21, 22. (a) Mulandu nshi cingasoselwa ukuti ifyo Yehova afwaya ukuti tucite tafyaba cisendo? (b) Bushe na kuba, abantu bapatikisha shani Yehova ukubabombela?

²¹ Ilyo asosa ati, “Nshakulengele ukumombela ku ca buunga, nangu kukulengo kucucutika kuli libani,” Yehova taletila ukupeela amalambo na libani (ifyasanshiwa mu cushi ce fungo ica mushilo) tafilekabilwa. Na kuba, ifi fyaba lubali lwacindama ulwa kupepa kwa cine ifyalefwaikwa mu cipingo ce Funde.

Aba bena Israele balilekelesha ukubomfya ifi fintu ilyo balepyungila pe tempele. Lelo bushe ukubomfye fi fintu ifyalekabilwa kwali cisendo? Awe nakalya! Amafunde ya kwa Yehova yalyanguka ilyo twayalinganya ku ya balesa ba bufi. Ku ca kumwenako, lesa wa bufi Moleke alepinda ukupeelwa amalambo ya bana, icintu ico Yehova tabala afwaya!—Amalango 30:11; Mika 6:3, 4, 8.