Kalata Ukufuma kwi Bumba Litungulula

Kuli Bamunyinefwe na Bankashi Abatemwikwa:

Yesu aebele aba mu cilonganino ca mu Smurna ati: “Witiina pa macushi ayo uli no kukwata.” (Ukus. 2:10) Amashiwi alandile aya kubakoselesha, yalakoselesha na ifwe bene fwe bekala mu “bushiku bwa kwa Shikulu.” (Ukus. 1:10) Ukwabula no kutwishika, tuleikala mu “nshita ishayafya nga nshi,” lelo mulatukoselesha icine cine nga twamona ifyo mwacetekela sana Yehova, ifyo mwaba abashipa e lyo ne fyo mumubombela ne cishinka.—2 Tim. 3:​1-5.

Nomba kuti twacita shani pa kuti tutwalilile ukuba abashipa no kulabombela Yehova ne cishinka? (Heb. 10:39) Te lyonse cingatwangukila ukuba abashipa, pantu abantu nalimo kuti balatukaanya ukupepa Yehova nelyo kuti balatucusha. Na lyo line, kuti twatwalilila ukuba abashipa e lyo no kulacita ifyo Yehova afwaya nangu ca kuti tuli ba nsoni kabili tuli ba mwenso. Finshi fingalenga twatwalilila ukuba abashipa?

Muli Baibo mwaliba amalyashi ya baume na banakashi abali abashipa abo tulingile ukupashanya. Kanshi Baibo kuti yalenga twaba abashipa. Cino citabo cikalenga tukasambilile pa fyo abaume na banakashi abo Baibo yalandapo bacitile, kabili cikalenga tukaletontonkanya pa fyo twingalabapashanya. Ilyo mukalabelenga aya amalyashi, mukalepepa kuli Yehova ukuti akalelenga mwaumfwikisha ifyo mwakulasambilila, pa kuti mulebapashanya nga mwaba na mafya pali ino nshita nelyo ku ntanshi. Muletontonkanya pa fyo Yehova engamwafwa ukuba abashipa. Na kabili muletontonkanya pa fyo mwingaba abashipa nga ca kuti mulepashanya ababomfi ba kwa Yehova aba ku kale abali abashipa, ilyo mulecita ifyakonkapo:

Mulecita ifyo Yehova afwaya. (Yako. 3:17) Ilyo Yehova akeene Shauli kabili ilyo asalile Davidi ukuti e o akabe imfumu, Yonatani alikonkele ifyo Yehova alefwaya, kabili alitwalilile ukuba uwashipa no kubombela Yehova ne cishinka.

Mulecita ifyo Yehova atweba te mulandu ne fingamucitikila. (Heb. 11:​32-34) Hanania, Mishaele na Asaria balikeene ukukontamina icimpanshanya. E ico balibapoosele mwi lungu lya mulilo. Na lyo line, balitwalilile ukuba aba cishinka kuli Yehova nangu ca kuti bali no kufwilapo.

Mule-ebako bambi icine pali Yehova na Yesu. (Mat. 22:16) Tontonkanyeni pali Sauli umwina Tarsi. AbaYuda abalecusha abasambi ba kwa Yesu balemona kwati Sauli aali no kutwalilila ukucusha abasambi ba kwa Yesu, lelo alyalwike kabili alebeba icine pali Yesu ukwabula umwenso.

Tatuletwishika ukuti cino citabo cikalenga mukabeleko abashipa kabili mukalecetekela sana Yehova. (Amalu. 27:14) E ico mule-ebako balupwa lwenu na ba bwananyina ifyo mwakulasambilila pa kuti baleba abashipa kabili baletungilila Ubufumu bwa kwa Lesa. Yehova nalemupaala!