Imbila Nsuma Ku Ba Nko Shonse

“Mukaba inte shandi . . . ukufika ku mpela ya pano isonde.”—IMILIMO 1:8.

 1. Ilyo tulesambilisha abantu ifya mu Baibolo, finshi tubikako amano, kabili cinshi tucitile fyo?

BAKAFUNDISHA bacenjela balabika amano ku fyebo balefunda umuntu, lelo na kabili balabika amano na ku musango balefundilamo umuntu ifyo fyebo. E fyo na ifwe tucita ilyo tulesambilisha abantu icine ca mu Baibolo. Tubika amano ku fyebo tulesambilisha abantu na ku musango tulesambilishishamo umuntu ifyo fyebo. Ubukombe bwesu ubwa mbila nsuma ya Bufumu bwa kwa Lesa, bwena ni bulya bwine, lelo kuti twayalula umusango wa fyebo ukulingana na bantu tuleshimikila. Cinshi tucitile fyo? Pantu tufwaya ukushimikila abantu abengi sana.

 2. Nani tupashanya nga tulealula ifya kushimikila ukulingana na bantu tulelandako?

² Nga tuleshimikila abantu mu musango wa kuti batemwa ukumfwa ico tulelanda, ninshi tulepashanya ababomfi ba kwa Lesa aba kale. Ica kumwenako fye, tontonkanyeni pa mutumwa Paulo. Atile: “Ku baYuda naishileba ngo muYuda . . . Ku bashaba na mafunde naishileba ngo ushaba na mafunde, . . . Ku banaka naishileba uwanaka, ukuti nonke abanaka. Nimba fyonse ku ba misango yonse, ukuti mu nshila yonse mpususheko bamo.” (1 Abena Korinti 9:19-23) Paulo aleshimikila abengi pantu aleyalula ifya kushimikila ukulingana na bantu alelandako. Na ifwe bene tukashimikila abantu abengi imbila nsuma, nga tuleishiba ifili abantu tulelandako no kulanda ifyo bengatemwa ukumfwa.

Ku “Mpela sha Pano Isonde”

 3. (a) Bwafya nshi twakwata mu mulimo wesu uwa kushimikila? (b) Amashiwi ya pali Esaya 45:22 yalefikilishiwa shani pali lelo?

³ Ubwafya bukalamba ubwabako ku bashimikila imbila nsuma, bwa kufika mu ncende shonse, ukushimikila “pano isonde ponse.” (Mateo 24:14) Muli ba 1900, ababomfi ba kwa Yehova abengi bali-ipeeleshe ukuya mu kushimikila mu fyalo umushali nangu bamo aba kushimikila abantu imbila nsuma. Cinshi cacitike? Abatendeke ukupepa ku Nte sha kwa Yehova mwi sonde lyonse balifulile nga nshi. Pa kutendeka kwa ba 1900, imbila nsuma yaleshimikilwa mu fyalo ifinono sana pano isonde, lelo pali ino nshita Inte sha kwa Yehova balebomba uyu mulimo mu fyalo 235! Cine cine, imbila nsuma ya Bufumu ilebilwa ukufika ku “mpela sha pano isonde.”—Esaya 45:22.

4, 5. (a) Ni bani babombako sana umulimo wa kushimikila imbila nsuma? (b) Finshi aba mu maofesi yamo yamo aya Nte sha kwa Yehova balandile pali bamunyinefwe ne nkashi abafuma ku fyalo fimbi?

