1 ENOKE
Ale-enda na Lesa
ENOKE alishibe ifyo cumfwika ukupusanako na bantu bambi. Alipuseneko na bantu bambi abaliko pali ilya nshita. E muntu fye uwaliko pali ilya nshita uo Baibo yalandapo ukuti: “Ale-enda na Lesa wa cine.” Bushe umuntu kuti aenda shani na Lesa? Kabili finshi twingasambililako kuli Enoke filya ali uwashipa?
Ifyo Enoke alecita ne fyo alekaana ukucita e filanga ukuti ale-enda na Lesa wa cine. Talecita ifyabipa ifyo abantu abengi balecita pali ilya nshita. Ali mu nkulo yalenga 7 ukutula apo Lesa abumbiile Adamu na Efa. Pali ilya nshita Adamu ninshi talafwa, lelo aali mukote. (Moneni charti ileti “Ukufuma mu Nshiku Enoke ali uwa Mweo Ukufika mu Nshita ya Bakapingula.”) Ukutula apo Adamu na Efa babembukiile Lesa, abantu na bambi abengi balecita ifyabipa. Kaini umwana wabo umwaume alipeye ndume nankwe Abele. Abele e muntu uwabalilepo ukucita ifyalelanga ukuti alicetekele Lesa. Abana na beshikulu bamo aba kwa Kaini baishileba abankalwe kwati fye ni ena, e lyo bambi baishileba abankalwe ukucila ne fyo ali. (Ukute. 4:23, 24) Enoke ena tali umunkalwe nga filya abantu abengi abaliko pali ilya nshita bali. Ali muntu umusuma kabili ifyo alecita fyalengele Lesa amutemwa.
“Abantu batendeke ukulilila kwi shina lya kwa Yehova” imyaka iingi ilyo Enoke ashilafyalwa. (Ukute. 4:26) Cimoneka kwati balebomfya ishina lya kwa Yehova bubi bubi; balelibomfya mu kupepa kwa bufi. Enoke ena talecitako ifyo balecita. Alitemenwe ishina lya kwa Lesa ilya mushilo kabili alelicindika. Kanshi ifyo alecita fyalipuseneko ne fyo abantu abaliko pali ilya nshita balecita.
Yehova alicitilepo cimo pa kuti acingilile Enoke ilyo abantu balefwaya ukumwipaya pa mulandu wa kuti balikalipe pa fyo abebele
Enoke alingile ukushipa sana pa kuti abombe umulimo Yehova amwebele ukubomba. Lesa alipeele Enoke umulimo waibela uwa kuba kasesema. Kwali amashiwi ayo Yehova amwebele ukuyaeba abantu abalecita ifyabipa. Aya e mashiwi Yehova amwebele ukuyaeba abantu: “Moneni! Yehova aishile ne minshipendwa ya ba mushilo bakwe, ku kupingula bonse, no kushinina bonse abashitiina Lesa pali fyonse ifyabipa ifyo bacitile, na pa fya bunani fyonse ifyo ababembu abashitiina Lesa balandile pali ena.”
Ifyo Enoke aseseme fyumfwika kwati fyalicitike kale. Ici cilanga fye ukuti ifyo Enoke aseseme fyali no kucitika. Kabili amashiwi Enoke aebele abantu yalanga ukuti Yehova alikalipe pa fyo abantu balecita. Enoke alibwekeshepo ukulanda amashiwi ya kuti “abashitiina Lesa” imiku ibili. Ukwabula no kutwishika, abantu balikalipe ilyo baumfwile aya amashiwi. Na lyo line, Enoke alishipile kabili alyebele abantu ifyo Yehova amwebele.
Bushe abantu bacitile shani? Baibo tayalanda ifyo bacitile, na lyo line kwaliba ifyo yalanda ifilanga ukuti abantu balefwaya ukumwipaya. Cinshi twalandila ifi? Baibo ilanda ukuti: “Lyena alilekele ukumoneka, pantu Lesa alimusendele.” Finshi fyacitike? Cimoneka kwati abantu abalecita ifyabipa abaliko pali ilya nshita balecusha sana Enoke. Apo Yehova alitemenwe Enoke, “alimusendele” nelyo alilekele afwa. Ifi fyalengele abantu betwalilila ukucusha Enoke, kabili Yehova akamubuusha pantu alamwibukisha.
Ilyo Enoke ashilafwa, Yehova alimupeele ubupe. Baibo ilanda ukuti ilyo Enoke ashilafwa, alishibe ukuti “alesekesha sana Lesa.” Nalimo Yehova alilengele Enoke amona icimonwa icalelanga ifyo akalaikala umutende mu paradaise pano isonde. Ilyo Enoke ashilafwa taletwishika ukuti Yehova alimutemenwe kabili alimupaalile, pantu alimucetekele sana kabili ali uwashipa nga nshi!
Belengeni ilyashi lya mu Baibo:
Lanshanyeni:
Bushe Enoke alangile shani ukuti ali uwashipa?
Ishibilenipo na Fimbi
1. Ni mu nshila nshi abantu abaliko ilyo Enoke ashilafwa, ‘balelilila kwi shina lya kwa Yehova’? (Ukute. 4:26; w01 9/15 ibu. 29 para. 3)
2. Mulimo nshi Lesa apeele Enoke uo umuntu nangu umo ashabalile abombapo? Cinshi calengele abombe uyu umulimo? (w01 9/15 ibu. 31 para. 5)
3. Cinshi twingalandila ukuti Enoke afwile alishibe ukuti alingile ukuba uwashipa sana na lintu ashilatendeka ukusesema? (w06 10/1 ibu. 19 amapara. 13-14) A
Icikope A
4. Kuti mwalondolwela shani umuntu ukuti Enoke taile ku muulu nge fyo abantu bamo baishiba? (Yoh. 3:13; Heb. 11:5, 13)
Tontonkanyeni pa fyo Mwingasambililako
Ni lilali nalimo twingakabila sana ukuba abashipa ilyo tulebila imbila nsuma? Finshi Enoke acitile ifyo na ifwe twingacita? B
Icikope B
Bushe Yehova omfwa shani nga tuli abashipa ilyo tule-enda nankwe? (Amapi. 27:11; Heb. 11:5)
Kuti mwaba shani abashipa nga filya Enoke ali?
Ifyo Mufwile Ukutontonkanyapo Sana
Finshi ili ilyashi lilensambilisha pali Yehova?
Bushe ili ilyashi lyaikatana shani ne fyo Yehova afwaya ukucita?
Finshi ningatemwa ukwisaipusha Enoke ilyo bakamubuusha?
Sambililenipo na Fimbi
Bushe ukutontonkanya pa fyo Enoke ali uwashipa kuti kwalenga shani mwalashipikisha nga ca kuti abantu abankalwe balemucusha?
Belengeni ifyalengele Enoke acetekele sana Lesa.
“Mule-enda na Lesa Muli Shino Nshiku Isha-afya” (w05 9/1 amabu. 13-17)