Twaliibela mu fyo Tutontonkanya

12. Ni muli finshi abantu bapusana sana ne nama?

¹² “Ifyo yafinisha kuli ine amatontonkanyo yenu, mwe Lesa! Impendwa sha yako ubwingi! Nga naesho kuyapenda, yafulo kucilo musensenga.” (Amalumbo 139:17, 18a) Inama nasho shalengwa mu musango wa kupapa, kabili shimo shalitucilako muli fimo fimo pamo ngo kununsha, ukumona, amaka, na muli fimbi. Lelo Lesa apeele abantu amano ukucila inama. Icitabo cimo ica sayansi catila “nangu cingati twalipalana ne nama mu fintu ifingi, twalicila sana inama mu kutontonkanya na mu fyo tulanshanya. Na kabili twaliibela pantu tulafwaisha ukwishiba ifyo twaba: Bushe twapangwa shani? Bushe twaishilebako shani?” Aya e mepusho Davidi na o aletontonkanyapo sana.

13. (a) Bushe Davidi aletontonkanya shani pa cebo ca kwa Lesa? (b) Kuti twapashanya shani Davidi?

¹³ Ne cacilapo sana ukucindama mu fyo twapusanako ne nama ca kuti ifwe tulatontonkanya pa cebo ca kwa Lesa.c Ubu bupe bwacindama bwaba pa filanga ukuti ‘twalengelwe mu cata ca kwa Lesa.’ (Ukutendeka 1:27) Davidi alebomfya bwino ubu bupe. Aletontonkanya pa bushininkisho ubulanga ukuti Lesa e ko aba na pa mibele yakwe iisuma iimonekela mu fyo abumba. Davidi na kabili alikwete ifyalembwa fya mabuuku ya Mushilo aya kubalilapo umwalembelwe imilimo ya kwa Lesa ne fyo aba. Ifi fyalembwa fyapuutwamo fyayafwile Davidi ukwishiba amatontonkanyo ya kwa Lesa, ifyo aba no bufwayo bwakwe. Ukulatontonkanya pa Malembo, pa fibumbwa, na pa fyo Lesa alemusakamana kwalengele Davidi ukulalumbanya Kabumba wakwe.