⁴ Finshi fyalenga ukuti bakapepa bafule fi? Fingi. Bamishonari abasambilishiwa kwi Sukulu lya Baibolo Ilya Gileadi Ilya Watchtower, na mu myaka ya nomba line, abaume ukucila pali 20,000 abapita mu Sukulu lya Kukansha Ilya Butumikishi, bonse aba, balilenga umulimo ukuya pa ntanshi. Inte sha kwa Yehova bambi na bo balikuukila ku fyalo ukukabilwa aba kushimikila Ubufumu abengi. Abena Kristu ba musango yo bonse abaipeelesha, abaume na banakashi, abaice na bakalamba, abashimbe na baupana, balilenga ukuti imbila nsuma ya Bufumu ishimikilwe mwi sonde lyonse. (Amalumbo 110:3; Abena Roma 10:18) Awe mwandini aba bantu tulabatasha nga nshi. Umfweni ifyo aba mu maofesi yamo yamo aya Nte sha kwa Yehova balembele pali bamunyinefwe ne nkashi abafuma ku fyalo fimbi ababombela mu fifulo umukabilwa aba kushimikila abengi.

⁵ Aba ku Ecuador batile: “Aba bamunyinefwe batemwikwa e batungulula umulimo wa kushimikila mu fifulo fyabela ukutali sana, balapanga ifilonganino ifipya, kabili balafwa bamunyinefwe ne nkashi ukulunduluka mu filonganino.” Aba ku Dominican Republic batile: “Awe mwandini bamunyinefwe ne nkashi abengi abaisa mu kubombela kuno nga bati baye ku mwabo, ifilonganino ifingi kuti fyabulisha sana bakabomba. Ala lipaalo ukuba na bo kuno.” Aba ku calo cimo icabela ku kabanga ka Bulaya batile: “Mu filonganino ifingi ifya muno calo cesu, bankashi balifula sana ukucila bamunyina. (Amalumbo 68:11) Na kabili, bankashi bene aba, abengi bapya mu cine, kanshi bapainiya abashimbe abaisa kuno balesambilisha sana bankashi banabo ifya kubomba mu mulimo wa mwi bala. Awe mwandini baletwafwa!” Bushe na imwe kuti mwatemwa ukuya mu kubombela ku calo cimbi?a—Imilimo 16:9, 10.

“Abantu Ikumi Aba mu Nko sha Ndimi Shonse”

 6. Bushe Sekaria 8:23 alanga shani ukuti kukaba no bwafya bwa ndimi mu mulimo wa kushimikila?

⁶ Ubwafya na bumbi ubukalamba bwa kuti abantu pano isonde balanda indimi ishingi sana. Icebo ca kwa Lesa casobele ukuti: “Mu nshiku isho e mo abantu ikumi aba mu nko sha ndimi shonse bakekata ku cisempe ca muYuda umo, no kutila, Tuleya na imwe, pantu natuumfwo kuti muli na Lesa.” (Sekaria 8:23) Ukufikilishiwa kwa muno nshiku ukwa uku kusesema, abantu ikumi, libumba likalamba, ilyalandilwepo mu kusesema kwa pa Ukusokolola 7:9. Ukusesema kwa kwa Sekaria kwatile “abantu ikumi” bakafuma mu nko shonse, lelo moneni ukuti atile abo bantu bakafuma “mu nko sha ndimi shonse.” Bushe ico cintu cacindama ica muli uku kusesema, na co calicitika? Ee, calicitika.

 7. Fipendo nshi fimo fimo ifilelanga ukuti imbila nsuma yalifika ku bantu ba “ndimi shonse”?

⁷ Moneni ifipendo fimo fimo. Imyaka yapita 50, impapulo shesu shali mu ndimi 90. Pali lelo, shaba mu ndimi ukucila pali 400. “Umusha wa cishinka kabili uwashilimuka” alibombesha ukulemba impapulo na mu ndimi shimo ishilandwa na bantu abanono fye. (Mateo 24:45) Ica kumwenako fye, impapulo sha Baibolo nomba shilalembwa mu lulimi lwa Greenlandic (ululandwa na bantu 47,000), ululimi lwa Palauan (ululandwa na bantu 15,000), no lwa Yapese (ululandwa na bantu nakalimo fye 7,000).

‘Umwinshi Uukalamba uwa Kubombeshamo’

8, 9. Cinshi calenga ukuti ‘umwinshi uukalamba uwa kubombeshamo’ wisuke, kabili cinshi Inte sha kwa Yehova abengi balecita?

