Bushe Kuti Mwa-asuka Ifi Fipusho?

Cinshi twingasambilila kuli filya umutumwa Petro aikele kuli kanyuka wa mpapa ilyo tabalamweba ukuya kuli Korneli?

▪ Ilyashi lyaba mwi buuku lya Imilimo lilanda ukuti Petro “aikele inshiku ishingi mu Yopa pamo na Simone, kanyuka wa mpapa,” uwakwete “ing’anda mu lulamba lwa bemba.” (Imilimo 9:43; 10:6) AbaYuda balisuulile abalenyuka impapa, balebamona ukuti bali abakowela. Ukulingana na mafunde ya baYuda, abalebomba umulimo wa kukusa ubusali balicindemepo ukucila abalenyuka impapa. Umulimo Simone alebomba walemulenga ukulaikata ifitumbi fya nama lyonse, ne ci calelenga ukuti lyonse fye aleba uwakowela. (Ubwina Lebi 5:2; 11:39) Ifyo bafwailisha pali ili lyashi filanga ukuti Simone nalimo alebomfya amenshi ya muli bemba pa kunyuka impapa, kabili afwile alenyukila ku nse ya musumba pantu “impapa shalenunka nga nshi.”

Te mulandu no mulimo Simone alebomba, Petro alikele nankwe. Ici cilanga ukuti nalimo Petro alisambilile kuli Yesu ukukanaba nga baYuda abasuulile abantu abo balemona ukuti tabali abasanguluka.—Mateo 9:11; Luka 7:36-50.

Bushe amashiwi Yesu alandile aya kuti “nausosa we mwine” yalola mwi?

▪ Ilyo shimapepo mukalamba Kayafa aebele Yesu ukuti ailandile nga ca kutila ali ni Kristu, Umwana wa kwa Lesa, Yesu ayaswike ukuti: “Nausosa we mwine.” (Mateo 26:63, 64) Bushe Yesu aloseshe mwi?

Yesu talesengauka ukwasuka icipusho Kayafa amwipwishe. Amashiwi ya kuti “nausosa we mwine” yafwile yali ni nsoselo ya baYuda iyalepilibula ukuti ifyo umuntu alandile fya cine. Ku ca kumwenako, mwi buuku lya Jerusalem Talmud ilyo balembele muli ba 300 C.E., balanda pa muYuda uo baipwishe nga ca kutila kasambilisha alifwile kabili ayaswike ukuti: “Nausosa.” Ukwasuka ifi kwalepilibula ukuti cine cine kasambilisha alifwile.

Yesu alishibe ukuti shimapepo mukalamba alikwete amaka ya kumulenga ukulapa ukuti alande icishinka. Yesu akaana ukwasuka nga camoneke kwati alikeene ukuti tali Kristu. Kanshi filya Yesu ayaswike shimapepo mukalamba ukuti “nausosa we mwine,” fyalepilibula ukuti ca cine ali ni Kristu. Ibuuku lya kwa Marko litila ilyo Yesu bamwipwishe kuli Kayafa ukuti ailandile nga ali ni Mesia, Yesu ayaswike ukwabula umwenso ukuti: “Nine.”—Marko 14:62; moneni na Mateo 26:25 na Marko 15:2.

[Icikope pe bula 18]

Umo banyukila impapa mu Fez, ku Morocco