Bushe Muleibukisha?

Bushe mwaliipakishe ukubelenga bamagazini ba nomba line aba Ulupungu lwa kwa Kalinda? Cisuma, moneni nga kuti mwayasuka ifi fipusho:

• Bushe “ubupanda” kuti bwatucingilila shani? (Amapinda 1:4)

Ubupanda kuti bwatucenjeshako ku fingaleta ubusanso lwa ku mupashi kabili kuti bwatucincisha ukucita ifya mano, pamo nga ukutaluka ku matunko ya bucisenene pa ncito. Bulatwafwa ukwibukisha ukuti Abena Kristu banensu tabapwililika, kabili ici kuti catulenga ukukanayangufyanya ukucita cimo ilyo twakalifiwa. Ubupanda na kabili kuti bwatulenga ukutaluka ku mupatikisha wa kuti tuleipakisha ifintu fya mu calo ifingatupumbula ku fya ku mupashi.—8/15, amabula 21-4.

• Bushe umuntu kuti aba shani umwina mupalamano musuma?

Inshila shibili isho umo engabelamo umwina mupalamano musuma kuba kapekape musuma kabili uutasha pa fyo apokelela. Calicindama ukuba umwina mupalamano musuma lintu kwaba akayofi. Inte sha kwa Yehova balabombesha ukuba abena mupalamano basuma pa kusoka bambi ulwa fili no kucitika nomba line ku ntanshi, Lesa akacitapo cimo ku kupwisha ububifi.—9/1, amabula 4-7.

• Ukulingana na Baibolo, ni bani abatakatifu ba cine, kabili bakaafwa shani abantunse?

Abena Kristu ba kubalilapo bonse bali batakatifu ba cine, nelyo aba mushilo, abashishiwe na Lesa, te ku bantu nelyo utubungwe. (Abena Roma 1:7) Ilyo babushiwilwa ku bumi bwa ku muulu, aba mushilo bakabombela pamo na Kristu mu kupaala aba busumino pe sonde. (Abena Efese 1:18-21)—9/15, amabula 5-7.

• Ukwishiba fimo pa lwa mangalo yaali mu Greece wa pa kale kwacindama shani ku Bena Kristu?

Mu fyalembwa fya mutumwa Petro no mutumwa Paulo mwaba ifilangililo fya pa mangalo yalecitwa ku kale. (1 Abena Korinti 9:26; 1 Timote 4:7; 2 Timote 2:5; 1 Petro 5:10) Kale calicindeme uwa mangalo ukuba no wa kumukansha umusuma, ukuba uwailama, kabili uubomfya amaka yakwe bwino. E fyo na Bena Kristu ilelo bafwile ukuba lwa ku mupashi.—10/1, amabula 28-31.

• Bushe mafya nshi na mapaalo ayaba mu kukushisha abana mu calo cimbi?

Abana abengi balasambilila bwangu ululimi lupya ukucila abafyashi babo, abafyashi nalimo kuti cabafya ukwishiba ifyo abana batontonkanya ne fyo bankula ku fintu. Kabili abana te kuti cibangukile ukumfwikisha ifisambilisho fya mu Baibolo mu lulimi lwa bafyashi babo. Lelo, ukwikatana mu lupwa kuti kwakoselako nga ca kuti abafyashi basambilisha abana ululimi lwabo, abana kuti baishiba indimi shibili ne ntambi shibili.—10/15, amabula 22-6.

• Mulandu nshi ukulomba ubwelelo kwacindamina?

Ukulombo bwelelo mu bufumacumi ilingi line e mo tumfwanina ne cibusa tupusene na co. Baibolo ipeela ifya kumwenako pa fyo ukulombo bwelelo kubomba bwino sana. (1 Samwele 25:2-35; Imilimo 23:1-5) Ilingi line, abantu babili nga bapusana, icilubo cifwile ukuba pali bonse babili. E co, bonse babili bafwile ukusumina icilubo no kulombo bwelelo.—11/1, amabula 4-7.

• Mulandu nshi ubwangalo bwa celamushuke bwabipila nangu fye kushitikapo indalama shinono?

Ubwangalo bwa celamushuke bulenga kwaba bukaitemwe, umupashi wa kucimfyanya, no bufunushi, imibele iyo Baibolo yasenuka. (1 Abena Korinti 6:9, 10) Abengi abakunkuma ku fyangalo fya celamushuke batendeke abaice kabili baleshitikapo indalama ishinono.—11/1, ibula 31.

• Apo amabuuku ya mu Baibolo ayengi yalembelwe mu ciGriki, mulandu nshi uwa kupilibwila Baibolo mu ciGriki, kabili finshi fitumbukamo?

IciGriki ca ndakai calipusana ne ciGriki ca mu Baibolo wa Septuagint uwa Malembo ya ciHebere na Malembo ya ciGriki aya Bwina Kristu. Mu myanda ya myaka iya ndakai balyesha sana ukupilibula icipande nelyo Baibolo onse fye mu ciGriki cilandwa nomba. Ilelo, kwaba amabupilibulo ya Baibolo onse nelyo ifipande nalimo 30, ifingabelengwa ku mu Griki yaweyawe, imo iyaishibikwa sana ni New World Translation of the Holy Scriptures, iyasabankanishiwe mu 1997.—11/15, amabula 26-9.

• Mulandu nshi Abena Kristu tabakabila ukupeela ica pe kumi?

Mwi Funde lyapeelwe kuli Israele wa pa kale, ukupeela ica pe kumi yali e nshila ya kwafwilamo umukowa wa kwa Lebi no kusakamaninamo abashakwete pa kuma kuboko. (Ubwina Lebi 27:30; Amalango 14:28, 29) Imfwa ya bulilambo iya kwa Yesu yafumishepo Ifunde, kabili mwi funde line ili e mwali no kupeela ica pe kumi. (Abena Efese 2:13-15) Mu cilonganino ca kubalilapo, Umwina Kristu alepeela ukulingana na po akwatile e lyo na fintu umwine apingulapo mu mutima wakwe. (2 Abena Korinti 9:5, 7)—12/1, amabula 4-6.

• Bushe Ukusokolola 20:8 kwalola mu kuti pa kweshiwa kwa kulekelesha, Satana akalufya imintapendwa ya bantu?

Ilembo litila abakalufiwa bakaba “ngo musensenga wa pali bemba.” Muli Baibolo, aya mashiwi ilingi line yapilibula impendwa ishaishibikwa, lelo tayatubulula ukuti ni mpendwa ikalamba. Ubufyashi bwa kwa Abrahamu, ubwali no kuba “ngo musensenga uuli pa nembenembe ya bemba,” bwaishileba fye bwa bantu 144,000. (Ukutendeka 22:17; Ukusokolola 14:1-4)—12/1, ibula 29.