“Pali ino Nshita Nshatekwa Ubusha ku Bunkalwe”

Nafyalilwe mu musumba wa Calgary uwaba mu Alberta, ku Canada. Ilyo nali umwaice sana, abafyashi bandi balilekene, kabili ine na bamayo twatendeke ukwikala mu ng’anda ya bamama na bashikulu. Bamama na bashikulu balitemenwe sana bamayo na ine, kabili nali ne nsansa. Ncili ndebukisha ifyo naleba ne nsansa ilyo nali umwaice.

Ilyo nali ne myaka 7, ifintu fyalitendeke ukubipa ilyo bamayo babweshenye na batata. Twakuukile ku St. Louis, mu Missouri, ku America. Tapakokwele, nalishileishiba ukuti batata bali abankalwe. Ku ca kumwenako, pa bushiku bwa kubalilapo ilyo nabwelele kwi sukulu ilipya ilyo natendeke ukusambililapo, batata balishibe ukuti abana besukulu banandi balincushishe, lelo nshalwile nabo. Balifulilwe kabili balingumine ukucila ne fyo abana besukulu banandi bangumine! Ici calengele ntendeke ukulalwa ulubuli. Nalwile ulubuli lwa kubalilapo ninshi ndi fye ne myaka 7.

Batata balefulwa bwangu kabili balesaalula bamayo. Ici calelenga bamayo ukukalipa kabili ilingi line balepaata nga baleumana na batata. Ilyo nali ne myaka 11 nalitendeke ukubomfya imiti babinda no kunwa sana ubwalwa. Nalebelako fye umunkalwe kabili ilingi line nalelwa na bantu mu misebo. Ilyo nalepwisha isukulu lya ku sekondari, ninshi naliba umunkalwe sana.

Ilyo nali ne myaka 18, nalilembeshe mwi bumba lya bashilika ilya mu America ilyo beta ukuti U.S. Marine Corps. Ilyo naingile muli ili ibumba, balinsambilishe ifya kwipaya umuntu. Ilyo papitile imyaka 5, nalilekele ubushilika no kuya mukusambilila ifyo abantu batontonkanya ne mibele yabo (psychology) pantu nalefwaya ukutendeka ukubomba mu kabungwe kafwailisha imilandu aka mu America ako beta ukuti Federal Bureau of Investigation. Nalitendeke amasambililo ya pa universiti ku America kabili nalilekonkanyapo ukusambilila ilyo nabwelelemo ku Canada.

Ilyo nali pa universiti, nalisuulile sana ifyo abantu bacita. Nalimwene ukuti abantu abengi ni bakaitemwe, kabili nalemona ukuti fyonse ifyaba mu calo te kuti fingafwe, no kuti tapali icingapwisha amafya yonse ayo abantunse bakwata. Nalilekele ukusubila ukuti abantunse kuti balenga ifintu mu calo ukuwama.

Nshaishibe ico nabela pano calo. Ici calengele ndenwa sana ubwalwa, ndebomfya sana imiti babinda, ndefwaisha sana indalama no kulacita sana ubulalelale. Naletontonkanya fye pa kufwaya ukwishiba ukuli amaparte ayo nalayako, no kufwaya ukwishiba umwanakashi nalaya mu kucita nankwe ubulalelale. Filya nasambilile ubushilika nafyo fyalengele nilatiina ukulwa ulubuli, kanshi nalelwa sana. Nalemona kwati nalikwete insambu shakubika icifwile ukuba icalungama ne calubana, kabili nalekalipila uuli onse uo naletontonkanya ukuti alefyenga abantu bambi. Kanshi kuti natila ubunkalwe e bwatendeke ukulantungulula.

Bushiku bumo ilyo twali no munandi mu muputule wa pa nshi ya ng’anda yandi ninshi natukolwa imiti babinda, kabili ninshi tulepekanya ukuya mu kushitisha ibange ku cifulo cimbi, umunandi anjipwishe nga nalisumina muli Lesa. Namwaswike nati, “Nga ca kuti Lesa e walenga abantu balecula mwi sonde, teti mfwaye no kumwishiba!” Ubushiku bwakonkelepo, e bwali ubushiku bwa kubalilapo ukuya ku ncito iyo nasangile, kabili uo twalebomba nankwe uwali Inte ya kwa Yehova anjipwishe ukuti, “Bushe uletontonkanya ukuti Lesa e walenga ukucula konse ukwaba pano isonde?” Nalipapile sana pantu anjipwishe pa fyo nalelandapo ubushiku bwafumineko, kabili ici calengele mfwaye ukwishibilapo na fimbi. Pa myeshi 6 iyakonkelepo twalilanshenye ifingi nga nshi, kabili alinangile amasuko ya mu Baibolo ku mepusho aya-afya sana ayo nakwete pa bumi.

Umukashana naleikala nankwe uo nalefwaya ukuupa talefwaya ndemwebako ifyo nalesambilila pali Lesa. Bushiku bumo pa Mulungu namwebele ukuti nalieba ba Nte ukwisa mu kutusambilisha Baibolo. Ubushiku bwakonkelepo ilyo nabwelele ukufuma ku ncito nasangile nafyuka, kabili alisendele ifipe fyonse ifyali mu ng’anda. Nafumiine pa nse no kutendeka ukulila. Lyena nalipepele kuli Lesa ukumulomba ukuti angafwe. Uyu e wali umuku wa kubalilapo nabomfeshe ishina lya kwa Lesa ilya kuti Yehova pa kupepa.—Amalumbo 83:18.

