“Ikalilileni Mu Kutemwa Kwa Kwa Lesa”

“Ikalilileni mu kutemwa kwa kwa Lesa, ilyo mulelolela uluse lwa kwa Shikulwifwe Yesu Kristu ulwalola ku mweo wa muyayaya.”—YUDA 21.

1, 2. Yehova atulanga shani ukuti alitutemwa, lelo twaishiba shani ukuti takatwalilile fye ukututemwa te mulandu ne fyo twasalapo ukucita?

YEHOVA LESA alitulanga ukuti alitutemwa mu nshila ishingi nga nshi. Ukwabula no kutwishika, ubushininkisho bwakulisha ubwa kuti Yehova alitutemwa bupe ubo atupeele ubwa cilubula. Ukutemwa kwa kwa Yehova kwalikula sana ica kuti atumine fye no Mwana wakwe uo atemwisha ukwisa pano isonde, no kumuleka ukutufwila. (Yoh. 3:16) Yehova acitile ici cintu pantu afwaya ifwe ukwikala umuyayaya no kumwenamo mu kutemwa kwakwe!

² Bushe kuti twatila Yehova akatwalilila fye ukututemwa te mulandu ne fyo fwe bene twasalapo ukucita? Awe iyo. Pantu pali Yuda icikomo 21, paba uku kukonkomesha: “Ikalilileni mu kutemwa kwa kwa Lesa, ilyo mulelolela uluse lwa kwa Shikulwifwe Yesu Kristu ulwalola ku mweo wa muyayaya.” Amashiwi ya kuti “ikalilileni mu kutemwa kwa kwa Lesa” yalelanga ukuti pa kuti Lesa atwalilile ukututemwa, tufwile ukucitapo fimo. Cinshi kanshi tufwile ukucita pa kuti Lesa akatwalilile fye ukututemwa?

Kuti Twaikalilila Shani mu Kutemwa kwa kwa Lesa?

 3. Yesu atile cinshi calefwaikwa kuli ena pa kuti atwalilile ukwikala mu kutemwa kwa kwa Wishi?

³ Amashiwi Yesu alandile ubushiku bwa kulekelesha pano isonde e yatwafwa ukwasuka ico cipusho. Atile: “Nga mwakonka amafunde yandi, mukekala mu kutemwa kwandi, ifyo na ine nkonka amafunde ya kwa Tata no kwikala mu kutemwa kwakwe.” (Yoh. 15:10) Ukwabula ukutwishika, Yesu alishibe ukuti ukusunga amafunde ya kwa Yehova kwalicindeme pa kuti atwalilile ukuba cibusa wa kwa Wishi. Nga ca kuti ico calekabilwa ku Mwana wa kwa Lesa uwapwililika, pali bufi ifwe!

4, 5. (a) Ni nshila nshi iikalamba tulangilamo ukuti twalitemwa Yehova? (b) Cinshi pashabela umulandu wa kukaanina ukumfwila amafunde ya kwa Yehova?

⁴ Inshila ikalamba tulangilamo ukuti twalitemwa Yehova kumumfwila. Umutumwa Yohane atile: “Uku e kutemwa Lesa, ukuti tulekonka amafunde yakwe; kabili amafunde yakwe taya-afya.” (1 Yoh. 5:3) Ca cine te bengi batemwa ukumfwila abantu bambi muno nshiku. Lelo, moneni amashiwi ayacitila: “Amafunde yakwe taya-afya.” Yehova tafwaya ukuti tucite ifyo tushingakumanisha.

⁵ Natulangilile: Bushe kuti mwaeba cibusa wenu uo mwatemwisha ukumusendelako icipe icafina sana ico mwishibe ukutila te kuti acimye? Kwena iyo! Yehova alicilanapo ukuba bwino pali ifwe kabili alitwishiba bwino sana no mo twapelebela. Baibolo ilatuteka imitima ilyo itila Yehova “alebukisha ukuti tuli lukungu.” (Amalu. 103:14) Takabale atweba ukucita ifintu ifyo tushingakumanisha ukucita. E ico kanshi tapali umulandu wa kukaanina ukumfwila amafunde ya kwa Yehova. Lelo, twalishiba ukuti ukuba ne cumfwila e nshila isuma iya kulangilamo Shifwe wa ku muulu ukuti twalimutemwa icine cine kabili tufwaya ukwikalilila mu kutemwa kwakwe.

Ubupe Bwaibela ubo Yehova Atupeela

6, 7. (a) Kampingu e cinshi? (b) Langilileni ifyo kampingu ingatwafwa ukwikalilila mu kutemwa kwa kwa Lesa.