⁸ Lelo kwena, nakalimo muno nshiku tatukabila no kuya ku calo cimbi pa kuti tushimikile imbila nsuma ku balanda ululimi lumbi. Ino myaka, kwaba imbutushi e lyo na bantu abengi abalanda indimi shimbi abakuukila mu fyalo ifikankaala no kupanga ubwikashi bwa balanda indimi ishingi isha ku fyalo fimbi. Ica kumwenako fye, mu musumba wa Paris, ku France, mulandwa indimi nakalimo 100. Mu musumba wa Toronto, ku Canada, mulandwa indimi nakalimo 125; mu London, ku England, mwena mulandwa indimi ukucila pali 300! Ukufula kwa musango yu ukwa bantu bafuma ku fyalo fimbi abekala mu fifulo ifingi umubombela ifilonganino, kwalilenga ‘umwinshi uukalamba uwa kubombeshamo,’ ukwisuka, e kuti ishuko lya kushimikila imbila nsuma ku ba nko shonse.—1 Abena Korinti 16:9.

⁹ Pa kucefyanyako ubu bwafya, Inte sha kwa Yehova abengi na bo balesambilila indimi shimbi. Kwena abengi balacula sana pa kuti fye beshibe ukulanda ululimi lumbi; lelo ubusuma basangamo bwingi, pantu balalenga abafuma ku fyalo fimbi pamo ne mbutushi ukusambilila icine ca mu Cebo ca kwa Lesa. Nomba line, mu calo cimo ica ku masamba ya Bulaya, nakalimo amapesenti 40 aya bantu babatishiwe pa kulongana kwa citungu, bantu bafuma ku fyalo fimbi.

10. Bushe mubomfya shani akatabo ka Good News for People of All Nations (Imbila Nsuma ku ba Nko Shonse)? (Moneni umukululo uleti “Ifyaba mu katabo ka Good News for People of All Nations,” pe bula 26.)

¹⁰ Kwena, nakalimo fwe bengi te kuti tusambilile ululimi lwa ku calo cimbi. Lelo, na ifwe kuti twayafwako abalanda indimi shimbi pa kubomfya bwino akatabo kafumine nomba line aka Good News for People of All Nations (Imbila Nsuma ku ba Nko Shonse),b akakwata ubukombe bwa mu Baibolo ubusuma sana mu ndimi ishingi. (Yohane 4:37) Bushe mulabomfya aka katabo ilyo muleshimikila?

Abantu nga Tabalefwaya Ukumfwe Mbila Nsuma

11. Bwafya nshi na bumbi tulekwata mu fifulo fimo?

¹¹ Ilyo ukusonga kwa kwa Satana kuleya kuleluma pano isonde, kuli ubwafya na bumbi ubukalamba ubo tulesanga pa kushimikila imbila nsuma, ubwafya bwa kuti mu fifulo fimo, abantu tabafwaya ukumfwa imbila nsuma. Kwena, tatupapa sana pali ici, pantu Yesu umwine e wasobele ukuti e fyo cikaba. Ilyo alelanda pa nshiku tulimo, atile: ‘Ukutemwa kwa bengi kukafubaalila.’ (Mateo 24:12) Na cine, abengi shino nshiku tabasumina muli Lesa kabili tabacindika na Baibolo yine. (2 Petro 3:3, 4) Kanshi mu ncende shimo pano isonde, banono fye abasumina ukuba abasambi ba kwa Kristu. Lelo, bamunyinefwe ne nkashi Abena Kristu abatwalilila ukubombesha mu fifulo fya musango yo, tabacucutikila apa fye iyo. (AbaHebere 6:10) Nga cinshi twalandile fyo? Tontonkanyeni pali ifi.

12. Fintu nshi fibili ifyo tubomba ilyo tuleshimikila?

¹² Ilandwe lya kwa Mateo lilanda pa fintu fyacindama fibili ifibombwa ilyo tuleshimikila. Cimo ca kuti ‘tulalenga aba nko shonse ukuba abasambi.’ (Mateo 28:19) Cimbi na co ca kuti, ubukombe bwa Bufumu ubo tushimikila buba “bunte” ku bantu. (Mateo 24:14) Ifi fyonse fibili fyalicindama, lelo ica bubili kuti cawama sana ukulandapo. Mulandu nshi?