Ilyo papitile inshiku shibili, nalitendeke ukusambilila Baibolo na ba Nte babili abaupana. Ilyo baile nalitwalilile ukubelenga icitabo twatendeke ukusambililamo icitila, Kuti Waikala Kuli Pe na pe muli Paradise Pe Sonde.a Nalibelengele cilya citabo ubushiku bonse mpaka nacipwisha. Ifyo nasambilile pali Yehova Lesa na pa Mwana wakwe Yesu Kristu fyalimfikile pa mutima. Nalimwene ukuti Yehova wa cikuuku kabili alomfwa ububi nga tulecula. (Esaya 63:9) Ifyamfikile sana pa mutima kwishiba ifyo Yehova antemwa ne fyo Umwana wakwe aipeeleshe ukufwa pa mulandu wandi. (1 Yohane 4:10) Ici calengele mone ukuti Yehova alintekanishishe “pantu tafwaya umuntu nangu umo ukonaika lelo afwaya ukuti bonse bakalapile.” (2 Petro 3:9) Naumfwile ukuti Yehova alefwaya mbe cibusa wakwe.—Yohane 6:44.

Nalitendeke ukusangwa ku kulongana muli ulya wine mulungu. Nali no mushishi uutali, nalefwala amasikiyo, kabili ifyo nalemoneka fyaletiinya. Lelo ba Nte balimbikileko amano kwati ni lupwa wabo uo bamwenepo akale sana. Balecita ifyalelanga ukuti Bena Kristu ba cine. Naumfwile kwati nabwelela ku ng’anda kuli bamama na bashikulu, nomba apa caliweme sana ukucila ne fyo cali kale.

Tapakokwele, ifyo nalesambilila mu Baibolo fyalengele natendeka ukwaluka. Nalibe-ele umushishi, nalilekele ukucita ubulalelale, kabili nalilekele ukubomfya imiti babinda e lyo na bucakolwa. (1 Abena Korinti 6:9, 10; 11:14) Nalefwaya ukusekesha Yehova. Kanshi ilyo naishibe ukuti alipatile fimo ifyo nalecita, nshalefwaya umwa kubepekesha pa fyabipa ifyo nalecita. Lelo naleumfwa ububi sana, ica kuti naleyeba nati ‘nshakabwekeshepo ukucita ifya musango uyu na kabili.’ Kabili ukwabula ukupoosa inshita, nale-esha ukwalula ifyo naletontonkanya ne fyo nalecita. Ica fuminemo ca kuti, tapakokwele natendeke ukulaumfwa ukuti ifintu fyalengwamina nga ndecita ifyo Yehova afwaya. Ilyo papitile imyeshi 6 ukutula apo natendekeele ukusambilila Baibolo, nalibatishiwe pa 29 July mu 1989 no kuba Inte ya kwa Yehova.

Baibolo yalilenga naba ne mibele iisuma. Kale nalecita sana ubunkalwe nga ca kuti nakumana no muntu umukali nelyo uushilefwaya ukucita ifyo ndefwaya. Nomba ino nshita ndesha na maka ‘ukuba uwa mutende ku bantu bonse.’ (Abena Roma 12:18) Nalishiba ukuti ni Yehova e walenga njaluke, kanshi ndamutasha sana pa fyo Icebo cakwe ica maka no mupashi wa mushilo fyalenga na-aluka.—Abena Galatia 5:22, 23; AbaHebere 4:12.

Pali ino nshita nshatekwa ubusha ku kubomfya imiti babinda, ku kucita ubunkalwe, na ku kucita ubulalelale. Lelo ndesha na maka ukucita ifilenga Yehova ukusekelela, kabili ndamubombela no mweo onse. Ndabombesha ukwafwa abantu ukuba ifibusa fyakwe. Ilyo papitile imyaka iinono ukutula apo nabatishiwilwe, nalile mu kubombela ku cifulo uko balekabila sana bakabila ba mbila nsuma. Pa myaka iingi, ndatemwa sana ukusambilisha abantu Baibolo no kumona ifyo nabo Baibolo ibafwa ukwaluka. Na kabili, naliba sana ne nsansa pa mulandu wa kuti bamayo nabo balishileba Inte ya kwa Yehova. Cimo icalengele bamayo basalepo ukuba Inte ya kwa Yehova ni co balitemenwe ukumona ifyo na-alwike.

Mu 1999, nalisambilile isukulu ilyo twita pali ino nshita ukuti Isukulu lya Bakabila ba Bufumu mu calo ca El Salvador. Ili isukulu lyalinsambilishe ifingi, kabili lyalilengele naba uwaiteyanya ukuba pa ntanshi mu mulimo wa kubila imbila nsuma. Na kabili, lyalingafwile ukwishiba bwino no kuba uwaiteyanya ukusambilisha no kubomba umulimo wa bucemi mu cilonganino. Muli ulya wine mwaka, nalyupile Eugenia, umukashi wandi uo natemwa sana. Ine no mwina mwandi tubomba umulimo wa kubila imbila nsuma inshita yonse mu calo ca Guatemala.

Kanshi mu cifulo ca kuba uwafuupuka ku ficitika mu calo, naliba ne nsansa nga nshi. Ukukonka ifyo Baibolo isambilisha kwalilenga naleka ukucita ubulalelale no bunkalwe, kabili kwalilenga naba sana no kutemwa e lyo no mutende.