⁶ Muli cino calo cayafya, cila bushiku tufwile ukusala ifya kucita ifilelanga ukuti tuleumfwila Lesa. Kuti twashininkisha shani ukuti ifyo tulesapo ukucita fileumfwana no kufwaya kwa kwa Lesa? Yehova alitupeela ubupe ubwingatwafwa sana ukuba ne cumfwila. Ubo bupe ni kampingu. Kampingu e cinshi? Ni nshila yaibela iya kuishibilamo fwe bene. Yaba kwati ni kapingula wa mu kati. Ilatulenga ukumona ifyo tulesala ukucita nelyo ukulolesha pa fyo twacita kale no kumona nga fyaliba fye bwino nangu iyo, ukumona nga fyalilungama atemwa iyo.—Belengeni Abena Roma 2:14, 15.

⁷ Kuti twabomfya shani bwino kampingu? Tontonkanyeni pali ici cilangililo. Elenganyeni ukuti muleya ku mushi umo. Awe bamupeela no muntu uwa kumutungulula. Mwaenda akasuba konse bwasuka bwaila no kwila. Mu nshila umo mulepita namutelela kabili muli ne filindi. Pa kuti tamushelemwike nangu ukuitwala fye apali ifiswango, cinshi mulingile ukukwata? Mufwile ukukwata tochi iya kusanikilako umo mulepita. Nomba nga ca kutila tamukwete tochi, bushe kuti mwamona bwino umo mule-enda? Bushe ifiswango teti fimusanse? Kanshi pa kuti mwende bwino muli iyi mpanga mulekabila ukukwata tochi iilebomba bwino. Ukwabula tochi, ubulendo bwenu kuti bwayafya icine cine. E fyo na kampingu ibomba. Ukwabula kampingu, umuntu kuti afilwa ukusala ifya kucita ifisuma kabili ifyalungama.

8, 9. (a) Finshi ifyo kampingu yesu ishingacita ifyo tufwile ukulaibukisha? (b) Cinshi twingacita nga tulefwaya kampingu yesu ukulatwafwa sana?

⁸ Lelo tochi na kampingu fyalikwata umwa kupelela. Nga ca kuti tulesanika fye tochi icisanikesanike na mu nshita ya kasuba, tochi tayakakwate amaka ya kusanika mu nshita ya bushiku. Ukupalako, nga tulekonkelela ifilefwaya imitima yesu, cinshi cingacitika? Ifilefwaya imitima yesu nga tafili bwino kuti fyaonaula kampingu yesu. Baibolo ilatusoka ukuti “umutima wa bucenjeshi ukucila fyonse, kabili walipelelwa.” (Yer. 17:9; Amapi. 4:23) Cimbi na co, nga ca kuti mwakaana ukumfwa kuli ulya uulemutungulula, te kuti mulondoke nangu ca kutila namukwata tochi. E cimo cine na ifwe, nga tatukonkele ubutungulushi bwashininkishiwa kabili ubushaluka ubwa mu Cebo ca kwa Lesa, Baibolo, kampingu yesu te kuti itwafwe sana. (Amalu. 119:105) Ku ca bulanda, abengi muli cino calo babika sana amano ku fifwaya imitima yabo ukwabula ukuti babike amano ku fifwaikwa ifisangwa mu Cebo ca kwa Lesa. (Belengeni Abena Efese 4:17-19.) E mulandu wine abengi, nangu ca kuti balikwata kampingu, balacita ifintu ifyabipa nga nshi.—1 Tim. 4:2.

⁹ Ifwe tatufwile ukuba nga balya! Lelo, tulingile ukuleka Icebo ca kwa Lesa ukutusambilisha no kukansha kampingu yesu pa kuti iletwafwa nga nshi. Tufwile ukumfwila kampingu yesu iyasambilishiwa ifya mu Baibolo ukucila ukuleka ifilefwaya imitima yesu ukututungulula. Pa nshita imo ine, tufwile ukucindika bakampingu ba bamunyinefwe na bankashi abatemwikwa. Tulesha sana ukukanabapunwisha, ilyo tuleibukisha ukuti kampingu ya bamunyinefwe kuti yabakaanya sana ukucita fimo ifyo ifwe citwangukila ukucita.—1 Kor. 8:12; 2 Kor. 4:2; 1 Pet. 3:16.

