Amepusho Ukufuma ku Babelenga

Yesu alishimikile mu calo conse ica Israele. Nomba mulandu nshi umutumwa Petro asosele ati ni “mu kukanaishiba” e mo abaYuda pamo ne ntungulushi shabo balombeele ukuti Yesu bamwipaye?—Imil. 3:17.

Ilyo umutumwa Petro alelanda kwi bumba lya baYuda pa fyo bakumineko ku mfwa ya kwa Mesia, atile: “Ninjishiba ukuti mwacitile mu kukanaishiba, nga filya fine ne ntungulushi shenu shacitile.” (Imil. 3:14-17) AbaYuda bamo napamo tabaishibe bwino Yesu e lyo ne fyo alesambilisha. Bambi bena, icalengele ukuti bemwishiba bwino ni co tabalefwaya ukulacita ifyo Lesa atemwa, bali ne mpatila, bali no mufimbila, kabili tabatemenwe Yesu nangu panono.

Tontonkanyeni ifyo ukukanafwaya ukusekesha Yehova kwalengele abantu abengi ukukanatemwa ifyo Yesu alesambilisha. Yesu ilingi line alesambilisha ukubomfya ifilangililo, ifyo alelondolola kuli bonse abalefwaya ukwishibilapo na fimbi. Bamo abalekutika kuli ena balefumapo fye, ukwabula no kuti baibikilisheko ukwiluka ifyo alesambilisha. Inshita imo, na basambi bakwe bamo balifulilwe pa mashiwi Yesu asosele. (Yoh. 6:52-66) Aba bonse bafililwe ukwiluka ukuti ifilangililo Yesu alelanda e fyalepima nampo nga bali-ipekenye ukwalula ukutontonkanya kwabo ne fyo balecita. (Esa. 6:9, 10; 44:18; Mat. 13:10-15) Kabili basuulile no kusesema ukwalelanda ukuti Mesia akalabomfya ifilangililo pa kusambilisha.—Amalu. 78:2.

Bambi bakeene ifyo Yesu alesambilisha pa mulandu wa mpatila fye. Ilyo alesambilisha mwi sunagoge ilya mu mushi aleikalamo uwa Nasarete, abantu “balipapile.” Lelo ukucila ukuti basumine fye ukuti Yesu e Mesia, batendeke ukwipusha ifipusho pa nkulilo ya kwa Yesu abati: “Bushe uyu muntu afumishe kwi ifi fintu? . . . Bushe uyu te kabasa, umwana wa kwa Maria kabili munyina Yakobo na Yosefe na Yuda na Simone? Bushe ne nkashi shakwe tatwaba na sho kuno?” (Marko 6:1-3) Ku bantu ba mu Nasarete, filya Yesu akuliile mu lupwa ulupiina fyalengele ukuti basuule ne fyo alesambilisha.

Inga bashimapepo bena? Abengi tababikileko amano kuli Yesu pa milandu yapalako. (Yoh. 7:47-52) Balikeene ne fyo alesambilisha pantu balimufimbiile, ico abantu abengi balimubikileko amano. (Marko 15:10) Kabili bashimucindikwa abengi balikalipe ilyo abebele ukuti bali ba bumbimunda kabili incenjeshi. (Mat. 23:13-36) Yesu alibasuushishe pali filya baitemenwe ukukanafwaya ukwishiba. Abebele ati: “We bulanda kuli imwe mwe baishibisha Amafunde, pantu mwalipoka amakii aya kwishiba; mwe bene tamwaingilemo [mu Bufumu], na balefwaya ukwingilamo mwalibaleseshe!”—Luka 11:37-52.

Pa myaka itatu na hafu, Yesu aleshimikila imbila nsuma mu calo. Kabili asambilisheko na bambi abengi pa kuti nabo balebombako uyu mulimo. (Luka 9:1, 2; 10:1, 16, 17) Yesu na basambi bakwe balebomba bwino nga nshi uyu mulimo ica kuti abaFarise bailishenye ukuti: “Moneni! Aba pano calo bonse balemukonka.” (Yoh. 12:19) Kanshi te kuti tutile abaYuda abengi tabaishibepo nangu cimo. Lelo, baifwaile fye abene “ukukanaishiba” Yesu ati e Mesia. Abafwaya, nga balishibilepo na fimbi pali Mesia kabili nga balimutemenwe sana, lelo tabacitile ifyo. Bamo baumene akapi na baipeye Yesu. E ico, umutumwa Petro acincishishe abengi pali aba ukuti: “E ico, lapileni, no kwalukila kuli Lesa pa kuti imembu shenu shifuutwe, e lyo Yehova alamupuupuutula e lyo na pa kuti atume Kristu uwasonteelwe imwe, e kutila, Yesu.” (Imil. 3:19, 20) Icipapusha ca kuti abaYuda abengi nga nshi balitendeke ukubikako amano, ukusanshako na “bashimapepo abengi.” Nomba balilekele ukucita ifintu mu kukanaishiba kabili balilapiile na Yehova alibapokelele.—Imil. 2:41; 4:4; 5:14; 6:7.