Yehova—“Ubwikalo” Bwesu

4-6. Yehova aba shani “ubwikalo” kuli ifwe?

⁴ Kemba wa malumbo atendeka na mashiwi ya kuti: “Mwe Shikulu, imwe mwatubelo bwikalo ku nkulo ne nkulo.

Amalumbo 90:1,

⁵ Kuli ifwe “Lesa wa muyayaya,” Yehova, e “bwikalo” bwesu—icubo ca ku mupashi. (Abena Roma 16:26) Tulomfwa abacingililwa, pantu lyonse alatwafwa pamo nga ‘uumfwa ukupepa.’ (Amalumbo 65:2) Pa mulandu wa kuti tupoosa amasakamika yesu pali Shifwe wa ku muulu ukupitila mu Mwana wakwe uwatemwikwa, ‘umutende wa kwa Lesa uwapulamo mu kwiluka konse, ulinde mitima yesu na mapange yesu.’—Abena Filipi 4:6, 7; Mateo 6:9; Yohane 14:6, 14.

⁶ Twalicingililwa lwa ku mupashi pantu, mu mampalanya, Yehova e “bwikalo” bwesu. Na kabili aliteyanya “imiputule”—iyaampana sana ne filonganino fya bantu bakwe—nge cubo ca ku mupashi, uko bakacema ba kutemwa balenga tuleyumfwa abacingililwa. (Esaya 26:20; 32:1, 2; Imilimo 20:28, 29) Na kabili, bamo twaba mu ndupwa ishatendeke kale ukubombela Lesa kabili twalisanga pa lwesu ukuti wene e “bwikalo ku nkulo ne nkulo.”