10. Fintu nshi fitatu mu mikalile yesu ifyo nomba twalalandapo?

¹⁰ Lekeni nomba tulande pa fintu fitatu mu mikalile yesu, umo twingalanga ukuti twalitemwa Yehova pa kumumfwila. Muli ifi fyonse fitatu, kampingu taishala, lelo ilakabila ukuitungulula maka maka ku fifwaikwa fya myendele isuma ifya mu Baibolo. Ifintu fitatu ifyo tulangilamo ukuti twalitemwa Yehova pa kumumfwila ni fi: (1) Twalitemwa abantu abo Yehova atemwa, (2) tulacindika abaletungulula, na (3) tulesha ukuba aba busaka mu menso ya kwa Lesa.

Temweni abo Yehova Atemwa

11. Mulandu nshi tulingile ukutemenwa fye abantu abo Yehova atemwa?

¹¹ Ica kubalilapo fye ca kuti, tufwile ukutemwa abantu abo Yehova atemwa. Abantu baba kwati butonge. Ubutonge nga mwabubika pa menshi, bulonka amenshi. E fyaba na bantu. Balapashanya abantu baba na bo. Kabumba wesu alishiba bwino ububi no busuma bwaba mu bantu twangala na bo fwe bantu bashapwililika. E co atufundila ukuti: “Uule-enda na ba mano akaba uwa mano, lelo uwangala na bawelewele akacula.” (Amapi. 13:20; 1 Kor. 15:33) Tapali uwingafwaya ‘ukucula.’ Ifwe bonse tufwaya ‘ukuba aba mano.’ Takuli nangu umo uwingalenga Yehova ukuba na mano nangu uwingonaula imibele yakwe. Lelo, e o tufwile ukupashanya ilyo tulefwaya abengaba ifibusa fyesu. Baleni tontonkanyeni—bantu nshi abashapwililika abo Yehova asala ukuba ifibusa fyakwe?

12. Bantu baba shani abo Yehova asala ukuba ifibusa fyakwe?

¹² Yehova aitile icikolwe Abrahamu ukuti “cibusa wandi.” (Esa. 41:8) Uyu muntu aali uwa citetekelo nga nshi, uwalungama, kabili uwa cumfwila. (Yako. 2:21-23) E bantu Yehova asala ukuba ifibusa fyakwe. Na lelo line asala aba musango yo ukuba ifibusa fyakwe. Nga ca kutila Yehova asala aba musango yo ukuba ifibusa fyakwe, kanshi nacicindama kuli ifwe fwe bantunse abashapwililika ukusala bwino, pa kuti tule-enda na ba mano abengalenga twaba aba mano.

13. Cinshi cingatwafwa ukusala bwino ifibusa?

¹³ Finshi fingamwafwa ukusala ifibusa ifisuma? Ukubelenga ifya kumwenako fya mu Baibolo kuti kwamwafwa. Tontonkanyeni pali bucibusa bwali pali Ruti na nafyala Naomi, pali Davidi na Yonatani, nelyo pali Timote na Paulo. (Ruti 1:16, 17; 1 Sam. 23:16-18; Fil. 2:19-22) Aba bantu baali ifibusa ifisuma, ne cikalamba icalengele ca kuti: Balitemenwe sana Yehova. Bushe kuti mwasanga ifibusa abatemwa Yehova nge fyo mwamutemwa? Ukwabula no kupita mu mbali, mu cilonganino ca Bwina Kristu mwaliba abantu abengi nga nshi abengaba ifibusa ifisuma. Ifibusa fya musango yo tafyakamulenge ukonaula bucibusa bwenu na Yehova. Lelo, bakamwafwa ukulaumfwila Yehova, no kukosha bucibusa bwenu na ena, e lyo no kulabyala ku mupashi. (Belengeni Abena Galatia 6:7, 8.) Bakamwafwa ukwikalilila mu kutemwa kwa kwa Lesa.

Cindikeni Abaletungulula

14. Fintu nshi ilingi line filenga ciletwafya ukucindika abaletungulula?

¹⁴ Inshila yalenga bubili iyo tulangilamo ukuti twalitemwa Yehova ikumine ubutungulushi. Tufwile ukucindika abaletungulula. Mulandu nshi limo ici citukosela nga nshi ukucita? Umulandu umo wa kuti, abantunse abatungulula tabapwililika. E lyo na ifwe bene tatwapwililika. Ukufuma fye pa kufyalwa kwesu twalemenena fye ku kupondoka.

15, 16. (a) Mulandu nshi cacindamina ukuti tulecindika abo Yehova apeela umulimo wa kusakamana abantu bakwe? (b) Lisambililo nshi ilyacindama tusambilila ku fyo Yehova amwene abena Israele ilyo bapondekele Mose?

