Umwa Kufisama ku Mwela

MU MPILI sha alpine isha ku Bulaya, kuti mwasanga ifimenwa beta ati alpine rose. Ifi fimenwa fya alpine rose ifishilepa sana ilingi fikula mu fimpusa pa kuti ficingililwe ku mwela upita apasansuka. Uyu mwela uushinashako kuti walofya ifimenwa fya alpine pantu ulaleta impepo, ulomya umwela no mushili, no kushuula imishila ya ifi fimenwa.

Ifi fimenwa fya alpine rose ilingi filapusuka kuli uyu mwela wa bonaushi pantu fipeka mu milale ya fimabwe. Nangu ca kuti muli ishi ncende tamuba sana umushili, umu mu milale ya fimabwe mwaba bucingo ku fimenwa ku mwela kabili mulenga ifimenwa ukusunga amenshi. Nangu tafimoneka pa nshita ikalamba mu mwaka, mu lusuba amaluba ya kashika aya ifi fimenwa fya alpine rose yalayemfya impili.

Kasesema Esaya alondolwele ukuti “bacilolo” bali no kusontwa kuli Lesa, kabili bali no kuba “umwa kufisama ku mwela.” (Esaya 32:1, 2) Ku butungulushi bwa Mfumu, Kristu Yesu, aba bacilolo ba ku mupashi, nelyo bakangalila, bali no kuba nge fimabwe fyaiminina bwino, abashangila mu nshita sha mafya nelyo amacushi. Bali no kuba mwa kubelama mu nshita ya mafya no kwafwa abali no bwafya ku kucingilila amenshi yabo aya ku mupashi aya mu Cebo ca kwa Lesa.

Umwela wa kupakasa, ukufuupula, ukulwala kuti wanasha Umwina Kristu, ukulenga icitetekelo cakwe ukubwelela pa nshi nga tali uwacingililwa. Baeluda ba Bwina Kristu kuti bapayanya ubucingo ukupitila mu kukutikisha ku bwafya bwakwe, ukumufunda ifya mu Baibolo, no kumukoselesha nelyo ukumwafwa. Nge Mfumu yabo iyasontwa Kristu Yesu, bafwaya ukwafwa “abapaswa.” (Mateo 9:36) Kabili balafwaya ukwafwa abaonaulwa ku mwela wa fisambilisho fya bufi. (Abena Efese 4:14) Ubwafwilisho bwa musango yu pa nshita isuma kuti bwaba cintu icacindama icine cine.

Miriam alondolola ukuti: “Nalilungulushiwe sana inshita imo ilyo abali abanandi sana bafumine mu cilonganino, kabili pa nshita imo ine batata balilwele kuli bongobongo. Pa kuti mpwishe uku kupopomenwa, natendeke ukwishishanya no mwaume wa ku calo. Tapakokwele, natendeke ukumfwa ukuti tapali ifyo naba, naebele baeluda mu cilonganino ukuti nalafuma mu cine, apo nalishininkishe ukuti Yehova tengantemwa.

“Pali iyo nshita yakakala, eluda wa cililishi ancinkwileko pa lwa myaka iyo nabombele bupainiya bwa nshita yonse. Anjebele ukuti alekumbwa bucishinka bwandi, kabili anombele ukuti nsuminishe baeluda bangafwe, banenge ncetekele na kabili ukuti Yehova alintemwa. Ukwangwako kwabo no kutemwa pali ilya nshita yakakala fyali ngo ‘mwa kufisama’ kuli ine lintu umwela wa ku mupashi wampumine. Mu mweshi fye umo, naputwile kulya kwishishanya na ulya mwaume, kabili nalitwalilila ukwenda mu cine ukutula lilya.”

Baeluda balomfwa bwino nga bamona Abena Kristu banabo balelunduluka lwa ku mupashi, pa mulandu wa bucingo bapeelwa pa nshita iyene. Kabili umu “mwa kufisama” mutupeela icitontonshi ca bwafwilisho ubushaifulila ubwa ku mupashi ubo tukapeelwa mu Kuteka kwa Myaka Ikana Limo ukwa kwa Kristu.