutima wesu ku mucetekanya. Lelo, icintu na cimbi cilakabilwa. Tufwile ukuleka umucetekanya ukutucingilila.

Lekeni Umucetekanya Umucingilile

“Ubupanda bukakubaka, umucetekanya ukakulinda.”—AMAPINDA 2:11.

 1. Umucetekanya kuti watucingilila kuli cinshi?

YEHOVA afwaya ukuti mulebomfya umucetekanya. Mulandu nshi? Pantu alishibo kuti ukamucingilila ku masanso yalekanalekana. Amapinda 2:10-19 pa kwiswila yatila: “Pantu amano yakengila mu mutima obe, no kwishiba kukabe cisuma ku mweo obe, ubupanda bukakubaka, umucetekanya ukakulinda.” Ukamulinda kuli cinshi? Ukufuma ku fintu pamo nga “imibele ibi,” ukufuma ku baleke nshila shatambalala, no kufuma ku bantu bendo mwapondama.

 2. Umucetekanya cinshi, kabili musango nshi uwa mucetekanya maka maka untu Abena Kristu bafwaisha?

² Mu kupalishako muli no kwibukisho kuti umucetekanya yaba maka ya muntontonkanya ayalekanya icintu cimo ku cinankwe. Umuntu uwakwato mucetekanya aleluka ukupusana kwa mfundo nelyo ifintu kabili alikwata ubupingushi ubusuma. Apantu tuli Bena Kristu, tufwaya maka maka umucetekanya wa ku mupashi uwashimpwa pa kwishiba kwalungikwa ukwa Cebo ca kwa Lesa. Lintu twasambilila Amalembo, ciba kwati tulefolobola amatafwali ya kukuulilako umucetekanya wa ku mupashi. Fintu tusambilila kuti fyatwaafwa ukupingula mu nshila itemuna Yehova.

 3. Ni shani fintu twinganonka umucetekanya wa ku mupashi?

³ Lintu Lesa aipwishe ipaalo Imfumu Solomone iya Israele yalefwaya, uyu kateka wacaice atile: “Peni umubomfi wenu umutima wa kuumfwa ukuti apingule abantu benu, no kucetekanyo busuma no bubi.” Solomone alombele umucetekanya, kabili Yehova alimupeele uwingi na o. (1 Ishamfumu 3:9; 4:30) Pa kuti tunonke umucetekanya, tukabila ukupepa, kabili tulingile ukusambilila Icebo ca kwa Lesa mu kuba ne mpapulo shibuutusha ishipayanishiwa ukupitila mu “musha wa cishinka kabili uwashilimuka.” (Mateo 24:45-47) Ici cikatwaafwa ukulundulula umucetekanya wa ku mupashi ukufika ku cipimo ca kuti twaba ‘abakalamba mu mitima,’ aba maka ya “kupaatululo [nelyo, ukucetekanyo] busuma ukubulekanya no bubi.”—1 Abena Korinti 14:20; AbaHebere 5:14.

Ukukabila Umucetekanya Ukwaibela

 4. Ukukwata ilinso “ilituntulu” calola mwi, kabili ni shani fintu lingatunonsha?

⁴ Mu kuba no mucetekanya walinga, kuti twabomba mu kumfwana na mashiwi ya kwa Yesu Kristu aya kuti: “Lelo mubale mufwaye ubufumu bwa kwa Lesa no bulungami [bwa kwa Lesa], ne fi fyonse [ifintu fya ku mubili] fikalundwako kuli imwe.” (Mateo 6:33) Yesu na kabili atile: “Inyali ya mubili obe linso lyobe; ilinso lyobe nga lyabe lituntulu, ninshi no mubili obe onse waba no kubuuta.” (Luka 11:34) Ilinso ni nyali ya mampalanya. Ilinso “ilituntulu” lyalifumaluka, liya mu ntunga imo. Mu kuba ne linso lya musango yo, kuti twalangisha umucetekanya no kwenda ukwabula ukuipununa lwa ku mupashi.

