Bushe Cisuma Ukulwa?

BUSHE walishibako bakalume abali bonse nelyo abakashana abaitakisha no kuyumfwa aba maka?— Bushe ulatemwa ukuba na bene? Nelyo bushe kuti watemwapo ukuba no muntu umusuma uufwaya umutende?— Kasambilisha Mukalamba alandile ati: “Balishuka abacito mutende; pantu baketwa abana ba kwa Lesa.”—Mateo 5:9.

Lelo inshita shimo abantu bambi bacita ifintu ifitukalifya. Bushe te ifyo?— E co kuti twayumfwa ukuti na ifwe twalabwekeshamo. Inshita imo ici calicitike ku basambi ba kwa Yesu lintu baleya na Yesu ku Yerusalemu. Leka nkushimikile ifyo cali.

Pa numa ya kwendako panono, Yesu atumine abasambi bakwe bamo ku mushi wa bena Samaria ukuyafwaya ukwa kulaala. Lelo abantu ba kulya tabalefwaya ukuti bekaleko, pantu abena Samaria bakwete imipepele imbi. Kabili tabalefwaya uuli onse uwaleya ku musumba wa Yerusalemu ku kupepa.

Nga ca kuti ico calicitike kuli iwe, nga wacitile shani? Bushe nga walifulilwe? Bushe nga wafwaile ukubakanda?— Ifi e fyo abasambi Yakobo na Yohane balefwaya ukucita. Baebele Yesu ati: “Bushe mutemenwe ukuti twebe umulilo ukupona mu muulu, no kuboca?” E mulandu wine Yesu abetile Abana ba Kubuluma kwa Mfula! Lelo Yesu abebele ukuti tacali bwino ukucite co ku bantu.—Luka 9:51-56; Marko 3:17.

Ca cine ukuti inshita shimo abantu kuti batucita icabipa. Abana bambi te kuti bafwaye tuleangala na bo amangalo. Kuti bakweba no kuti: “Tatulekufwaya pano.” Lintu ica musango yu cacitika, kuti catukalipa, bushe te ifyo? Kuti twafwaya ukubwekeshamo. Lelo bushe e fyo tufwile ukucita?—

Buula Baibolo yobe. Natukupukule pa Amapinda icipandwa 24, icikomo 29. Pano tubelenga ukuti: “Witila, Nge fyo acita kuli ine e fyo ndecita kuli wene, ndebwesesha kuli uyu muntu umwabele milimo yakwe.”

Bushe uletontonkanya ukuti ici cikomo cilepilibula finshi?— Cilepilibula ukuti tatufwile ukubwesesha ku bantu umwabela ifyo batucitila. Tatufwile ukucita icabipa ku muntu pantu fye alitucitile icabipa. Lelo ni shani nga ca kuti umuntu alefwaya alekubala? Kuti aesha ukukukalifya pa kukwita amashina ya musaalula. Kuti akuseka no kukweba ati watiina. Tutile akwita ati kuuwe. Cinshi ufwile ukucita? Bushe ufwile ukulwa?—

Na kabili natumone ifyo Baibolo ilanda. Kupukula pali Mateo icipandwa 5, ne cikomo 39. Palya Yesu alanda ati: “Mwikanya mubifi: uuntu akutobo lupi pe saya lya ku kulyo, pilibwilako ne libiye.” Bushe uletontonkanya Yesu alepilibula cinshi pa kulande fi? Bushe alelanda ati umuntu nga akuuma ikofi pe saya, ufwile ukumuleka akuuma na ku libiye?—

Iyo, te fyo Yesu alelandapo. Ulupi talwaba nge kofi. Lwaba ngo kusunka. Umuntu kuti atutoba ulupi nga aletubala. Alefwaya tukalipe. Kabili nga twakalipa no kumusunka na o, cinshi cicitika?— Napamo kuti twatampa no kulwa.

Lelo Yesu talefwaya abakonshi bakwe ukulalwa. E co alandile ati umuntu nga atutoba ulupi, tatufwile ukumubwekeshamo. Tatufwile ukukalipa no kutampa ukulwa. Nga twacite fyo, ninshi tulelanga ukuti tuli fye cimo cine na ulya muntu wacitendeka ulubuli.

Nga kwaba ubwafya, uletontonkanya icisuma ukucita cinshi?— Kufumapo. Uyo muntu umbi kuti akusunkamo imiku iingi. Lelo napamo alapelela apo pene. Lintu wafumapo, tacilepilibula ukuti tawakwata amaka. Cilepilibula ukuti walikwata amaka ya kukonka ifyalungama.

Lelo ni shani nga mwatendeka ukulwa e lyo wamuma no kumuma? Cinshi cingacitika?— Uyo wauma kuti ayaita bambi. Kuti bakucena ne nkonto nelyo umwele. E co, bushe nomba wamona umulandu Yesu tafwaila ifwe ukulwa?—

Cinshi tufwile ukucita lintu twamona abantu bambi balelwa? Bushe tufwile ukutungililapo umo pa balelwa?— Baibolo itweba icisuma ukucita. Kupukula pa Amapinda icipandwa 26, icikomo 17. Patila: “Uwayobwela pa lubuli ulushili lwakwe aba ngo wikate mbwa ku matwi.”

Cinshi cingacitika nga watinta amatwi ya mbwa? Imbwa kuti yaumfwa ubukali, kabili kuti yakubosa, bushe te ifyo? Imbwa nga ilelwisha ukuti uilekeko, elyo watintisha amatwi kuti yakalipa. Nga wailekako, napamo kuti ya kusuma no kukusuma. Lelo bushe kuti waiminina fye apo pene nautinta amatwi ya iko?—

E bwafya twingabamo nga twailunda mu lubuli lwa bantu bambi. Tatwingeshiba uwacibala umunankwe nelyo umulandu balelwila. Napamo umbi balemuma, lelo limbi ni pa mulandu wa kuti acibila umunankwe icintu. Nga twamwafwa, ninshi tuleafwa umupuupu. Bushe ico kuti caba bwino?

E co, cinshi ufwile ukucita lintu wamona abalelwa?— Nga ni pa sukulu, kuti wabutuka no kuyaeba bakafundisha. Kabili nga te pa sukulu, kuti waita banoko nelyo bawiso nelyo bakapokola. Na lintu abantu bambi balefwaya ukulwa, ifwe tufwile ukuba abacito mutende.

Abasambi ba cine aba kwa Yesu bacita apo bengapesha ukukanalwa. Muli iyi nshila tulanga ukuti twaliba aba maka ku kucita icalungama. Baibolo ilanda ati umusambi wa kwa Yesu ‘tafwile ukucito lubuli; lelo afwile ukuba uwa cikuuku kuli bonse.’—2 Timote 2:24.