Ukufwaisha Ukuba Abakankaala Mu Kubombela Lesa

UMUNTU pa kuti fye akwate ifyuma alabombesha no kuipusulako ifintu fimo. E fyo caba na ku kuba abakankaala mu kubombela Lesa. Yesu alikumisheko kuli ici ilyo atile: “Itutileni ifyuma mu muulu.” (Mateo 6:20) Ukuba abakankaala mu kubombela Lesa takwisa nga meno ya mu kanwa. Umuntu nga alaya ku calici te kutila ninshi mukankaala mu kubombela Lesa iyo. Caba nga filya tushingalanda ukuti umuntu uusungila indalama ku banki ninshi mukankaala. Nga tulefwaya ukuba cibusa wa kwa Lesa, tulefwaya no kukosa mu kupepa, kabili no kuba ne mibele iyo Lesa afwaya kano twabombesha, twakwata ne nshita, twalatontonkanya fye pali ico cine, no kuipusulako fimo.—Amapinda 2:1-6.

Bushe Kuti Mwakwata Fyonse Fibili?

Bushe umuntu kuti akwata fyonse fibili ifyuma fya kwa Lesa ne fyuma fya ku mubili? Nalimo kuti akwata, lelo kuti atunguluka fye muli cimo. Yesu atile: “Te kuti mubombele Lesa ne Fyuma.” (Mateo 6:24b) Mulandu nshi? Pantu ukufwaya ukuba umukankaala mu kubombela Lesa e lyo no kufwaya ukukwata ifyuma te kuti tuficite pa nshita imo ine. Tafyendelana iyo. E co Yesu ilyo talaeba abasambi bakwe ukuilonganikila ifyuma fya kwa Lesa, abebele ati: “Mwilaitutila ifyuma pano isonde.”—Mateo 6:19.

Cinshi cingacitika nga ca kuti umuntu asuula ifyo Yesu alandile kabili asalapo ukucita fyonse fibili? Yesu atile: “Takuli uwingabombela bashikulu babili; pantu kuti apatapo umo no kutemwa umbi, nalimo kuti aikuminisha kuli umo no kusuula umbi.” (Mateo 6:24a) Umuntu nga asalapo ukubombela Lesa no kufwaya ifyuma, lyena akalamona kwati ukubombela Lesa cisendo. Takalemubombela no mutima onse. Nga ali no bwafya, akalamona ifyuma kwati e fingapwisha amafya akwete ukucila ukucetekela Lesa. E fyo na Yesu alandile: “Ukuli icuma cobe, e kuba no mutima obe.”—Mateo 6:21.

Umwina Kristu umo na umo alingile ukutontonkanyapo sana pali uku kufunda kwa mu Baibolo ilyo talapingula uko afwile ukupoosa sana inshita no ko abika sana mano. Teti tutile Lesa takakande abafunushi ifi ashaeba Abena Kristu ubwingi bwa fyuma balingile ukupelelapo ukukwata. (1 Abena Korinti 6:9, 10) Abashumfwila ifyo Baibolo ifunda kabili abafwaisha ukuba ne fyuma tabapepa Lesa bwino kabili balacula ku mutima nga fintu tumwene. (Abena Galatia 6:7) Lelo, Yesu atile abaishiba ukuti bafwile ukwishiba ifya kwa Lesa bakaba ne nsansa. (Mateo 5:3) Cine cine Kabumba wesu no mwana wakwe balishiba ifingatuletela insansa!—Esaya 48:17, 18.