13, 14. (a) Cinshi cimo icacindama mu cishibilo cabamo ifingi ica kubapo kwa kwa Yesu? (b) Cinshi tufwile ukwibukisha, sana sana nga tubombela mu cifulo umo abantu bashifwaya sana ukumfwa imbila nsuma?

¹³ Kalemba wa Baibolo Mateo atweba ukuti abasambi baipwishe Yesu ukuti: “Cinshi cikaba icishibilo ca kubapo kwenu ne ca mpela ya bwikashi?” (Mateo 24:3) Pa kwasuka, Yesu atile icikalamba cimo muli cilya cishibilo cikaba kubombwa kwa mulimo wa kushimikila mwi sonde lyonse. Bushe alelanda pa kupanga abasambi? Awe iyo. Atile: ‘Imbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.’ (Mateo 24:14) Kanshi Yesu atile umulimo wine fye uwa kushimikila, walicindama muli cilya cishibilo.

¹⁴ Kanshi ilyo tuleshimikila abantu imbila nsuma ya Bufumu, natuleibukisha ukuti nangu ca kutila limo tatupanga abasambi, lyonse fye ilyo tuleshimikila ninshi tulepeelo “bunte” kuli bena. Nangu bakaane ukumfwa, ukwishiba kwena ninshi nabeshiba ico tulecita, ifwe ninshi natubomba umulimo wa kufishapo ukusesema kwa kwa Yesu. (Esaya 52:7; Ukusokolola 14:6, 7) Jordy, Inte ya kwa Yehova umulumendo uwa ku masamba ya Bulaya, atile: “Cilandetela sana insansa ukwishiba ukuti Yehova alebomfyako na ine ukufishapo ukusesema kwa pali Mateo 24:14.” (2 Abena Korinti 2:15-17) Na imwe bene mufwile mulomfwako nga filya Jordy omfwa.

Ilyo Baletukaanya Ukubila Imbila Nsuma

15. (a) Bushe Yesu asokele abasambi bakwe ukuti cikaba shani kuli bena? (b) Cinshi citukosha ukushimikila nangu batukaanye?

¹⁵ Ulupato no kukaanya e bwafya na bumbi ubukalamba ubulenga ukuti tulefilwa ukubomba bwino umulimo wa kushimikila abantu imbila nsuma ya Bufumu. Yesu asokele abakonshi bakwe ukuti: “Mukaba abapatwa ku nko shonse pa mulandu we shina lyandi.” (Mateo 24:9) Ukupala Abena Kristu ba kubalilapo, abakonshi ba kwa Yesu aba muno nshiku balipatwa, balabakaanya, kabili balabacusha. (Imilimo 5:17, 18, 40; 2 Timote 3:12; Ukusokolola 12:12, 17) Fino tulelanda, mu fyalo fimo balilesha Inte sha kwa Yehova ukushimikila no kulongana. Na lyo line, ku mulandu wa kuti ba cumfwila kuli Lesa, Abena Kristu ba cine muli ifyo fyalo balitwalilila ukushimikila abantu imbila nsuma ya Bufumu. (Amose 3:8; Imilimo 5:29; 1 Petro 2:21) Cinshi cilenga aba muli ifyo fyalo, pamo ne Nte sha kwa Yehova mwi sonde lyonse ukutwalilila nangu babakaanye? Yehova alabakosha ku mupashi wakwe uwa mushilo.—Sekaria 4:6; Abena Efese 3:16; 2 Timote 4:17.

