Yaele aali mwi tenti lyakwe, lelo umulume wakwe alifuminepo. Ilyo Yaele amwene Sisera aleisa, apo pene atendeke ukutontonkanya pa fyo ali no kucita. Yaele alishibe bwino Sisera e lyo ne fyabipa ifyo alecita. Na lyo line, afwile taishibe ukuti Yehova alyebele kasesema mwanakashi Debora ukuti uukepaya Sisera te mwaume, lelo mwanakashi. Na lyo line, Yaele afwile alishibe ifyo Yehova alefwaya ukuti acite. Cinshi twalandila ifi?

Yaele alishibe ukuti Sisera alecita ifyabipa kabili ali mulwani wa kwa Lesa, kanshi afwile alishibe ifyo alingile ukucita pa kuti afikilishe ifyo Yehova alefwaya ukuti acite. Ilyo papitile inshita, Yehova alilengele Debora ashika ulwimbo ulwalembwa mu Baibo ululanda pa fyo Baraki acimfishe Sisera. Muli lulya ulwimbo mwaba amashiwi yatila: “Umwanakashi uwapaalwa ukucila abanakashi bonse ni Yaele muka Heberi umwina Keni; alipaalwa ukucila abanakashi bonse abekala mu matenti.” Kanshi filya abantu bamo balanda ukuti Yaele ali wa bufi kabili ali munkalwe te fya cine. Yaele ali mwanakashi uwashipa uwalwileko inkondo sha kwa Yehova. Nga filya fine Rahabu acitile, na o asalilepo ukuba ku lubali lwa kwa Yehova ukucila ukuba ku lubali lwa balwani ba kwa Yehova. Nomba finshi ali no kucita?

Kwena Yaele alishibe ukuti takwete amaka ya kulwa na Sisera. Sisera ali mushilika wa maka kabili uwaishibe sana ukulwa inkondo. E ico Yaele aebele Sisera ukuti engile mwi tenti pa kuti alyeko fimo no kutuusha. Lyena alimufimbile ica kufimbana. Ilyo Sisera amulombele amenshi ya kunwa, Yaele amupeele umukaka. Aebele Yaele ukuti eminine pa mwinshi we tenti, kabili nga kwaisa umuntu uulemufwaya, abepe ukuti takuli umwaume uwishile mwi tenti. Lyena Sisera aponene mu tulo utukalamba.

Yaele alishibe ukuti nomba inshita ya kuti epaye Sisera yalifikile. E ico abuulile ulupoopo lwe tenti na sando iyafina, ifyo nalimo bapangiile ne fimuti. Lyena aile alebendelela ukuya uko Sisera aleele. Ilyo afikile apo aleele, ali-ipekenye pa kuti amwipaye. Nga ca kuti ilyo Yaele aile mu kwipaya Sisera alilufyenye ukucita fimo, nalimo Sisera nga alibuukile no kumwipaya bubi bubi. Nomba ali-ipekenye bwino sana. Tapoosele inshita, lelo ashimpile ulupoopo mu nsensematwi sha kwa Sisera ica kuti lwalipulile mu mutwe, lwafika na panshi. E fyo Sisera afwile.

Ilyo papitile inshita, Kapingula Baraki alishile mu kufwaya Sisera, kabili Yaele alifumine mwi tenti pa kuti amukumanye. Ilyo afumine aebele Baraki ati: “Iseni imulange uo mulefwaya.” Ilyo Baraki aingile mwi tenti, asangile Sisera nafwa nga filya fine Debora aseseme ukuti: “Yehova akapeela Sisera mu minwe ya mwanakashi.”

• Abapingushi 4:​9, 11, 17-22; 5:​24-31