¹⁵ Kanshi napamo mulatontonkanyapo amuti, ‘Nga ca kutila calikosa ukucindika abatutungulula, mulandu nshi bafwaila ukuti tulecite ifyo?’ Icasuko cikumine umulandu wa bumulopwe. Nani mwingasala ukuba kateka wenu? Nga twasala Yehova ukuba Kateka wesu, tufwile ukucindika ubutungulushi bwakwe. Nga tatucindike ubutungulushi bwakwe, bushe ninshi kuti aba Kateka wesu? Kabili, ilingi line Yehova atutungulula ukupitila mu bantunse abashapwililika abo apeela umulimo wa kusakamana abantu bakwe. Bushe Yehova akatumona shani nga twapondokela aba bantu?—Belengeni 1 Abena Tesalonika 5:12, 13.

¹⁶ Ku ca kumwenako, ilyo abena Israele bailishenye pali Mose no kumupondokela, Yehova amwene ukuti balya bacipondoka baleilishanya pali ena kabili e o bapondekele. (Impe. 14:26, 27) Lesa ta-aluka. Nga ca kuti twapondokela abaletungulula, ninshi tulepondokela Yehova!

17. Cinshi tufwile lyonse ukulaibukisha ukukuma ku batungulula mu cilonganino?

¹⁷ Umutumwa Paulo alanda pa fyo tufwile ukulaibukisha ukukuma ku baletungulula mu cilonganino ca Bwina Kristu. Alembele ukuti: “Umfwileni abalemutungulula no kubanakila, pantu balinda imyeo yenu nga bantu abakalubulula; pa kuti bacite ici ne nsansa, te mu bulanda iyo, pantu nga caba ifi kuti camubipila.” (Heb. 13:17) Kwena tufwile ukubombesha sana pa kutila tulebanakila no kubomfwila. Lelo muleibukisha ukuti ico tulefwaisha ca kuti twikalilile mu kutemwa kwa kwa Lesa. Bushe ici te cintu tufwile ukubikako sana amano pa kuti cicitike?

Beni aba Busaka mu Menso ya kwa Yehova

18. Mulandu nshi Yehova afwaila ifwe ukuba aba busaka?

¹⁸ Ica butatu icilanga ukuti twalitemwa Yehova ni co tulesha ukuba aba busaka mu menso yakwe. Abafyashi ilingi line balabombesha nga nshi pa kuti fye abana babo balemoneka aba busaka. Mulandu nshi? Umulandu umo wa kuti, ukuba uwa busaka kulalenga umwana ukuba no bumi ubusuma. E lyo kabili umwana wa busaka alaleta umucinshi ku lupwa lwakwe no kulanga ukuti abafyashi bakwe balimutemwa kabili balamubikako amano. Iyo ine milandu e yo Yehova afwaila ifwe ukuba no busaka. Alishiba ukuti ukuba no busaka kusuma ku bumi bwesu. Alishiba no kuti nga twaba no busaka tukaleta umucinshi pali ena, Shifwe wa ku muulu. Ici calicindama nga nshi, pantu abantu kuti bafwaya ukubombela Lesa wesu ilyo bamona ukuti twalipusanako ku bantu bambi muli cino calo cakowela.

19. Twaishiba shani ukuti ubusaka bwalicindama?

¹⁹ Ni muli finshi tufwile ukuba aba busaka? Kwena, ni muli fyonse fye. Muli Israele wa pa kale, Yehova alyebele abantu bakwe ukwabula no kupita mu mbali ukuti balekabila ukuba aba busaka. (Lebi 15:31) Amafunde ya kwa Mose yalandile pa fintu fyalekanalekana pamo nga ifya kupoosa ubusali bwa bantu, ifya kusamfya ifipe, ukusamba amaboko, amakasa, no kucapa ifya kufwala. (Ukufu. 30:17-21; Lebi 11:32; Impe. 19:17-20; Amala. 23:13, 14) Abena Israele balyebelwe ukuti Lesa wabo, Yehova, wa mushilo—e kutila wa ‘busaka,’ ‘alisanguluka,’ kabili ‘takowela.’ Ababomfi ba kwa Lesa wa mushilo na bo bene bafwile ukuba aba mushilo.—Belengeni Ubwina Lebi 11:44, 45.