 5. Ukukuma ku mibombele ya makwebo, cinshi tulingile ukulaibukisha pa caba imifwaile ya cilonganino ca Bwina Kristu?

⁵ Mu cifulo ca kusunga ilinso lyabo ilituntulu, bamo balipikanya ubumi bwabo no bwa bambi mu kuba ne mibombele ya fya makwebo iya kubeleleka. Lelo tulingile ukwibukisho kuti icilonganino ca Bwina Kristu caba “lupanda kabili ishintililo ifya Cine.” (1 Timote 3:15) Ukupala inceshi sha cikuulwa, icilonganino cisumbula icine ca kwa Lesa, te makwebo ya muntu uli onse. Ifilonganino fya Nte sha kwa Yehova tafyapangilwa nga apa kutwalila pa ntanshi ifya makwebo, ifipe, nelyo imilimo ya makwebo. Tufwile ukusengauka ukucitila ifya makwebo ya pa lwesu pa Ŋanda ya Bufumu. Umucetekanya ulatwaafwa ukumono kuti Amayanda ya Bufumu, Amasambililo ya Citabo pa Cilonganino, ukulongana kukalamba, na mabungano ya Nte sha kwa Yehova fyaba fifulo fya kubishanya kwa Bwina Kristu no kulanshanya kwa ku mupashi. Nga ca kuti twali no kubomfya ukwampana kwesu ukwa ku mupashi ku kutwala pa ntanshi ubukwebo ubuli bonse, bushe kwena tacingalangilila ukuti tatutesekesha ifyakatamikwa fya ku mupashi? Ukwishibana kwa ku cilonganino takulingile ukubomfiwa ku kunonkelamo ifya ndalama nangu panono.

 6. Mulandu nshi ifya kushitisha ne milimo ya makwebo fishilingile ukushitishiwilwa nelyo ukusombwelwa pa kulongana kwa cilonganino?

⁶ Bamo balibomfya ukubishanya kwa teokrasi ku kushitisha imiti nelyo amafuta ya kuyemfya, amavitamini, ifibombelo fya kumfwaninamo, ifya kukuulila, ukutantika ifya nyendo, amaprogramu ya kompyuta na makompyuta yene, na fimbipo. Nangu cibe fyo, ukulongana kwa cilonganino te cifulo ca kushitishishako nelyo ukusombwelako ifipe fya kushitisha nelyo imilimo mwaishiba. Kuti twacetekanya icishinte caba pano nga ca kuti twaibukisha ukuti Yesu “atamfishe shonse mwi tempele, ne mpaanga ne ŋombe: aitaile ne ndalama sha bakakabula, na matebulo yabo alipenwine; atile na ku balepoose nkunda, Sendeni utu, tufumyeni muno; mwicita ŋanda ya kwa Tata iŋanda ya makwebo.”—Yohane 2:15, 16.

Ni Shani pa lwa Kubika Indalama mu Bukwebo?

 7. Mulandu nshi umucetekanya no kucenjela fyabela ifyakabilwa ukukuma ku kubike ndalama mu bukwebo?

⁷ Umucetekanya no kucenjela filakabilwa lintu tulebika indalama mu fya makwebo. Tutile umo alefwaya ukukongola indalama no kulaya mu mashiwi nga ya: “Ndemwebe cishinka, ala mukapange ndalama.” “Tamwakaluse. Ici cili no kubomba nangu cibe shani.” Cenjeleni no uli onse uulaya muli yo nshila. Atemwa talelanda cishinka nelyo ninshi tali mufumacumi, pantu ukubika indalama mu bukwebo te lingi tushininkisha ukuti kuli no kubomba nangu cibe shani. Na kuba, abantu bamo abawaminisha pa kulanda, ababulwe fishinte balifinsha ababa mu cilonganino. Ici citucinkulako ulwa “bashipepa” abasokelele mu cilonganino ca mu mwanda wa myaka uwa kubalilapo ‘abasangwile ukusenamina kwa kwa Lesa bucilende.’ Bapalile amabwe ayatwa aya pe samba lya menshi ayengalepaula nelyo ukwipaya abaleowa. (Yuda 4, 12) Ca cine, inkuntu sha bakafinsha bafunuka shalipusanako, lelo na bo bene baliila ifilundwa fya cilonganino amasuku pa mutwe.

