Finshi Baibolo Ilanda pa Mwaume no Mwanakashi Ukwikala Pamo Ukwabula Ukuupana Ukulingana ne Funde?
Icasuko ca mu Baibolo
Baibolo itila Lesa afwaya ukuti abantu ‘baletaluka ku bulalelale.’ (1 Abena Tesalonika 4:3) Mwi shiwi Baibolo yabomfya ilya kuti “ubulalelale,” mwaliba ubucende, ukulaalana kwa baume beka beka na banakashi beka beka, no kulaalana kwa mwaume no mwanakashi abashaupana ukulingana ne funde.
Cinshi Lesa afwaila umwame no mwanakashi ukuupana nga balefwaya ukulalala pamo no kulaikala pamo?
Lesa e watendeke icupo. Atendeke icupo ilyo aufishe umwaume wa kubalilapo no mwanakashi. (Ukutendeka 2:22-24) Talefwaya ukuti umwaume no mwanakashi baleikala pamo ukwabula ukuupana.
Lesa alishiba ifingawamina sana abantunse. Ilyo Lesa atendeke icupo talefwaya ukuti cilepwa, lelo alefwaya ukuti umwaume no mwanakashi abaupana baletwalilila ukwikala pamo pa kuti ulupwa lonse luleba ne nsansa kabili ulwacingililwa. Tontonkanyeni pali ici ica kumwenako ica-anguka. Abapanga icipe cimo kuti balondolola ifyo tufwile ukucita pa kuti tutendeke ukubomfya ico cipe, kabili nga twafikonka kuti twalacibomfya bwino. Lesa na o alitweba ifyo tufwile ukucita pa kuti tuleba ne nsansa mu lupwa. Ifyo Lesa atweba lyonse filalenga abafikonka ukunonkelamo.—Esaya 48:17, 18.
Abapanga icipe cimo kuti balondolola ifyo tufwile ukucita pa kuti tutendeke ukubomfya ico cipe, kabili nga twafikonka kuti twalacibomfya bwino. Lesa na o alitweba ifyo tufwile ukucita pa kuti tuleba ne nsansa mu lupwa
Mu kulala no muntu uo ushaupana nankwe kuti mwafuma ifyabipa. Ku ca kumwenako, mulafuma ukupula amafumo, ukwambula amalwele ya lwambu, e lyo no kulaumfwa ububi pa nshita iitali.
Lesa apangile umwaume no mwanakashi ukuti balelala pamo pa kuti balekwata abana. Lesa amona ubumi ukuti bwa mushilo, no kuti ica bupe ca kukwata abana calicindama nga nshi. Lesa afwaya tulecindika icupo pa kuti tulelanga ukuti twalicindika ici ica bupe.—AbaHebere 13:4.
Bushe caliba fye bwino abantu abashilaupana ukutendeka ukwikala pamo pa kuti bamone nga nabalinga ukuupana?
Abashaupana nga balefwaya ukuba ne nsansa mu cupo, tabafwile ukulaikala pamo pa ciputulwa ca nshita pa kuti bamone nga nabalinga ukuupana. Lelo abantu nga baupana kuti baba ne nsansa nga ca kuti bonse babili balebika sana amano ku kukosha icupo cabo kabili balebombela pamo ukupwisha amafya.a Icupo cilalenga abaupana ukuipeelesha ukucitila abena mwabo ifyo bakabila.—Mateo 19:6.
Bushe abaupana kuti bakosha shani icupo cabo?
Takwaba icupo icapwililika. Na lyo line, abaupana kuti baba ne nsansa mu cupo nga balekonka ukupanda amano ukwaba mu Baibolo. Moneni fimo ifyo Baibolo ilanda ifili pe samba:
Mulebika sana amano ku fyo abena mwenu balekabila ukucila ifyo mwe bene mulekabila.—1 Abena Korinti 7:3-5; Abena Filipi 2:3, 4.
Muletemwana kabili mulecindikana.—Abena Efese 5:25, 33.
Mulesala amashiwi ya kulanda.—Amapinda 12:18.
Muletekanya kabili muleangufyanya ukwelela.—Abena Kolose 3:13, 14.
a Moneni icipande citila “Ifingafwa Indupwa—Ifyo Mwingacita pa Kuti Mulebika Sana Amano ku Kukosha Icupo Cenu.”