Ukusalapo Kwenu Ukusuma

Bushe mukasala Lesa nangu ifyuma? Kwena ca cine tulabomfya ifyuma fya ku mubili mu mikalile yesu. Paulo alembeele Timote muli kalata wakwe uwa kubalilapo ati: “Na cine umuntu nga tasakamana abantu bakwe, pali bufi aba mu ng’anda yakwe iine, ninshi nakaana icitetekelo kabili abo mubi ukucisha uushatetekela.” Paulo na kabili akonkomeshe Abena Kristu ukukanacetekela indalama, lelo ukucetekela Lesa no “kuba abakankaala mu milimo isuma.” (1 Timote 5:8; 6:17, 18) Bushe cinshi mukabikako amano? Cinshi mukafwaya ukulacita lyonse? Umulimo ukalamba pali ilya milimo isuma Paulo alandilepo waba kushimikila no kupanga abasambi uko Yesu aebele abasambi bakwe ukulabomba. (Mateo 28:19, 20) Ilyo Abena Kristu baitemenwa ukwangusha imikalile pa mulandu wa kuti balefwaya ukubombesha muli uyu mulimo usuma, ninshi ‘baleibakila abene umufula usuma uwa ku ntanshi’ mu calo cipya ica kwa Lesa. Napali ino nshita balasanga ifyo fyuma fya ku mupashi ukuti ‘fyaliwama ukucila golde!’—1 Timote 6:19; Amapinda 16:16; Abena Filipi 1:10.

Moneni ifyo cali kuli baEddie, abo balupwa lwabo babele Inte sha kwa Yehova ilyo bali abaice. Kwali inshita ulupwa lwabo lwalufishe ifipe fyonse ifyo bakwete, kabili tabakwete ne ng’anda nakalya. BaEddie bashimika ukutila: “Naletontonkanyapo lyonse ifyali no kucitika nga ca kuti tonse fye utuntu twesu twapwililila. Pali iyo nshita tatwakwete nangu kamo. Kabili bushe namwishiba icacitike? Takwali nangu cimo icabipa icacitike! Ukulya kwena twalelya, twalekwata ne fya kunwa ifyalowa, e lyo ne fya kufwala. Yehova alelenga twakwata ifyo twalekabila, kabili mu kuya kwa nshita twasukile twakwata ne fipe ifyalinga. Ici cacitike cansambilishe ukulaumfwila sana ico Yesu alaile pali Mateo 6:33, ica kuti nga tulefwaya lyonse intanshi Ubufumu bwa kwa Lesa, te kuti tusakamane nga ca kuti tatukwete ifipe fya ku mubili.” Pali lelo baEddie ni bakangalila benda aba nshita yonse, e lyo no kupa balyupa. Balikwata ifipe fya ku mubili fyonse ifyo bakabila. Ne cacindama sana ca kuti bakankaala mu kubombela Lesa.

Amapaalo Ayakalamba

Ifyuma tulonganikila mu muulu filekalilila, fyalipusana ne fya pano calo, ifyo abapupu bengeba. (Amapinda 23:4, 5; Mateo 6:20) Ca cine ukutila calyafya ukwishiba apo umuntu afikile mu kupepa Lesa. Tacayanguka ukumona apo umuntu afikile mu kutemwa Lesa, nga alamubombela ne nsansa, nangu nga alikwata icitetekelo. Lelo kuti twaishiba bwangu umuntu uuli ne fyuma. Nangu cibe fyo ubusuma bwaba mu kuba abakankaala mu kubombela Lesa bukalamba nga nshi. Nangu ca kutila abasambi ba kwa Yesu balikwete amayanda ayasuma na mabala, umo balelila, balifishiile no kutendeka ukupepa Lesa. E ico ilyo Yesu alelanda pali bena, atile: “Ndemwebe cine cine, nati, Takuli uwasha ing’anda nelyo bamunyina nelyo inkashi nelyo nyina nelyo wishi nelyo abana nelyo amabala pa mulandu wa ine na pa mulandu wa mbila nsuma uushakapokelele ifya miku umwanda umo (100) nomba mu nshita ino, amayanda na bamunyina ne nkashi na banyina na bana na mabala, pamo no kupakasa, na mu bwikashi buleisa ubumi bwa muyayaya.”—Marko 10:29, 30.

Cinshi mukabikako amano ukulacita lyonse? Bushe kubombela Lesa nelyo kufwaya ifyuma?

[Ifikope pe bula 8, 9]

Bushe mulefwaya ukukwata ifyuma . . .

. . . nelyo mufwaya ukulabombela Lesa?