Ifyo Yesu Acingililwe

INSHITA shimo Yehova acita ifintu mu nshila ya kupapusha pa kucingilila abaice na bashingaicingilila. Nga ca kuti waya uleendauka mu mpanga, kuti wamona inshila imo Yehova acitilamo ici. Lelo pa kubala te kuti wishibe ifilecitika.

Kuti wamona akoni kaikala pa nshi mupepi na po uli. Kamoneka kwati nakacenwa. Kakululula ipindo lya kako no kusela lintu waesha ukupalama. Ilyo ulekonka kalya koni, katwalilila ukulakutaluka. Apo pene, akoni kapupuka. Ipindo lya kako talyacicenwa no kucenwa! Bushe nawishiba ifyo kalya koni kacilacita?—

Mupepi na pantu akoni kacikala, utwana twa kako twaciba natufiswa mu fyani. Nyina wa tuuni acilatiina ukuti napamo kuti wasanga utwana no kutucita icabipa. E co acibepekesha kwati nacenwa no kukutwala ukutali no twana. Bushe walishiba uwingatucingilila nga filya nyina wa tuuni acingilila utwana twakwe?— Mu Baibolo, Yehova bamulinganya ku cuni icitwa ati kapumpe, icafwa utwana twa ciko.—Amalango 32:11, 12.

Umwana watemwikwa sana uwa kwa Yehova ni Yesu. Ilyo Yesu ali ku muulu, ali muntu wa ku mupashi uwa maka nga Wishi. Aleisakamana. Lelo lintu Yesu afyelwe pe sonde, takwete maka ya kuicingilila. Alekabila aba kumucingilila.

Pa kuti acite ifyo Lesa alefwaya acite pe sonde, Yesu ali no kukula no kuba umuntu umukalamba uwapwililika. Lelo, Satana aeseshe ukwipaya Yesu ilyo ici cishilacitika. Ilyashi lya kwesha ukwipaya Yesu lintu ali umwaice ne fyo Yehova amucingilile lyaba lyashi lisuma. Bushe kuti watemwa ukulyumfwa?—

Ninshi tapalapita ne nshita ikalamba ukutula apo Yesu afyalilwe, Satana alenga icilemoneka kwati lutanda ukubalika mu muulu ku Kabanga. Abantu abetwa ati bakapendula wa ntanda, abasambilila intanda, bakonka ulu lutanda pa ntamfu iitali ukuya ku Yerusalemu. Ilyo bafika kulya baipusha ukuli no kufyalilwa uuli no kuba imfumu ya baYuda. Lintu baipusha abantu baishiba ifyo Baibolo yalanda pali ci, bayasuka ati: “Mu Betlehemu.”—Mateo 2:1-6.

Ilyo Herode, imfumu yabipa iya ku Yerusalemu, yaumfwa pa lwa iyi mfumu yafyelwe nomba line mu musumba wa mupepi uwa Betlehemu, yaeba bakapendula wa ntanda ati: “Kafwaisheni bwino bwino ulwa kana; kabili ilyo mulekasanga, mwise munjebe.” Bushe nawishiba umulandu Herode alefwaila ukwishiba ukwa kusanga Yesu?— Ni pa mulandu wa kuti Herode ali na kalumwa kabili alefwaya ukumwipaya!

Bushe Lesa acingilila shani Umwana wakwe?— Lintu bakapendula wa ntanda basanga Yesu, bamupeela ifya bupe. Pa numa Lesa asoka aba bakapendula wa ntanda mu ciloto ukuti bebwelela kuli Herode. E co bapita inshila imbi pa kubwelela ku mwabo ukwabula ukuya ku Yerusalemu. Ilyo Herode aishiba ukuti balya bakapendula wa ntanda baliya, akalipa sana. Mu kwesha ukwipaya Yesu, Herode atila abana bonse abaume mu Betlehemu abashilakumanya imyaka ibili bafwile ukwipaiwa! Lelo pali iyo nshita, ninshi Yesu alifumamo kale.

Bushe nawishiba ifyo Yesu afyuka?— Lintu balya bakapendula wa ntanda babwelela ku mwabo, Yehova asoka Yosefe, umulume wa kwa Maria, ukwima no kubutukila ku Egupti ukutali. Kulya Yesu ali uwacingililwa ukufuma kuli Herode umubifi. Ilyo papite myaka, lintu Maria na Yosefe babwela ukufuma ku Egupti na Yesu, Lesa asoka Yosefe na kabili. Amweba mu ciloto ukukuukila ku Nasarete, uko Yesu akaba uwacingililwa.—Mateo 2:7-23.

