Ipitilo lya Kumfwaninamo

5. Ni shani Ukusokolola kwapeelwe ku mutumwa Yohane e lyo lyene ku filonganino?

⁵ Ukusokolola 1:1b, 2 kwatwalilila: “Kabili [Yesu] akulangile [Ukusokolola] pa kutuma malaika wakwe ku [musha, “NW”] wakwe Yohane, uwali nte ku cebo ca kwa Lesa, na ku bunte bwa kwa Yesu Kristu, ubwa fyonse ifyo amwene.” Muli fyo, Yohane apokelele icalembwa capuutwamo ukupitila mu nkombe ya bumalaika. Acilembele pa cimfungwa, ukucituma ku filonganino fya mu nshita yakwe. Mu kubamo insansa kuli ifwe, Lesa alibaka ukukoselesha kwa filonganino fyacila pali 50,000 ifya babomfi bakwe baikatana pe sonde ilelo.

6. Ni shani Yesu aishibishe ipitilo ilyo aali no kubomfya ku kupeele ca kulya ca ku mupashi ku ‘basha’ bakwe ilelo?

⁶ Lesa alikwete ipitilo lya kutuma Ukusokolola mu kasuba ka kwa Yohane, kabili Yohane aali ulubali lwa pe sonde ulwa ilyo ipitilo. Mu kupalako, Lesa alikwata ipitilo lya kupeela ukuliishiwa kwa ku mupashi ku ‘basha’ bakwe ilelo. Mu busesemo bwakwe bukalamba ukukuma ku kusondwelela kwa micitile ya fintu, Yesu aishibishe ulubali lwa pe sonde ulwa ili pitilo ngo “musha wa cishinka kabili uwashilimuka, uo shikulu wakwe alaashile pa ba mu ŋanda yakwe, ku kubapeela ifya kulya mu nshita iyene.” (Mateo 24:3, 45-47) Abomfya ili bumba lya buYohane ku kufungula ubupilibulo bwa busesemo.

7. (a) Ni shani ifilangililo fisangwa mu Ukusokolola fitwambukila? (b) Butali bwaba shani ubo bamo abe bumba lya buYohane baakana mu kufikilishiwa kwa fimonwa fya Ukusokolola?

⁷ Umutumwa Yohane alembo kuti Yesu apeele Ukusokolola mu “fishibilo,” nelyo ifilangililo. Fyabe fyamonekesha no kucincimusha ku kufibebeta. Filangisha imibombele yabamo ulupikwe kabili fifwile, mu kukonkapo, ukutukumbamo ku kubombesha kwapimpa mu kulengwo kwishibikwa kuli bambi ubusesemo no bupilibulo bwa kuko. Ukusokolola kupeela kuli ifwe impendwa ya fimonwa filuminisha, muli cimo na cimo umo Yohane ayafwilishe mu kubombamo nelyo ngo wa kutamba. Abo abe bumba lya buYohane, bamo abayakanamo mupepi ne myaka 70 mu kufikilishiwa kwa ifi fimonwa, baba aba nsansa ukuti umupashi wa kwa Lesa walifungula ubupilibulo ica kuti bengabulondolola kuli bambi.

9. (a) Ukupala Yohane, mibele nshi ibumba lya buYohane lyalangisha? (b) Ni shani Yohane alangisha inshila ifwe twingabelamo aba nsansa?

⁹ Yohane aali uwa citetekelo mu kucitilo bunte ku bukombe ubo Lesa ukupitila muli Yesu Kristu apeele kuli wene. Alondolwele mu kwebekesha “fyonse ifyo amwene.” Ibumba lya buYohane mu kupimpa lyalifwaisha ukutungulula ukufuma kuli Lesa na Yesu Kristu mu kuti batesekeshe ubusesemo mu kukumanina no kulenga ukwishibikwa ifishinka fisuma fya buko ku bantu ba kwa Lesa. Ukumwenamo kwa cilonganino casubwa (na kabili na kwi bumba lya pa kati ka nko ilyo Lesa akabaka ilituntulu ukupula mu bucushi bukalamba), Yohane alemba ati: “Wa nsansa uubelenga mu kupongomoka na abo abomfwa ifyebo fya busesemo ubu, na babake fintu fyalembwamo; pantu inshita yasontwa ili mupepi.—Ukusokolola 1:3, “NW.”