16. Bushe Yesu alangile shani ukuti umupashi wa kwa Lesa ulabomba sana mu mulimo wa kubila imbila nsuma?

¹⁶ Yesu alangile ukuti umupashi wa mushilo uwa kwa Lesa ulabomba sana mu mulimo wa kubila imbila nsuma ilyo aebele abakonshi bakwe ukuti: “Mukapokelela amaka ilyo umupashi wa mushilo ukesa pali imwe, kabili mukaba inte shandi . . . ukufika ku mpela ya pano isonde.” (Imilimo 1:8; Ukusokolola 22:17) Mukwai moneni ifyo ifintu fitanteme pali ili lembo. Ica kubalilapo, abasambi bapokelele umupashi wa mushilo, lyena batendeke umulimo wa kushimikila ukufika ku mpela ya pano isonde. Mupashi wa mushilo uwa kwa Lesa fye epela, e walengele ukuti bakose no kutwalilila ukupeelo “bunte ku nko shonse.” (Mateo 24:13, 14; Esaya 61:1, 2) E mulandu wine Yesu alandiile no kuti umupashi wa mushilo ni “kaafwa.” (Yohane 15:26) Atile umupashi wa kwa Lesa wali no kusambilisha abasambi bakwe no kubatungulula.—Yohane 14:16, 26; 16:13.

17. Bushe umupashi wa mushilo utwafwa shani ilyo baletukaanya ukubila?

¹⁷ Bushe umupashi wa kwa Lesa utwafwa shani pali lelo ilyo baletukaanya icibi mu mulimo wesu uwa kushimikila abantu imbila nsuma? Ulatukosha no kufulunganya amapange ya baletucusha. Ica kumwenako fye, tontonkanyeni pa cacitike ku Mfumu Shauli.

Umupashi wa kwa Lesa Wafulunganya Amapange Yakwe

18. (a) Bushe Shauli aishilebipa shani? (b) Bushe Shauli alelunga shani Davidi?

¹⁸ Pa kutendeka, Shauli uwali imfumu ya kubalilapo iya Israele, aali fye umusuma, lelo, mu kuya kwa nshita, aishilebulwa icumfwila kuli Yehova. (1 Samwele 10:1, 24; 11:14, 15; 15:17-23) E fyo no mupashi wa kwa Lesa wafumine pali Shauli. Awe Shauli apatile Davidi ica kuti alefwaya no kumwipaya, pantu e wasubilwe ukumupyana pa bufumu kabili e o umupashi wa kwa Lesa watendeke ukutungilila. (1 Samwele 16:1, 13, 14) Shauli ena alemona kwati kuti ayangalapo fye ukwipaya Davidi. Na kuba, Davidi takwete ne canso, akwete fye icilimba ca kulishishako inyimbo, lelo Shauli aali ne fumo mu minwe yakwe. Awe bushiku bumo ilyo Davidi alelisha icilimba cakwe, “Shauli atengeleshepo ifumo; pantu atile, Ndepusha muli Davidi, no kulasa mu cibumba. Lelo Davidi aleuka afuma pa cinso cakwe imiku ibili.” (1 Samwele 18:10, 11) Lyene Shauli aumfwile ifyalandile umwana wakwe Yonatani, cibusa wa kwa Davidi, kabili alapile ati: “Umweo wa kwa Yehova, [Davidi] takepaiwe!” Lelo, Shauli na kabili “afwaile ukupushe fumo muli Davidi no kulasa mu cibumba; lelo Davidi afuntwike ku cinso ca kwa Shauli, na o alashile ifumo mu cibumba.” Davidi alifulumwike, lelo Shauli alimusupile. Pali ilya nshita ya bwafya bwine bwine, umupashi wa kwa Lesa wafulungenye amapange ya kwa Shauli. Bushe cali shani?—1 Samwele 19:6, 10.