 8. Cinshi cacitika ku mibombele ya bukwebo imo iyamoneke fyo kuti yaletako icibwesha?

⁸ Nelyo fye ni bamunyina ba Bwina Kristu aba mapange yasuma balyebako bambi pa lwa fyalemoneka ukuba amakwebo ya ndalama, kabili bene, kumo na babomfwilile, balilufishapo indalama isho babikilemo. Ica kufumamo ca kuti, Abena Kristu abengi balilufishapo amashuko mu cilonganino. Lintu amakwebo ya kupanga indalama mu kwangufyanya casangwo kuti ya kufinsha, uufinsha fye e unonkelamo, uyo ilingi line uongoloka no kuluba aluba. Ni shani fintu umucetekanya wingaafwa umo ukusengauka imibele ya musango yo?

 9. Mulandu nshi umucetekanya wabela uwakabilwa pa kupimununa ifyo muletunga ifikafuma mu bukwebo ubulebikwamo indalama?

⁹ Ishiwi umucetekanya lipilibula ukuba na maka ya kumfwikisha icifiseme. Aya maka yalakabilwa pa kupimununa ifyo muletunga ifikafuma mu bukwebo ubulebikwamo indalama. Abena Kristu balicetekelana, kabili bamo kuti bapelululo kuti bamunyina ba ku mupashi ne nkashi te kuti baibimbe mu bukwebo ubwingabika ubukumu bwa basumina banabo mu busanso. Lelo umulandu fye wa kuti shimakwebo Mwina Kristu tacipilibula ukuti ninshi alishiba ifya makwebo nelyo ukuti ubukwebo bwakwe bukatunguluka nangu cibe shani.

10. Mulandu nshi Abena Kristu bamo bafwaila ukupoka loni ku basumina banabo, kabili cinshi cingacitika ku ndalama sha musango yo ishibikwa mu bukwebo?

¹⁰ Abena Kristu bamo bakongola indalama sha kutampila ubukwebo ku basumina banabo pantu utwampani twaishibikwa uto twashimisha indalama tulafilwa ukukongwesha indalama sha kucitila ubukwebo bwabo ubushacetekelwa. Bamo balilufiwa no kutontonkanya kwa kuti ukubikamo fye indalama shabo, kuti bapanga indalama ishingi mu kwangufyanya, mu kwanguka ukwabula ukubombesha nelyo ukwabula ukubomba ukuli konse. Bamo balacebushiwa ku kubikamo indalama mu bukwebo pa mulandu wa fintu bulemoneka ubwa kucebusha, lelo indalama isho banonka pa nshita ntali shilaya mu menshi shonse! Umwina Kristu umo abikile indalama ishingi mu bukwebo, ukwenekela ukukwatako amaperesenti 25 aya cibwesha mu milungu fye ibili. Alilufishe indalama shonse lintu akampani kabongolweke! Mu bukwebo na bumbi, uushitisha ifikuulwa ne mpanga alikongwele indalama ishingi kuli bambi mu cilonganino. Aenekele icibwesha icakulisha ukucila mu cipimo lelo alibongolweke no kulufya indalama shonse isho akongwele.

Lintu Amakwebo Yawa

11. Kufunda nshi Paulo apeele ukukuma ku bufunushi no kutemwe ndalama?

¹¹ Ukuwa kwa fya makwebo pa kati ka Bena Kristu kwalitungulula ku kulengwe nsoni nelyo fye ku kulufya kwa bumupashi kuli bamo abengila mu milimo iishashininkishiwa. Ukukalipwa ne cikonko e fyafuma mu kufilwa ukuleka umucetekanya ukubacingilila. Ubufunushi bwalibika abengi mu citeyo. ‘Lelo . . . [ubufunushi, NW], mwileka bulumbulwe muli imwe, ifyo kwayana ku bashila,’ e fyalembele Paulo. (Abena Efese 5:3) Kabili asokele ukuti: “Abafwayo kuba ne fyuma bawila mu kweshiwa kabili mu lukose, kabili mu lunkumbwa ulwingi ulwa kutumpa kabili ulwa kucena, ifyo fiibisha abantu mu kupomonwa kabili mu boni. Pantu ukutemwe ndalama e shinte lya bubi bonse; bamo pa kushitinamina balufiwa ukufuma ku citetekelo, no kuilasamo abene amalangulusha ayengi.”—1 Timote 6:9, 10.

