Yesu—Ifyo Alecita
“Ica kulya candi kucita ukufwaya kwa wantumine no kupwisha umulimo wakwe.”—YOHANE 4:34.
IFYACITIKE ilyo Yesu alandile aya mashiwi yali pa muulu filenga twaishiba ifyo acindamike sana. Yesu na basambi bakwe baendele ulucelo lonse mu calo ca Samaria umwali sana impili. (Yohane 4:6, futunoti) Abasambi balemona kwati Yesu naumfwa insala, e ico bamupeela ifya kulya. (Yohane 4:31-33) Ifyo Yesu abaswike, fyalangile ico abikileko sana amano mu bumi bwakwe. Ukucita ukufwaya kwa kwa Lesa kwalicindeme sana ukucila ukulya. Ifyo Yesu alecita ne fyo alesosa fyalelanga ukuti alicindamike sana ukucita ukufwaya kwa kwa Lesa. Bushe ukucita ukufwaya kwa kwa Lesa kwasanshishemo finshi?
▪ Ukushimikila no kusambilisha pa Bufumu bwa kwa Lesa Baibolo ilondolola umulimo Yesu alebomba lyonse ukuti: “Ashingulwike mu Galili monse, alesambilisha . . . no kubila imbila nsuma ya bufumu.” (Mateo 4:23) Yesu talebila fye nelyo ukushimikila abantu pa Bufumu bwa kwa Lesa. Lelo alebasambilisha no kubasambilisha, e kutila, alebafunda, ukubalondolwela bwino bwino, no kupelulushanya na bo. Alelanda sana pa Bufumu.
Imyaka yonse iyo Yesu abombele umulimo wa kushimikila, alesambilisha abantu pa Bufumu bwa kwa Lesa na pa fyo bukacita. Moneni ifyo Yesu asambilishe na Malembo umwalembwa ifyo Yesu alandile pali ubu Bufumu.
▪ Ubufumu bwa kwa Lesa buteko bwa ku muulu kabili Yesu e o Yehova asala ukuba Imfumu ya ubu Bufumu.—MATEO 4:17; YOHANE 18:36.
▪ Ubufumu bukalenga ishina lya kwa Lesa ukuba ilya mushilo kabili bukalenga no kufwaya kwakwe ukucitwa pano isonde nga mu muulu.—MATEO 6:9, 10.
▪ Ilyo Ubufumu bwa kwa Lesa bukalateka, isonde lyonse likasanguka paradaise.—LUKA 23:42, 43.
▪Ubufumu bwa kwa Lesa buli mupepi kabili bukalenga ifyo Lesa afwaya isonde ukuba fikacitike.a—MATEO 24:3, 7-12.
▪ Ukucita ifipesha amano Yesu aishibikwe sana ukuti ni “Kasambilisha.” (Yohane 13:13) Na lyo line, mu myaka itatu na hafu ilyo aleshimikila, alecita ne fipesha amano. Ifipesha amano acitile fyabombele imilimo ibili. Ica kubalilapo, fyalengele abantu ukucetekela ukuti Lesa e wamutumine. (Mateo 11:2-6) Ica bubili, fyalangile ifyo Yesu, Imfumu ya Bufumu bwa kwa Lesa, akacita ku ntanshi mu calo fye conse. Moneni ifipesha mano fimo ifyo acitile.
▪ Atalalike amabimbi pali bemba ne cikuuku ca mwela.—MARKO 4:39-41.
▪ Aliposeshe abalwele, ukubikako ne mpofu, bankomamatwi, na balemana.—LUKA 7:21, 22.
▪ Alilengele ifya kulya ifinono ukufula ica kuti amabumba yalilile no kwikuta.—MATEO 14:17-21; 15:34-38.
▪ Imiku itatu, alibuushishe abafwa.—LUKA 7:11-15; 8:41-55; YOHANE 11:38-44.
Elenganyeni ifyo ifintu fikawama ilyo iyi Mfumu ya maka ikalateka icalo!
▪ Ukusokolola imibele ya kwa Yehova Lesa Takwaba umuntu nangu umo uwingasambilisha abantu pali Yehova ukucila Umwana wa kwa Lesa, Yesu Kristu. Apo “e beli pa fibumbwa fyonse,” Yesu ali pamo na Yehova pa myaka iingi sana mu muulu, ukucila bamalaika bonse. (Abena Kolose 1:15) Tontonkanyeni pe shuko akwete ilya kwishiba ifyo Wishi atontonkanya, ukwishiba ukufwaya Kwakwe, amafunde Yakwe, ne fyo aba.
E mulandu wine Yesu asosele ukuti: “Takuli uwaishiba Umwana ifyo aba kano Wishi, kabili takuli uwaishiba Wishi ifyo aba kano Umwana, na untu Umwana afwaya ukusokolwela.” (Luka 10:22) Ilyo ali pano calo, Yesu alisokolwele ifyo Wishi aba. Ifyo Yesu alelanda no kusambilisha fyali ifyaibela; pa kusambilisha aleibukisha ifyo asambilile ilyo ali ku muulu pamo na Lesa Uwapulamo.—Yohane 8:28.
Ilyo Yesu ali pano calo, asambilishe abantunse ifyo asambilile kuli Wishi mu muulu no kufilondolola mu nshila ya-anguka pa kuti fwe bantu twingafyumfwa no kulafikonka.
Natulande pa nshila shibili ishacindama isho Yesu asokolwelelemo Wishi.
▪ Yesu alisambilishe abantu icine pali Yehova, alengele baishiba ishina lya kwa Lesa, ifyo afwaya, ne nshila shakwe.—YOHANE 3:16; 17:6, 26.
▪ Mu fyo Yesu alecita, alisokolwele imibele isuma iingi iya kwa Yehova. Yesu alepashanya bwino sana Wishi ica kutila kuti alanda fye no kuti: ‘Nga mulefwaya ukwishiba Tata, mulelolesha fye ifyo ine ncita.’—YOHANE 5:19; 14:9.
Ifyo Yesu acitile filatupapusha nga nshi. Kuti twanonkelamo sana nga twaishiba umulandu afwilile e lyo nga twalakonka ne fyo tulesambilila.
[Futunoti]
a Nga mulefwaya ukwishibilapo na fimbi pa Bufumu bwa kwa Lesa ne fyo twaishibilako ukuti buli mupepi, belengeni icipandwa 8, icitila “Ubufumu bwa kwa Lesa Cinshi?” ne cipandwa 9, icitila “Bushe Tuleikala mu ‘Nshiku sha Kulekelesha’?,” mu citabo ca kuti Bushe Cinshi Baibolo Isambilisha? Abalemba ici citabo ni Nte sha kwa Yehova.