Ababelenga Ino Magazini Balepusha Ukuti

Bushe Yesu na Wishi Baba Shani Bamo?

Yesu atile: “Ine na Tata tuli bamo.” (Yohane 10:30) Abantu bamo balabomfya ili lembo ku kulanga ukuti Yesu na Wishi baba muli Balesa Batatu. Lelo bushe e mo Yesu aloseshe pa kulanda aya mashiwi?

Natumone ico ili lembo lilandapo. Mu cikomo 25, Yesu atile, imilimo yonse iyo alebomba, alebombela mwi shina lya kwa Wishi. Mu cikomo 27 ukufika ku 29, Yesu alandile pa mpaanga sha mampalanya isho Wishi amupeele. Abantu abalekutika kuli Yesu nga tabaumfwile ifi Yesu alandile nga ca kutila ena na Wishi muntu umo wine. Kanshi ico Yesu alelandapo ca kutila, ‘Ine na Tata twalikatana sana, takuli uwingasenda impaanga ukufuma kuli ine, nga filya fine kushingaba uwingasenda impaanga ukufuma kuli Tata.’ Kuti caba kwati ni filya umwana engalanda ku balwani ba kwa wishi ukuti, ‘Nga mwasansa batata, ninshi nine mwasansa.’ Umwana nga alanda ifi, tapali uwingatila uyu mwana na wishi muntu fye umo. Lelo bonse kuti bailuka ukuti uyu mwana na wishi balikatana icine cine.

Yesu na Wishi, Yehova Lesa, nabo baba “bamo” pantu imibele yabo ne fyo bafwaya fimo fine. Yesu ena alipusana sana na Satana Kaseebanya e lyo na Adamu na Efa, pantu talefwaya ukulaicitila fye ifyo umwine alefwaya. Yesu alondolwele ukuti: “Umwana te kuti acite akantu umwine eka, lelo acita fye ifyo amona Wishi alecita. Pantu fyonse ifyo Wishi acita, e fyo no Mwana acita.”—Yohane 5:19; 14:10; 17:8.

Lelo ifi Lesa no Mwana wakwe Yesu baikatana sana, tacipilibula ukuti baba fye cimo cine, tabapusana. Bantu babili abapusana. Cila muntu ali-ibela. Yesu alikwata imibele pa lwakwe, alaitontonkanishisha umwine, kabili alikwata ubuntungwa bwa kucita ico alefwaya. Na lyo line asalilepo ukunakila ku fyo Wishi alefwaya. Nge fyo calembwa pali Luka 22:42, Yesu atile: “Ukufwaya kwenu e ko kucitwe, te kwandi iyo.” Nga ca kuti Yesu takwata buntungwa bwa kucita ico alefwaya, nga talandile aya mashiwi. Nga ca kuti Yesu na Wishi muntu fye umo, ninshi mulandu nshi Yesu alepepela kuli Lesa kabili cinshi alandile no kutila kwali ifintu fimo ifyo ashaishibe, ifyaishibe fye Wishi?—Mateo 24:36.

Abantu abapepa mu macalici ayengi bapepa balesa abo balenga ninshi baleumana no kulwa ne ndupwa shabo. Ku ca kumwenako, mu lushimi lumo ulwa baGriki, batila lesa Cronus alicimfishe wishi, Uranus, uwali na o ni lesa kabili aliliile na bana bakwe. Ukwikatana kwa kwa Yehova Lesa no Mwana wakwe Yesu ukwashimpwa pa kutemwa kwa cine cine kwalipusana sana ne fyaba balesa abo abantu bapepa! Kabili uku kwikatana baikatana kulenga twabatemwa sana! Na kuba, lipaalo sana ukwikatana na Yehova na Yesu, abantu abakwatisha amaka pa fintu fyonse. Yesu apepeeleko abasambi bakwe ukuti: ‘Ndelomba . . . ukuti bonse babe umo, ifyo imwe Tata mwaba muli ine, na ine naba muli imwe, ukuti na bo babe muli ifwe.’—Yohane 17:20, 21.

Kanshi, ilyo Yesu alandile ukuti, “Ine na Tata tuli bamo,” taloseshe mu kuti muli Lesa umo mwaba batatu, lelo ico alelandapo ca kuti ena na Wishi balikatana sana.