Fundeni Abana Benu

Umulandu Yesu Ashailile Bwangu Kuli Lasaro

BANKASHI ya kwa Lasaro, Maria na Marita, abekala ku Betani, batuma uwa kuyaeba Yesu ukuti Lasaro nalwala sana. Nangu ca kutila bekala ukutali nga nshi, bushilya bwa mumana wa Yordani, nabacetekela ukutila Yesu kuti aposha ndume yabo. Balishiba ukuti Yesu aliposhapo abantu abali ukutali sana no ko abelele.—Mateo 8:5-13; Yohane 11:1-3.

Ilyo inkombe yafika no kweba Yesu imbila ya bulanda, Yesu tacitilepo nangu cimo. Baibolo itila: “Aikele inshiku na shimbi shibili uko ali.” (Yohane 11:6) Bushe nawishiba umulandu Yesu ashilile bwangu kuli Lasaro?—a Natumfwe.

Yesu naishiba ukuti Lasaro nafwa, e ico aeba abatumwa bakwe ati: “Natuleya na kabili ku Yudea.” Lelo bakaana abati: “Ni nomba line aba ku Yudea bafwaile ukumupoola amabwe, bushe na kabili e ko mulefwaya ukuya?” Yesu abeba ukuti: “Lasaro umunensu nalaala utulo, lelo ndeya mu kumubuusha.”

Abatumwa bamwasuka abati: “Mwe Shikulu, nga nalaala utulo, alaba fye bwino.” Lelo Yesu abeba ukuti: “Lasaro nafwa.” Lyena asosa icintu cimo icabapapusha sana, atila: “Natemwa pa mulandu wa imwe ukuti nshaliko . . . Lelo natuleya uko ali.”

Ukwabula umwenso Toma atila: ‘Natuleya na ifwe, ukuti tuyefwila pamo na Yesu.’ Toma naishiba ukuti abalwani balafwaya ukwipaya Yesu na kabili, e lyo na batumwa bene nalimo kuti babepaya. Na lyo line, bonse baya ku Betani. Pa numa ya nshiku shibili nelyo ukucilapo, bafika mu Betani mu mushi umwaleikala Lasaro, apali amakilomita nalimo yatatu ukufuma ku Yerusalemu.—Yohane 11:7-18.

Bushe nawishiba umulandu Yesu atemenwa ifi tafikile bwangu?—Yesu alibuushapo kale abantu, lelo aba bonse ababuushishe ninshi papita fye inshita iinono ukutula apo bafwilile. (Luka 7:11-17, 22; 8:49-56) Lelo umubili wa kwa Lasaro nawikala mu nshiishi inshiku ishinono. Takuli uwingakaana ukuti Lasaro tafwile!

Ilyo Marita, nkashi ya kwa Lasaro, aumfwa ukuti Yesu ali mupepi na ku Betani, abutuka ukuya ku kumukumanya. Amweba ati: “Mwe Shikulu, nga mwali kuno ndume yandi nga tafwile.” Yesu amweba ukuti: “Ndume yobe alabuuka.” Marita abwelelamo ulubilo ku ng’anda kabili ku mbali, aeba nkashi nankwe Maria ati: “Kasambilisha naisa, alekwita.”

Ilyo line fye Maria aya kuli Yesu. Lelo abantu bamukonka pantu balemona kwati aleya ku nshiishi. Lintu Yesu amona Maria na bantu baleloosha, Yesu na o ‘aponya ifilamba.’ Awe bonse basuka bafika ku nshiishi, iyo bacilikepo ilibwe ilikalamba. Yesu aeba abantu ati: “Fumyenipo ilibwe.” Lelo Marita akaanya ati: “Mwe Shikulu, ino nshita alenunka, pantu napapita inshiku shine.”

Abantu bacita ifyo Yesu abeba kabili bafumyapo ilibwe. Lyena apepa, atasha Lesa pantu naishiba ukuti alamupeela amaka aya kubuusha Lasaro. Yesu abilikisha “ishiwi likalamba ati: ‘Lasaro fuma!’” Awe Lasaro afumina ku nse, ninshi “napombwa insalu.” E lyo Yesu abeba ati: “Mukakuleni, mulekeni aye.”—Yohane 11:19-44.

Bushe waishiba nomba umulandu Yesu ashailile bwangu kuli Lasaro?— Alishibe ukuti nga alolelako kuti ashimikila bwino pali Wishi, Yehova. Kabili pa mulandu wa kuti alisalile inshita iisuma iya kushimikilapo, calengele ukuti abengi batetekele Lesa. (Yohane 11:45) Bushe wamona ifyo twingasambilila ku fyo Yesu acitile?—

Na iwe ufwile ukusala inshita iisuma iya kushimikilako bambi pa fintu ifisuma ifyo Lesa acita ne fyo akacita ku ntanshi. Nalimo kuti washimikilako abo usambilila na bo nangu bakafundisha bobe. Na lintu bali mu kalasi, abaice bamo balashimikila bambi pa mapaalo yakalamba ayo Ubufumu bwa kwa Lesa bukaletela abantu. Kwena te kuti ubuushe abafwa, lelo kuti wa-afwa bambi ukwishiba Lesa uukabuusha abatemwikwa besu abafwa.

[Futunoti]

AMEPUSHO:

▪ Cinshi Yesu ashilile bwangu kuli Lasaro?

▪ Mulandu nshi Toma asosela ukuti: ‘Natuleya na ifwe, ukuti tuyefwila pamo na Yesu’?

▪ Cali shani pa kuti Yesu abuushe Lasaro?

▪ Finshi ufwile ukucita pa kulanga ukuti nausambilila ku fyo Yesu acitile?