Umulandu Yesu Abelele Kasambilisha Mukalamba

IMYAKA ukucila pali 2,000 iyapitapo, umwana waibela alifyelwe uwaishileba umuntu wakulisha uwabalile abako. Takwali uwaleikala muli ilya nshita uwakwete indeke nelyo motoka. Takwali ifintu pamo nga baTV na baredio.

Ulya mwana ainikwe ati Yesu. Aishileba umuntu uwakwatishe amano uwabalile abako pe sonde. Na kabili Yesu aishileba kasambilisha wawamisha. Alelondolola ifintu fyakosa mu nshila yalelenga fyaba ifyaanguka ukumfwa.

Yesu alesambilisha abantu konse uko abasanga. Alebasambilisha ku mbali ya mumana na mu maato. Alebasambilisha mu mayanda na lintu ali pa lwendo. Yesu takwete motoka, kabili taleendela muli basi nelyo mwi shitima. Yesu aleenda pa makasa konse uko aleya alesambilisha abantu.

Tulasambilila ifintu ifingi ku bantu bambi. Lelo kuti twasambilila ifintu fyacindamisha kuli Kasambilisha Mukalamba, Yesu. Amashiwi ya kwa Yesu yasangwa mu Baibolo. Lintu twaumfwa ayo mashiwi mu Baibolo, ciba kwati Yesu alelanda na ifwe.

Mulandu nshi Yesu abelele Kasambilisha Mukalamba? Umulandu umo wa kuti Yesu umwine na o alisambilishiwe. Kabili alishibe ifyo cacindama ukumfwa. Lelo Yesu aumfwile kuli ani? Nani wamusambilishe?— Ni Wishi. Kabili Wishi kwa Yesu ni Lesa.

Ilyo ashilaisa pe sonde ngo muntunse, Yesu aleikala ku muulu na Lesa. E co Yesu tali nga bantu bambi pantu takwali umuntu uwaikele ku muulu ilyo ashilafyalwa pe sonde. Ku muulu Yesu ali Mwana musuma, uwaleumfwa kuli Wishi. E ico Yesu alesambilisha abantu ifyo asambilile kuli Lesa. Kuti wapashanya Yesu nga uleumfwa kuli bawiso na banoko.

Umulandu umbi Yesu abelele Kasambilisha Mukalamba wa kuti alitemenwe abantu. Alefwaya ukwafwa abantu ukusambilila pali Lesa. Yesu alitemenwe abakalamba, lelo alitemenwe na baice. Kabili abaice baletemwa ukuba na Yesu pantu alelanda na bo no kumfwa kuli bene.

Bushiku bumo abafyashi bamo baletele abana babo kuli Yesu. Lelo abanankwe Yesu batontonkenye ukuti Kasambilisha Mukalamba takwete inshita ya kulanda na baice. E co balibatamfishe. Lelo cinshi Yesu alandile?— Yesu atile: “Lekeni abaice bese kuli ine, mwibakaanya.” Yesu alefwaya abaice ukwisa kuli wene. E co nangu alikwete sana amano no kuba umuntu wacindama, Yesu alekwata inshita ya kusambilisha abaice.—Marko 10:13, 14.

Bushe walishiba umulandu Yesu alesambilishisha abaice no kumfwa kuli bene? Umulandu umo wa kuti alefwaya ukubasansamusha pa kubeba pa lwa kwa Lesa, Wishi wa ku muulu. Bushe kuti wasansamusha shani abantu?— Ni pa kubeba ifintu ifyo wasambilila pali Lesa.

Inshita imo, Yesu abomfeshe umwana munono ukusambilisha Abanankwe isambililo lyacindama. Abuulile umwana munono no kumwimika pa kati ka basambi Bakwe, abali abakonshi Bakwe. Lyene Yesu alandile ati aba bakalamba bafwile ukwalula imibele yabo no kuba ngo yu mwaice.

Finshi Yesu alepilibula ilyo alandile fyo? Bushe walishiba ifyo umuntu umukalamba, nelyo umwana umukalamba, alingile ukuba ngo mwana umunono?— Umwana umunono taishiba ifintu ukucila umukalamba kabili alafwaya ukusambilila. E co Yesu alelanda ati abasambi bakwe bafwile ukuba abaicefya, filya abaice baba. Cine cine, bonse kuti twasambilila ifingi ku bantu bambi. Kabili bonse tufwile ukwishiba ukuti ifyo Yesu alesambilisha fyalicindama ukucila ifyo twaishiba.—Mateo 18:1-5.

