Bushe Kuti Mwayasuka Ici Cipusho?

Cinshi amafuta ya cena cisuma ayo Maria abomfeshe yakosele umutengo?

Ilyo kwashele inshiku ishinono ukuti Yesu afwe, Maria, nkanshi ya kwa Lasaro, “aishile no musashi wa alabastere uwa mafuta ayanunke cisuma, aya nardi wine wine, ayaumo mutengo nga nshi,” kabili ayetulwilile pali Yesu. (Marko 14:3-5; Mateo 26:6, 7; Yohane 12:3-5) Marko na Yohane balembele ukuti aya mafuta yaleshitikwa pa ma denari 300, ne yi ndalama yalingene na malipilo ababomfi balepoka pa mwaka.

Bushe aya mafuta yakosele umutengo yalefuma kwi? Ifyo balepangila aya mafuta balandapo muli Baibolo, balefifumya ku kamuti akanono akakwata icena icisuma sana, akasangwa ku lupili beta ati Himalaya ulwabela ku Asia. Ilingi balesakanya aya mafuta yaumo mutengo na mafuta yambi ayashaweme sana, e lyo kwali na mafuta yambi yambi ayo balebepa abantu ukuti ya nardi. Lelo Marko na Yohane bonse balandile pali “nardi wine wine.” Apo yalya mafuta Maria abomfeshe yali ayaumo mutengo, yafwile yafumine ku India ukwalepele nga nshi.

Mulandu nshi Marko alembeele ukuti Maria “atobele umusashi wa alabastere”? Uyu musashi wa alabastere wali uunono sana ku mulomo, icalelenga balecilikapo bwino pa kuti icena ca mafuta tacifuminemo. Mu citabo citila Discoveries From the Time of Jesus, Alan millard alembele ukuti: “E mulandu wine cayangukiile ulya mwanakashi wali ne nsansa ukutoba [umulomo wa musashi] pa kuti icena cingafuma pa muku umo fye.” E calengele ‘ing’anda ukwisulamo icena cisuma ica mafuta.’ (Yohane 12:3) Ubu bwali bupe ubukalamba sana, lelo kwena bwalilingile. Mulandu nshi? Uyu mwanakashi aletasha Yesu pa kubuusha Lasaro ndume yakwe. Apa ninshi tapalakokola apo amubuushishe.—Yohane 11:32-45.

Bushe umusumba wa Yeriko wali fye umo nelyo yali ibili?

Mateo, Marko na Luka bonse balembele ukuti Yesu acitile icisungusho mupepi no musumba wa Yeriko. (Mateo 20:29-34; Marko 10:46-52; Luka 18:35-43) Mateo na Marko batila Yesu acitile ici cisungusho ilyo “alefuma” mu Yeriko. Nomba Luka ena aatila ni lintu Yesu “alepalamina” ku Yeriko.

Bushe pa nshita Yesu aali pe sonde, kwali umusumba umo fye uwa Yeriko nangu kwali ibili? Icitabo citila Bible Then & Now cilanda ukuti: “Lilya Yesu aali pe sonde, umusumba wa Yeriko umbi uupya walikuulilwe kabili apo baukuulile pali amakilomita 1.6 ukufuma pa musumba wa kale. Umusumba upya baukuulile ku kapinda ka ku kulyo aka musumba wa kale. Herode Mukalamba alikuulile isano muli ulya musumba uupya.” Ifyalanda icitabo citila Bible Then and Now, e fyo ne citabo ca Archaeology and Bible History cisosa, citila: “Ilyo Yesu ali pe sonde, imisumba ya Yeriko yali ibili. . . . Ukufuma mu musumba wa kale uwa baYuda ukufika mu musumba wa bena Roma, pali amakilomita 1.6.”

Kanshi Yesu nalimo acitile icisungusho ilyo alefuma mu musumba wa baYuda, nangu ilyo alepalamina ku musumba umbi uwa bena Roma. Kanshi twamona ukuti ukwishiba ifyo ifintu fyali pa nshita ifyebo fyalelembwa, kulatwafwa ukumfwikisha ifyebo ifingomfwika kwati filaipilika.

[Icikope pe bula 31]

Umusashi wa alabastere uwa mafuta ya cena cisuma

[Abatusuminishe]

© Réunion des Musées Nationaux/Art Resource, NY