Ubufi bwa Kubalilapo: Umweo Taufwa

Ni kwi ubu bufi bwafumine? “Abena Kristu ba kubalilapo abalesambilisha amano ya buntunse batendeke ukusambilisha ifisambilisho fya ciGriki ifya kuti umweo taufwa kabili baleti Lesa e wapangile umweo no kuubika mu mubili wa muntu pa kwimitwa.”—The New Encyclopædia Britannica (1988), Volyumu 11, ibula 25.

Cinshi Baibolo isambilisha? “Umweo uwabifya e ukafwa.”—Esekiele 18:4, Baibolo ya Diocese of Mbala.

Baibolo ilanda pa fyo Lesa abumbile umuntu wa kubalilapo ukuti: “Yehova Lesa abumbile umuntu ku lukungu lwa mu mushili kabili apuutile mu myona yakwe umupu wa bumi, no yo muntu aishileba uwa mweo [iciHebere, neʹphesh].”—Ukutendeka 2:7.

Ishiwi lya ciHebere ilya kuti neʹphesh, ilyapilibulwa ukuti “umweo,” lipilibula ‘icibumbwa icipeema.’ Ilyo Lesa abumbile umuntu wa kubalilapo Adamu, tamupuutilemo umweo uushifwa lelo amupuutilemo amaka ya mweo, kabili umuntu nga alepeema e lyo aya maka yabomba. Kanshi, ukulingana na Baibolo, “umweo” cibumbwa conse icituntulu. Nga ca kutila amaka ya mweo ayo Lesa abikilemo yafumamo, umweo ulafwa.—Ukutendeka 3:19; Esekiele 18:20.

Icisambilisho ca kuti umweo taufwa cilenga abantu ukwipusha amepusho ya kuti: Bushe umuntu nga afwa umweo uya kwi? Cinshi cicitika ku myeo ya bantu ababipa? Ilyo abaleitunga ukuti Bena Kristu basumine mu bufi bwa kuti umweo taufwa, calengele ukuti basumine mu bufi na bumbi ubwa kuti kwaliba umulilo wa pe.

Belengeni na aya amalembo: Lukala Milandu 3:19; Mateo 10:28; Imilimo 3:23

ICISHINKA NI CI:

Umuntu nga afwa, tatwalilila ukuba no mweo