Umulandu na umbi Yesu abelele Kasambilisha Mukalamba wa kuti alishibe ifya kulenga ifintu fyaumfwika bwino ku bantu. Alelondolola ifintu mu nshila yaanguka kabili iyaumfwika. Alandile pa fyuni na maluba ne fintu fimbi ifyaishibikwa ku kwafwa abantu ukumfwikisha ifintu pali Lesa.

Bushiku bumo ilyo Yesu ali ku lupili, abantu abengi baishile kuli wene. Yesu aikele pa nshi no kulanda ilyashi kuli bene nga fintu ulemona pano. Ili lyashi litwa ati Ilyashi lya pa Lupili. Atile: ‘Lolesheni pa fyuni fya mu muulu. Tafibyala. Tafisunga fya kulya mu mayanda. Lelo Lesa uwaba ku muulu alafiliisha. Bushe imwe tamwaficila apakalamba?’

Yesu alandile no kuti: ‘Lolekesheni amaluba ya mu mpanga. Yamena ukwabula ukubomba. Kabili moneni ifyo yayemba! Ne Mfumu ya cuma Solomone tayalefwala ifisuma nga aya maluba ya mu mpanga. E co nga ca kuti Lesa alasakamana amaluba, bushe takasakamane imwe?’—Mateo 6:25-33.

Bushe naumfwikisha isambililo Yesu alesambilisha?— Talefwaya ifwe tuleba no bulanda pantu tatwishibe ukwa kusanga ifya kulya nelyo ifya kufwala. Lesa alishiba ukuti tulafwaya ifi fintu fyonse. Yesu talelanda ati tatufwile ukubombela ifya kulya ne fya kufwala. Lelo alandile ati tufwile ukubika Lesa intanshi. Nga twacite fyo, Lesa akashininkisha ukuti natukwata ifya kulya ne fya kufwala. Bushe wasumine co?—

Ilyo Yesu apwishishe ukulanda, cinshi abantu batontonkenye?— Baibolo itila balipapile pa fyo alesambilisha. Baleumfwa bwino ukumfwa kuli wene. Ifyo alandile fyalengele abantu ukucita icisuma.—Mateo 7:28.

E co calicindama sana ukusambilila kuli Yesu. Bushe walishiba ifyo twingacite co?— Ifyebo fyakwe fyalilembwa mwi buuku. Bushe ilyo libuuku nshi?— Ni Baibolo wa Mushilo. Ici cilepilibula ukuti kuti twaumfwa kuli Yesu nga twapoosa amano ku fintu tubelenga mu Baibolo. Na kuba, Baibolo yalikwata ilyashi lisuma pa fyo Lesa umwine atwebele ukumfwa kuli Yesu. Natumone icacitike.

Bushiku bumo Yesu asendele abanankwe batatu ku lupili. Amashina yabo ni Petro, Yakobo, na Yohane. Tuli no kusambilila na fimbi pali aba baume ku ntanshi, apo aba bonse batatu bali banankwe sana. Lelo pali iyi nshita yaibela, icinso ca kwa Yesu catendeke ukubeeka. Kabili ifya kufwala fyakwe fyaishileba ngo lubuuto, nga fintu ulemona pano.

Pa numa ya ico, Yesu na banankwe baumfwile ishiwi ukufuma ku muulu. Lyatile: ‘Uyu e Mwana wandi uwatemwikwa, uo nasenamina; muumfweni.’ (Mateo 17:1-5) Bushe nawishiba uwalelanda?— Ni Lesa! Ni Lesa uwalandile ati bafwile ukumfwa ku Mwana wakwe.

Nga ifwe lelo? Bushe tukomfwila Lesa no kumfwa ku Mwana wakwe, Kasambilisha Mukalamba?— E fyo bonse tufwile ukucita. Bushe uleibukisha ifyo twingacite co?—

Kuti twaumfwa ku Mwana wa kwa Lesa pa kubelenga amalyashi ya mu Baibolo pa bumi bwakwe. Kasambilisha Mukalamba ali no kutweba ifintu ifingi ifisuma. Uli no kuipakisha ukusambilila ifi fintu ifyalembwa mu Baibolo. Kabili cikakuletela insansa nga waebako abanobe ifintu ifisuma ifyo usambilila.