Ifyo Tusambilila Kuli Yesu

Pa Mapepo Lesa Omfwa

Ilingi Yesu aleya ku ncende ya mutalalila mu kupepa, kabili ale-eba na basambi bakwe ukulacita cimo cine. Baibolo itila: “Ubushiku bumo ali ku ncende imo alepepa, kabili ilyo alekele, umusambi wakwe umo amwebele ati: ‘Mwe Shikulu, tusambilisheni ifya kupepa’ . . . E lyo abebele ati: ‘Lyonse ilyo mulepepa, muletila, “Mwe Shifwe, ishina lyenu libe ilya mushilo.”’” (Luka 5:16; 11:1, 2) Kanshi Yesu asambilishe ukuti tufwile ukulapepa fye kuli Wishi, Yehova. E Kabumba wesu epela kabili e ‘uumfwa ipepo.’—Amalumbo 65:2.

Bushe Lesa alakutika amapepo yonse?

Lesa takutika ku mapepo ya kuswatila aya kubwekesha-bwekeshapo. Yesu atile: “Ilyo ulepepa, wilabwekeshapo ukusosa fimo fine.” (Mateo 6:7) Tufwile ukulanda na Shifwe wa ku muulu ukufuma pa nshi ya mutima. Inshita imo, Yesu aebele abasambi bakwe ukuti Lesa alikutikepo amapepo ya mubembu uwalefwaya ukupilibuka, ukucila amapepo ya muntu wa cilumba uwalekonka intambi mu kupepa kwakwe. (Luka18:10-14) Kanshi nga tulefwaya Lesa alekutika ku mapepo yesu, tufwile ukuicefya no kulakonka ifyo atweba. Na Yesu atile: “Filya fine Tata ansambilishe, e fyo na ine nanda . . . lyonse ncita ifya kumusekesha.” (Yohane 8:28, 29) Yesu apepele ukuti: “Ukufwaya kwenu e ko kucitwe, te kwandi iyo.”—Luka 22:42.

Finshi twingapepela?

Apo ishina lya kwa Lesa lyalisaalulwa, Yesu atile: “E ico imwe mufwile ukupepa ifi, amuti: ‘Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.’” (Mateo 6:9, 10) Tufwile ukulapepela Ubufumu bwa kwa Lesa ukwisa pantu e buteko Lesa akabomfya ukucita ukufwaya kwakwe mu muulu na pano isonde. Yesu atile kuti twapepela na pa kukwata ‘ifya kulya fya cila bushiku.’ Kuti twapepa kuli Yehova ukuti atwafwe ukukwata incito, umwa kwikala, ifya kufwala, ukupepela pa bumi bwesu, na fimbipo. Yesu alandile no kuti tufwile ukupepa kuli Lesa ukuti atwelele imembu shesu.—Luka 11:3, 4.

Bushe tulingile ukupepelako bambi?

Yesu alepepelako bambi. Baibolo itweba ati: “Kwali abaletele abana abanono kuli Yesu, pa kuti abike iminwe yakwe pali bena no kubapepelako.” (Mateo 19:13) Yesu aebele Petro ukuti: “Ninkupepelako ukuti icitetekelo cobe cinenuka.” (Luka 22:32) Yesu akoseleshe abasambi bakwe ukulapepelako bambi, ukubikako na balebacusha no kubasaalula.—Mateo 5:44; Luka 6:28.

Cinshi tulingile ukulapepela lyonse?

Yesu alekwata inshita ya kupepa kabili alekoselesha abasambi bakwe “ukulapepa lyonse no kukanaleka.” (Luka 18:1) Yehova alitweba ukutila kuti twamulanga ukuti twalimucetekela pa kulalanda nankwe lyonse no kumweba ifitusakamika. Yesu atile: “Mulelomba, kabili bakamupeela.” Lelo ici tacalola mu kuti Yehova tapoosako sana amano ku bantu abamutemwa no kumucindika ukuti ni Shibo. Lelo Yesu atile: “Imwe nga mwalishiba ukupeela abana benu ifya bupe ifisuma nangu ca kutila muli babifi, ninshi Shinwe wa mu muulu ena akacishapo ukupeela umupashi wa mushilo ku bamulomba!”—Luka 11:5-13.

Nga mulefwaya ukwishibilapo na fimbi, belengeni icipadwa 17 mu citabo citila Bushe Cinshi Baibolo Isambilisha?a

[Futunoti]