PA MYANDA ya myaka iingi, abaYuda balisambilisha abati ishina lya bulesa, Yehova lyalishilisha nga nshi ica kuti talili na kushimbulwa.a (Ilumbo 83:18) Abasoma ifya mapepo abengi batila musaalula ukushimbula ishina lya kwa Kabumba wa bukata kwati muntu munensu, kabili batila kutoba ifunde lyalenga butatu mu Mafunde Ikumi, ilyabinda ‘ukulumbula apa fye Ishina lya Shikulu.’ (Ukufuma 20:7, King James Version) Mu mwanda wa myaka uwalenga butatu C.E., Mishnah yatile “onse uushimbula Ishina lya kwa Lesa, takamone icalo cipya.”—Sanhedrin 10:1.

Ifunde Lyalenga Butatu

Lelo ni shani pa lwa kubinda kwaba mwi funde lyalenga butatu mu Mafunde Ikumi? Ukufuma 20:7 kukonkomesha ukuti: “Wilalumbula apa fye Ishina lya kwa Yehova Lesa obe; pantu Yehova takamulinge uwa kaele untu alumbula apa fye ishina lyakwe.”

Bushe kanshi calola mwi ukulumbula ishina lya kwa Lesa ‘apa fye’? Mu lupapulo lwa The JPS Torah Commentary, ulwasabankenye akabungwe ka Jewish Publication Society balondolola ili shiwi lya ciHebere ilyo bapilibula muli ili lembo ukuti ‘wilalumbula apa fye’ (lash·shaw’ʹ) lilosha ku kulumbula “bufi bufi fye” nelyo “apabula no mulandu wine wine.” Muli ulu lwine lupapulo balikonkanyapo abati: “Apo [ili shiwi lya ciHebere] kuti lyapilibula na fimbi twaishiba ukuti lilanda pa balelubulula mu cilye ukuti tabafwile ukubepa, kabili umuntu tafwile ukulapa ubufi, ukwangasha nelyo ukushimbula Ishina lya kwa Lesa apabula umulandu.”

Uku kulandapo kwa baYuda kwalilungika ukulangilila ukuti ‘ukulumbula ishina lya kwa Lesa apa fye’ kulosha ku kulishimbula pa fintu ifya cabe cabe. Lelo bushe ukulishimbula pa kusambilisha abantu pa lwa kwa Lesa nelyo pa kulanda na Shifwe wa ku muulu mwi pepo, cine cine kuti twatila “kwangasha nelyo kushimbula ishina lya kwa Lesa apabula umulandu”? Yehova alilanda fintu atontonkanyapo mu Ilumbo 91:14 apatila: “Ico ankondela, e co ndemupokolwela; ndemusansula, ico aishibe shina lyandi.”