19. Bushe umupashi wa kwa Lesa wacingilile shani Davidi?

¹⁹ Davidi afulumukile kuli kasesema Samwele, lelo Shauli atumineko abantu bakwe ku kumwikata. Ilyo bafikile uko afiseme, “umupashi wa kwa Lesa waishile pa nkombe sha kwa Shauli, na sho shasesema.” Baobelwe no mupashi wa kwa Lesa ica kuti balilabile no kuti baile mu kwikata Davidi. Shauli atumineko inkombe na shimbi imiku na imbi ibili, na bo bene balyobelwe no mupashi wa kwa Lesa no kulaba ico baile mu kucita kulya. Pa kulekelesha, Imfumu Shauli iyine yaile kuli Davidi, lelo na yo yalifililwe ukumwikata pa mulandu wa maka ya mupashi wa kwa Lesa. Na kuba, umupashi wa mushilo walengele Shauli ukwikala nge cite “akasuba kalya konse no bushiku bulya bonse,” pa kuti Davidi akwate nshita ya kufulumuka.—1 Samwele 19:20-24.

20. Cinshi twingasambilila kuli filya Shauli alelunga Davidi?

²⁰ Ku lyashi lya kwa Shauli na Davidi, twasambililako cimo icingatukosha sana: Umupashi wa kwa Lesa nga wafulunganya amapange ya bacusha ababomfi bakwe, tapali nangu cimo ico bengatucita. (Amalumbo 46:11; 125:2) Yehova asalile Davidi ukube mfumu pali Israele. Takwali nangu umo uwali no kuleshe co. Muno nshiku, Yehova alilanda ukuti ‘imbila nsuma iyi ya bufumu ikashimikilwa.’ Takuli nangu umo uwingalesha uyu mulimo.—Imilimo 5:40, 42.

21. (a) Cinshi abalwani besu bamo muno nshiku bacita? (b) Cinshi tulesuubila ukucita?

²¹ Bashimapepo bamo na bapolitishani balatubepesha no kucita ulukaakala kuli ifwe pa kuti tuleke umulimo wesu. Lelo, filya fine Yehova acingilile Davidi no kumulenga ukutwalilila uwa cishinka, e fyo akacingilila na bantu bakwe muno nshiku. (Malaki 3:6) Na ifwe bene kanshi kuti twalanda na maka nga Davidi atuti: “Lesa e o natetekela, nshatiine; cinshi ico umuntunse engacita kuli ine?” (Amalumbo 56:11; 121:1-8; Abena Roma 8:31) Ilyo Yehova aletwafwa, natukose no kucimfya ubwafya bonse ubwingesa ilyo tulebomba umulimo twatumwa na Lesa uwa kubila imbila nsuma ya Bufumu ku ba nko shonse.

[Amafutunoti]

Bushe Muleibukisha?

• Cinshi twalwila ifya kushimikila ukulingana na bantu tulelandako?

• ‘Mwinshi nshi uukalamba uwa kubombeshamo’ uwaisuka ino myaka?

• Nga twatwalilila ukushimikila na mu fifulo umo abantu bashifwaya kumfwa imbila nsuma, ninshi cinshi tulebomba?

• Mulandu nshi umulwani nangu umo ashingalesesha umulimo wa kubila imbila nsuma ya Bufumu?

[Akabokoshi pe bula 22]

Muli uyu Mulimo Mwaliba Insansa Nga Nshi

“Ulupwa lwa nsansa kabili ululeipakisha ukubombela Yehova capamo.” Aya e mashiwi twingalanda pa lupwa lumo ulwafumine ku Spain ulwakuukila ku Bolivia mu kushimikila. Umulumendo wa pali iyi ng’anda aile ku Bolivia mu kwafwa bamunyinefwe ne nkashi abekala ukutali sana ukushaba icilonganino. Insansa akwete kulya shalengele abafyashi bakwe ukucincimuka sana ica kuti bwangu bwangu ulupwa lonse fye, apali na balumendo bane aba myaka ukufuma pali 14 ukufika ku 25, bonse baile ku kubombela kulya kwine. Abalumendo batatu nomba ni bapainiya, kabili ulya mulumendo uwabalilepo ukuya ku Bolivia, nomba line asangilwe ku Sukulu lya Kukansha Ilya Butumikishi.