20. Ni muli finshi tufwile ukutwalilila ukuba aba busaka?

²⁰ Kanshi tufwile ukuba aba busaka, mu kati na ku nse. Tulesha ukulatontonkanya fye pa fintu ifisuma. Lyonse tukonka amafunde ya kwa Yehova aya kuba abasanguluka, te mulandu ne fyo aba mu calo bapenene ku bulalelale. Ne cacindamisha ca kuti, tufwaisha ukuti ukupepa kwesu kuleba ukwa busaka, kanshi tulataluka ku kupepa kwa bufi ukuli konse ukwingakowesha ukupepa kwesu. Lyonse twibukisha ukusoka kwa kwa Lesa ukwalembwa pali Esaya 52:11 apatila: “Alukeni, alukeni, fumenimo, mwi-ikatako ku cishasanguluka; fumeni muli ena, isungeni aba busaka.” Pali lelo, tulaba aba busaka mu fya mapepo pa kukaana fye no kwikata ifintu ifyo Shifwe wa ku muulu amona ukuti fyalikowela. E mulandu wine kanshi, tukaanina no kusefyako inshiku nkulu sha mapepo na maholide ayo abengi batemwa ukusefya pali lelo. Ca cine ukuti, mu calo icileya cilekowelako fye muli fyonse, tacayanguka ukuba aba busaka. Lelo abantu ba kwa Yehova balesha sana ukuba aba busaka, pantu ukucite fyo kulabafwa ukwikalilila mu kutemwa kwa kwa Lesa.

21. Kuti twaikalilila shani mu kutemwa kwa kwa Lesa?

²¹ Yehova afwaya ifwe ukwikalilila mu kutemwa kwakwe umuyayaya. Lelo na ifwe bene bonse tufwile umo umo ukushininkisha ukuti tulebombesha ukwikalilila mu kutemwa kwa kwa Lesa. Kuti twacite ici nga tulekonka ica kumwenako ca kwa Yesu no kulanga ukuti twalitemwa Yehova pa kukonka amafunde yakwe. Nga twacite ifyo, tukashininkisha ukuti takuli nangu cimo ‘icikatupaatulako ku kutemwa kwa kwa Lesa ukwaba muli Kristu Yesu Shikulwifwe.’—Rom. 8:38, 39.

Bushe Muleibukisha?

• Kampingu yesu kuti yatwafwa shani ukwikalilila mu kutemwa kwa kwa Lesa?

• Mulandu nshi tufwile ukutemenwa fye abantu abo Yehova atemwa?

• Mulandu nshi cacindamina ukucindika abaletungulula?

• Bushe ubusaka bwacindama shani ku bantu ba kwa Lesa?

[Akabokoshi ne Cikope pe bula 20]

ICITABO ICITUSAMBILISHA IMIBELE ISUMA

Pa kulongana kwa citungu ukwa mu 2008, icitabo ca mabula 224 ica mutwe wa kuti “Ikalilileni mu Kutemwa kwa kwa Lesa” califumine. Cinshi balembeele ici citabo? Calembelwa ukwafwa Abena Kristu ukwishiba amafunde ya kwa Yehova no kuyatemwa. Cilanda sana pa mibele Abena Kristu balingile ukukwata. Nga tulepoosako sana amano pa kusambilila icitabo ca kuti “Ikalilileni mu Kutemwa kwa kwa Lesa,” e lyo tukashininkisha ukuti mu kukonka amafunde ya kwa Yehova mulafuma ifisuma no kuti mukafuma umweo wa muyayaya.

Umulandu uukalamba balembela ici citabo kutwafwa ukwishiba ukuti ukuba ne cumfwila kuli Yehova taca-afya, lelo ukumfwila Yehova ni nshila tulangilamo ifyo twamutemwa. Kanshi ici citabo cikalenga tukaipushe ukuti, ‘Cinshi cinenga ukulaumfwila Yehova?’

Ilingi icilenga bamo ukulufyanya no kuleka ukutemwa Yehova mulandu wa kuti nabacitapo cimo icabipa, te pa mulandu wa kuti tabatemenwe ifyo balesambilila. Kanshi calicindama ukukosha ukutemwa twatemwa amafunde ya kwa Yehova na mashiwi yakwe ayashaluka ayatutungulula cila bushiku! Tulesubila ukuti ici citabo icipya cikaafwa impanga sha kwa Yehova mwi sonde fye lyonse ukupampamina pa kucita ifisuma, pa kuti Satana akashininwe ukuti wa bufi, ne cacindamisha pali fyonse cikatwafwa ukwikalilila mu kutemwa kwa kwa Lesa!—Yuda 21.

[Icikope pe bula 18]

“Nga mwakonka amafunde yandi, mukekala mu kutemwa kwandi, ifyo na ine nkonka amafunde ya kwa Tata no kwikala mu kutemwa kwakwe”