Bushe wamona ifyo Yehova acingilile Umwana wakwe?— Bushe kuti watila uwaba ngo tuuni utunono utufishilwe kuli nyina mu fyani nelyo nga Yesu ilyo ali umwana umunono nani? Bushe tawaba nga bene?— Na iwe kwaliba abafwaya ukukucita ifyabipa. Bushe walibeshiba?—

Baibolo itila Satana aba nge nkalamo iilelila iilefwaya ukulya ifwe. Kabili nga filya fine ilingi inkalamo shifwaya sana ukusansa utunama tunono, Satana ne fibanda fyakwe na bo ilingi bafwaya ukusansa abaice. (1 Petro 5:8) Lelo Yehova alikwata amaka ukucila Satana. Yehova kuti acingilila abana bakwe nelyo ukufumyapo ifyabipa ifyo Satana engabacita.

Bushe uleibukisha mu Cipandwa 10 ica cino citabo ifyo Kaseebanya ne fibanda fyakwe bafwaya ifwe ukucita?— Ee, besha ukulenga ifwe ukulaala na bantu tushaupa nelyo abo tushaupwako, ifintu ifyo Lesa atila fyalilubana. Lelo ni bani fye abafwile ukulaala pamo?— Ca cine, bantu babili abakalamba abaupana.

Lelo, ca bulanda ukuti abakalamba bamo balitemwa ukulaala na baice. Lintu bacite fyo, abalumendo na bakashana kuti batendeka ukucita ifintu fyabipa ifyo basambilila kuli aba bakalamba. Na bo batendeka ukubomfya bubi bubi ubwaume bwabo nelyo ubwanakashi. Ici e cacitike kale sana mu musumba wa Sodomu. Baibolo itila abantu kulya, “abanono na bakalamba,” balefwaya ukulaala na baume abaishile mu kutandalila Lote.—Ukutendeka 19:4, 5.

E co filya fine Yesu alekabila ubucingo, na iwe ulakabila ukukucingilila ku bakalamba—na baice bambi—abengafwaya ukulaala na iwe. Ilingi, aba bantu babepekesha kwati banobe. Kuti batila balakupeela ifisuma nga walaya ukuti tawaebeko abali bonse pa lwa fyo balefwaya ukucita na iwe. Lelo aba bantu baitemwa, baba nga Satana ne fibanda fyakwe, kabili bafwaya fye ukuti baleisekesha beka. Kabili bafwaya ukuipakisha pa kulaala na baice. Ici calibipa sana!

Bushe walishiba ifyo bengacita pa kufwaya kulya kuipakisha?— Kuti baesha ukulakwikata ku bwaume nelyo ku bwanakashi. Nelyo kuti balenga ubwaume bwabo nelyo ubwanakashi bwabo bwalakumya ku bobe. Lelo taufwile ukuleka uuli onse ukukwangasha ku bwaume nelyo ku bwanakashi. Nangu fye mukalamba obe nelyo umwaice obe umwaume atemwa umwanakashi, nelyo banoko nangu bawiso. Takuli umuntu uufwile ukukwangasha kuli ifi filundwa.

Kuti waicingilila shani ku bantu abacita ifyabipa nge fi?— Ica kubalilapo, wilaleka uuli onse alekwangasha ku bwaume nelyo ku bwanakashi. Nga ca kuti umuntu aesha ukucite ci, bilikisha mu kushipa ati: “Lekeni fyo! Nalamusosela!” Kabili nga ca kuti ulya muntu atila ifyacitika ni we walenga, wisumina. Bufi. Kamusosele fye te mulandu ni nani! Ufwile ukucite co nangu alanda ati ifyo mulecita babili ni nkaama yenu mwe bene. Nangu ca kuti uyo muntu akulaya ukukupeela ifintu ifisuma nelyo akutiinya, ufwile ukufumako no kuyamusoselela.

Taufwile ukutiina, ufwile ukucenjela. Ilyo abafyashi bobe bakusoka pa lwa bantu nelyo incende uko wingasanswa, ufwile ukubomfwila. Nga wacite co, kuti waipususha ku wingakucita icabipa.