12. Nga ca kuti Abena Kristu balebombela pa kati ka bene na bene, cinshi maka maka balingile ukwibukisha?

¹² Nga ca kuti Umwina Kristu alundulwile ukutemwe ndalama, kuti ayonaula nga nshi lwa ku mupashi. AbaFarise balitemenwe ndalama, kabili ici e cimo ica kwishibilako abantu muli shino “nshiku sha kulekelesha.” (Luka 16:14; 2 Timote 3:1, 2) Mu kupusanako, imibele ya bumi iya Mwina Kristu ilingile ukuba “iishatemwa ndalama.” (AbaHebere 13:5) Kwena, Abena Kristu kuti balecita amakwebo mu bene na bene nelyo ukutampa amakwebo capamo. Nangu cibe fyo, lintu balecite fyo, ukulanshanya no kupangana takulingile ukusakaanishiwa ne milandu ya cilonganino. Kabili ibukisheni: Nelyo fye ni pa kati ka bamunyina ba ku mupashi, lyonse lembeni ifipangano fya makwebo. Icingaafwa muli uyu mulandu cili cipande ca kuti “Filembeni!,” icafumine muli Awake! wa February 8, 1983, amabula 13 ukufika ku 15.

13. Kuti mwabomfya shani Amapinda 22:7 ku fya makwebo?

¹³ Amapinda 22:7 yatwebo kuti: “Uwashima musha ku muntu uumwashima.” Ilingi line tacawama ukuibika nelyo ukubika bamunyinefwe mu cifulo ca musango yo ica busha. Lintu uuli onse atulomba ukuti tumukongwesheko indalama sha kucitilo bukwebo, kuti cawama ukulanguluka nga ali na maka ya kubwesha isho ndalama. Bushe aishibwa ukuti alicetekelwa kabili uwashintililwapo? Kwena, tulingile ukwiluka ukuti ukumukongwesha muli yo nshila kuti kwapilibula ukulufya indalama pantu amakwebo ayengi yalawa. Ukukwata fye icipangano kweka kweka takupilibule fyo ninshi ubukwebo bukatunguluka. Kabili mu kushininkisha tacili kushilimuka ku uli onse ukubika indalama ishafulisha mu bukwebo ukucila pa shintu engapoosa.

14. Mulandu nshi tulekabila ukulangisha umucetekanya nga ca kuti twakongweseshe indalama Umwina Kristu munensu untu ubukwebo bwakwe bwawa?

¹⁴ Tulekabila ukulanga umucetekanya nga ca kuti twalikongwesha Umwina Kristu indalama sha kucitilo bukwebo e lyo indalama shaya mu menshi, nangu ca kuti takwali ukubulwa ubufumacumi kwabimbilwemo. Nga ca kuti ukuwa kwa bukwebo takwali mulandu wa wasumina munensu uwakongwele indalama, bushe kuti twatila nacite cilubo kuli ifwe? Iyo, pantu ni fwe bene twamukongweshe mu kuitemenwa, kabili napamo twalepokako na nsonsela, kabili tapali icintu cabulwa ubufumacumi icicitike. Apantu takwali icintu cabulwo bufumacumi, tatukwete ishinte lya kutwalilapo uwakongwele ku cilye. Busuma nshi bwingaba mu kutwala Umwina Kristu munensu umufumacumi ku cilye uyo uwaipwishe ukuti cipingulwe fyo nabongoloka pa mulandu wa kuti ubukwebo bwakwe ubwashimpwa pa mapange yasuma nabuwa?—1 Abena Korinti 6:1.

15. Finshi fimo filekabila ukulangulukwapo nga ca kuti ubukwebo bwabilishiwa ukuti nabubongoloka?

¹⁵ Abantu abo ubukwebo bwabo bulewa limo limo balafwaya ukwilulukwako ukupitila mu kwipusha ukuti cipingulwe fyo nababongoloka. Apantu Abena Kristu tabasuulako ku kulipile nkongole, nelyo fye ni lintu ukulingana ne funde balubulwako ku nkongole shimo, bamo pa mulandu wa kukonke mibele isuma balipingulapo ukwesha ukubwesha inkongole isho shafuutwa nga ca kuti abo bakongweleko bengasumina. Lelo ni shani nga ca kuti uwakongwele indalama sha kwa munyina alenga shaya mu menshi lelo wene aleikala ubumi bwa maliila? Nelyo ni shani nga ca kuti uwakongwele alisangile indalama shalinga isha kubwesha inkongole lelo asuulako fye ku cishingamo ca mibele isuma ica kulipila? Lyene imilingo yakwe iya kubomba mu cifulo cacetekelwa mu cilonganino kuti yatwishikwa.—1 Timote 3:3, 8; moneni Ulupungu lwa kwa Kalinda, September 15, 1994, amabula 30-1.

