-
Yehova Alipenda ‘ne Mishishi ya ku Mutwe Wenu’Ulupungu—2005 | August 1
-
-
6 Pa kwafwa abatumwa bakwe ukwishiba ico tabafwile kutiinina abantu, Yesu abapeele ifilangililo fibili. Atile: “Bushe inseba shibili tashishitwa ku kalikobili kamo akacepesha? Na lyo line takuli nangu lumo ulwingapona pa nshi ukwabula Shinwe ukwishiba. Lelo ne mishishi ya ku mitwe yenu yalipendwa yonse. E ico mwilatiina: Mwalicindama ukucila inseba ishingi.” (Mateo 10:29-31) Moneni ukuti Yesu pano atile nga twacetekela ukuti Yehova alasakamana umuntu fye onse, awe ninshi nangu tucule shani, te kuti tutiine iyo. Umutumwa Paulo alicetekele sana ukuti Yehova alamusakamana. Alembele ati: “Lesa nga ali kuli ifwe, nani engatulwisha? Uyo uushakeenye Umwana wakwe wine lelo apeele wene pa mulandu wa ifwe bonse, cinshi ico ku cikuuku ashingatupeelela ne fintu fyonse pamo nankwe?” (Abena Roma 8:31, 32) E ico kanshi, nangu mucule shani, cetekeleni ukuti Yehova alamusakamana, kulila fye mwatwalilila aba cishinka kuli ena. Mwalamona ukuti ico ca cine sana ilyo twalaishiba bwino bwino umwalola yalya mashiwi Yesu alandile ku batumwa bakwe.
Umutengo wa Luseba
7, 8. (a) Bushe inseba shalemonwa shani mu nshiku sha kwa Yesu? (b) Pali Mateo 10:29, cimoneka ukuti cinshi Yesu abomfeeshe ishiwi lya ciGriki ilya kuti akaluseba?
7 Ifilangililo fya kwa Yesu filasambilisha bwino sana ifyo Yehova asakamana umuntu onse uumubombela. Ica kubalilapo, tontonkanyeni pali filya Yesu alandile pa nseba. Ilyo Yesu aali pano calo, abantu balelya inseba, lelo pa mulandu wa kuti inseba shalelya sana imbuto mu mabala, abengi balishipatile. Shaliseekele ica kuti nga ni mu ndalama sha lelo kuti washita inseba shibili pa mutengo uunono sana. Nomba nga ukwete indalama ya kushitamo inseba shine, balakubikilapo no lwalenga busano, ulwa mbasela, kwati lwena lwa kutoola fye!—Luka 12:6.
8 Tontonkanyeni na pa bukulu bwa luseba. Nga kulinganya ku tuni tumbi, uluseba nangu lukule shani, luba ulunono sana. Na lyo line, ishiwi lya ciGriki ilyapilibulwa ukuti ‘inseba,’ pali Mateo 10:29, lyalola mu kuti utunseba. Yesu afwile alefwaya abatumwa ukutontonkanya pa kaluseba akapelako ubunono. Nga fintu icitabo cimo na co cilandapo, “Yesu pano alumbwile akoni akacepesha pa tuni tonse, lelo na pali uto twine utwacepesha alefwaya ukuti tutontonkanye pa kacepesha pali tonse!”
9. Cishinka nshi icacindama ico Yesu asambilishe mu cilangililo ca nseba?
9 Icilangililo ca kwa Yesu ica nseba cilatusambilisha icishinka cacindama: Ico abantu bamona kwati tacacindama, kuli Yehova Lesa calicindama. Yesu na kabili akoseshe icishinka ilyo atile uluseba nangu lumo “te kuti lupone pa nshi,” ukwabula Yehova ukwishiba.c Kanshi twaumfwa ico Yesu alelandapo. Nga Yehova Lesa aleshiba ifilecitika kuli kalya koni kacepesha kabili akashacindama, kuti afilwa shani ukusakamana umuntu uumubombela uulecula?
-
-
Yehova Alipenda ‘ne Mishishi ya ku Mutwe Wenu’Ulupungu—2005 | August 1
-
-
c Abasambilila bamo batila ukupona pa nshi ukwa luseba nakalimo takupilibula fye ukufwa kwa luseba. Batila nga twaumfwikisha amashiwi yaba pano mu ciGriki, kuti twatila yalanda na pali filya uluseba lwikala pa nshi ku kufwaya utwa kulya. Nga e fyo caba, ninshi Yesu pano aletila Lesa alasakamana uluseba na mu miliile ya luko iya cila bushiku, te kutila kano fye lwafwa e lyo aishiba.—Mateo 6:26.
-