BaAngelica, abali ne myaka 30 abafuma ku Canada ababombela ku kabanga ka Bulaya batila: “Ubwafya bwena bwingi. Lelo ndasansamuka ilyo ndesambilisha abantu ifya mu Baibolo. Na kabili, baNte abekala uko mombela balankoselesha sana, ilingi line balantasha pa fyo naipeelesha ukufuma ku mwesu, ukuya ku calo cabo mu kubombela pamo na bo.”

BaAnna na baLaura aba mu nda imo, abali ne myaka nakalimo 25 ukufika kuli 30, abena Amerika ababombela ku Dominican Republic batila: “Twaliculile sana pa kubelesha imikalile ya bantu ba kuno. Lelo, twalishipikishe no kutwalilila ukubomba, pali ino nshita abasambi besu aba Baibolo 7 balitendeka ukusangwa ku kulongana.” Aba bankashi balibombeshe ukuteyanya bwino ibumba lya bakasabankanya ba Bufumu mwi tauni umushaba icilonganino.

BaLaura, abalesenselela ku myaka 30, balibombela ku calo cimbi pa myaka ukucila pali ine. Batila: “Ne mwine fye nalyangusha imikalile. E calenga na bambi ukwishiba ukuti kanshi abantu bamo baitemenwa fye ukwangusha imikalile pa kuti babike amano ku kupepa, te kutila bonse abekala imikalile yayanguka ninshi bapiina awe. Ndatemwa sana ukwafwako bambi, sana sana abakashana, cilandetela sana insansa ica kuti ndalaba na ku bwafya bonse ubwa kubombela ku calo cimbi. Nangu umuntu anjebe ukuleka umulimo ukuya mu kucita ifya musango shani, kuti nakaana, Yehova nga atemwa, nkatwalilila ukubombela kuno kwine.”

[Akabokoshi ne Cikope pe bula 26]

Ifyaba mu Katabo ka Good News for People of All Nations (Imbila Nsuma ku ba Nko Shonse)

Mu katabo ka Good News for People of All Nations (Imbila Nsuma ku ba Nko Shonse) mwaba ubukombe pe bula limo ilituntulu mu ndimi 92. Ilyashi lyalembwa kwati ni mwe mulelanda no muntu. Kanshi ilyo umuntu mulelandako alebelenga, ciba kwati ni mwe mulelanda nankwe.

Mu kati ka nkupo ya katabo mwaba mapu wa calo conse. Bomfyeni uyu mapu ku kwishibana no muntu. Kuti mwasonta apabela icalo mwikalamo, kabili na o kuti amusontelela apabela icalo cakwe. Nga mwacite fyo, kuti mwalenga atemwa ukulanda na imwe kabili kuti amumona ngo muntu uwatemwa ukwishibana na bantu bambi.

Amashiwi ya kutendekelako yatweba ifyo tufwile ukucita pa kuti twafwe bwino abalanda ululimi lumbi. Mukwai belengeni ifi fyebo no kufyumfwikisha kabili citeni filya fine balandile, pantu kuti fyalenga abantu ukupusuka.

Umutande wa filimo ulelanga amashina ya ndimi pamo ne fishibilo fya lulimi lumo lumo. Ifi fishibilo fya kumwafwa ukulinganya na filya fishibilo fiba mu matrakiti nelyo mu mpapulo sha ndimi shimbi. Nga mwalolesha pali ifi fishibilo no kulinganya ku cishibilo cili mu lupapulo, ninshi mwaishiba ukutila kanshi ulo lupapulo lwa mu lulimi kampanda.

[Icikope]

Bushe mulabomfya aka katabo ilyo muleshimikila?

[Ifikope pe bula 23]

Impapulo shesu isha Baibolo nomba shaba mu ndimi ukucila pali 400

Ku GHANA

Ku LAPLAND (SWEDEN)

Ku PHILIPPINES

[Ifikope pe bula 24, 25]

Bushe kuti mwayabombako ukulekabilwa aba kubila Ubufumu abengi?

Ku ECUADOR

Ku DOMINICAN REPUBLIC