Ni Shani nga Kuliko Ukufinsha?

16. Finshi twingacitapo nga camoneko kuti nabatufinsha mu bukwebo?

¹⁶ Umucetekanya ulatwaafwa ukwiluka ukuti te konse ukubike ndalama mu bukwebo ukuletako icibwesha. Lelo, ni shani nga ca kuti ukufinsha nakubimbwamo? Ukufinsha kwaba “kufutika, ukucenjesha, nelyo ukupotamika icine ku mumbo pa kulenga umuntu ukukupeela icintu cakwe ica mutengo nelyo ukushitisha insambu sha mwi funde.” Yesu Kristu alondolwele ifyali no kucitwa lintu umuntu aletontonkanye fyo nabamufinsha kuli kapepa munankwe. Ukulingana na Mateo 18:15-17, Yesu atile: “Nga munonko abembukila iwe, kabiye, kamushinine pa kati ka iwe na wene mweka. Nga akuumfwa, ninshi wawikisha munonko. Lelo nga tomfwile, buula no muntu umo napamo babili baye pamo nobe, ukuti pa tunwa twa nte shibili nalimo shitatu icebo conse cishininkishiwe. Lelo nga akaana ukubomfwa, ebo lukuta; awe nga akaana ukuumfwa no lukuta, akabe kuli iwe kwati Mwina fyalo kabili umusangushi.” Icilangililo ico Yesu apeele mu kukonkapo cilangilile fyo cintu aletontonkanyapo cali ni membu pamo nga shilye shibimbamo ifya ndalama, ukusanshako no kufinsha.—Mateo 18:23-35.

17, 18. Nga ca kuti uuitunga ukuba Umwina Kristu atufinsha, ni shani fintu umucetekanya wingatucingilila?

¹⁷ Kwena, takwingaba icishinte ca mu Malembo ica kukonkela ifyalembwa pali Mateo 18:15-17 nga ca kuti takuli ubushininkisho nelyo fye icitontonshi ca kuti kwaliko ukufinsha. Lelo ni shani nga ca kuti uitunga ukuba Umwina Kristu mu cine cine alitufinshishe? Umucetekanya kuti watucingilila ukukanacita icintu ico cingonaula ishina lya cilonganino. Paulo aebele Abena Kristu banankwe ukuti baleleka babifiwa nelyo fye ukufinshiwa ukucila ukutwala munyina ku cilye.—1 Abena Korinti 6:7.

¹⁸ Bamunyinefwe ne nkashi aba cishinka ‘tabaisulamo ubucenjeshi no bupulumushi’ ukupala Bar-Yesu wa manga. (Imilimo 13:6-12) E co natulebomfya umucetekanya lintu indalama shabikilwe mu bukwebo na basumina banensu shaya mu menshi. Nga ca kuti tuletontonkanya pa lwa kubatwala ku cilye, tulingile ukulanguluka ifyo cingatwambukila pa lwesu, ifyo cingambukila uyo muntu umbi nelyo abantu bambi, ifyo cingambukila icilonganino, na ba ku nse. Ukwesha ukuti atufute kuti kwaonaule nshita yesu iikalamba, amaka, no bukumu bumbi. Kuti kwafumamo fye ukunonsha bakakalulula ba milandu na bambi abaishibisha ifya milandu. Ku ca bulanda, Abena Kristu bamo baliipusula fye na mashuko ya teokrasi pa mulandu wa kobelwa mu kucishamo ne fi fintu. Ukupumbulwa muli uyu musango kufwile kulalenga Satana ukusekelela, lelo ifwe tufwaya ukulenga umutima wa kwa Yehova ukusamwa. (Amapinda 27:11) Lubali lumbi, ukusumina fye ukuti natulufya nacipwa kuti kwatwaafwa ukusengauka ukukalipwa kwa mutima ukwingi no kupusushako inshita iyesu ne ya baeluda. Cikafwilisha ukubakilila umutende wa cilonganino kabili cikatusuminisha ukutwalilila ukufwayo Bufumu intanshi.

Umucetekanya no Kupingulapo

19. Cinshi cintu umucetekanya wa ku mupashi ne pepo fingatucitila lintu tulepingula pa milandu ileto kufunshika?

¹⁹ Ukupingulapo mu milandu ya fya ndalama nelyo iya fya makwebo kuti kwaleto kufunshika nga nshi. Lelo umucetekanya wa ku mupashi kuti watwaafwa ukupimununa ifyabamo e lyo no kupingulapo bwino. Ukulundapo, ukucetekela Yehova mu kubamo ipepo kuti kwatuletela “umutende wa kwa Lesa.” (Abena Filipi 4:6, 7) Caba mutalalila ne cibote ifiisako pa mulandu wa kukwata ukwampana kwa pa lwesu na Yehova. Mu cine cine, umutende wa musango yo kuti watwaafwa ukusungilila ukushikatala kwesu lintu twalolenkana no kupingulapo kwakosa.

20. Cinshi cintu tulingile ukupampaminapo ukukuma ku milandu ya fya makwebo e lyo ne cilonganino?

²⁰ Natupampamine pa kukanaleka ukukanaumfwana mu fya makwebo kupumfyanye umutende wesu nelyo uwa cilonganino. Tulekabila ukwibukisha ukuti umulimo wa cilonganino ca Bwina Kristu wa kutwaafwa lwa ku mupashi, te kubomba nge cifulo ca fya makwebo. Lyonse fye, imilandu ya makwebo ilingile ukupaatukako ku mibombele ya cilonganino. Tulekabila ukubomfya umucetekanya no kucenjela lintu tuletendeka amakwebo. Kabili shi lekeni lyonse tulesungilila imimwene yashikatala iya fya makwebo, ukulafwaya Ubufumu intanshi. Nga ca kuti ifya makwebo ifilesanshamo bamunyinefwe nelyo inkashi fyawa, shi natuletukuta ukufwaya ciwamine bonse ababimbilwemo.

21. Ni shani fintu twingabomfya umucetekanya no kubomba mu kumfwana na Abena Filipi 1:9-11?

²¹ Mu cifulo ca kucishamo ukwangwa ku milandu ya fya ndalama ne fintu fimbi ifishacindamisha, shi natuloshe imitima yesu ku mucetekanya, ukupepela ubutungulushi bwa kwa Lesa, no kubika amabuseko ya Bufumu intanshi. Mu kumfwana ne pepo lya kwa Paulo, shi ‘ukutemwa kwesu kupakemo ukwishiba kwalungikwa [no mucetekanya, NW] pa kuti tusuminishe ifyacilamo no kukaanapunwisha bambi’ nelyo ukuipunwisha. Nomba apo Imfumu Kristu ali pa cipuna cakwe ica Bufumu mu muulu, lekeni tulebomfya umucetekanya wa ku mupashi mu mbali shonse isha bumi. Kabili shi ‘natwisulemo ifisabo fya bulungami ifiishila muli Yesu Kristu, ku kuleta ubukata no kutasha kuli Lesa wesu,’ Shikulu Mulopwe Yehova.—Abena Filipi 1:9-11.

Kuti Mwayasuka Shani?

Umucetekanya cinshi?

Mulandu nshi kubelele ukukabila kwaibela ukwa kulango mucetekanya mu fya makwebo pa kati ka Bena Kristu?

Ni shani fintu umucetekanya wingatwaafwa nga ca kuti twayumfwe fyo uwasumina munensu atufinsha?

Cinshi ico umucetekanya ulingile ukubomba mu kupingula pa milandu?

[Icikope pe bula 18]

Umucetekanya ukatwaafwa ukubomfya ukufunda kwa kwa Yesu ukwa kufwaye ntanshi Ubufumu

[Ifikope pe bula 20]

Lyonse fye lembeni ifipangano fya bukwebo