Icebo ca kwa Yehova Caishibikwa Bwangu Bwangu mu “Calo ca kwa Kapumpe”

MU LULIMI lwa cikaya, abena Albania beta icalo cabo ukuti: “Icalo ca kwa Kapumpe.” Ici calo caba pa cofi ca Balkan ukulolenkana na Bemba wa Adriatic. Kabili caba pa kati ka calo ca Grisi ne calo caleitwa Yugoslavia. Nangu ca kuti abantu balanda ifyapusanapusana pa ntuntuko ya bena Albania no lulimi balanda, bakalemba ba lyashi lya kale basumina ukuti abena Albania batuntwike ku bena Iluriki. Ukulingana na The Encyclopeadia Britannica, intambi shabo sha kale sana ukutendeka mu myaka ya ba2000 B.C.E.

Impili shansunsu shapusanapusana ubutali ishaba ku kapinda ka ku kuso, no mucanga wabuta uwaba mu lulamba lwa bemba wa Adriatic ku kapinda ka ku kulyo, e fyayemfya icalo ca Albania. Lelo icayemfya sana ici calo, bantu abekalamo. Balisansamuka kabili bacileela, balasambilila bwangu ifintu kabili balitemwa ukubomfya umubili nga balelanda.

Ukutandala kwa kwa Mishonari Uwaishibikwe Sana

Icifyalilwa ca bantu e lyo no kuyemba kwa calo cabo ukwabula ukutwishika e fyatemenwe umulendo umo imyaka imo ku numa. Mu mwaka wa 56 C.E., umutumwa Paulo uwaendele mu ncende ishingi alembele ukuti: “Ukufika ku Iluriki nalishimikisha imbila nsuma pali Kristu.” (Abena Roma 15:19) Ukwambila pa kati ka Albania ukufika na ku kapinda ka ku kuso ilya ncende yonse e yali akapinda ka kulyo aka calo ca Iluriki. Paulo alelembela bakalata bakwe mu Korinti, ku Grisi, icalo cali ku kapinda ka ku kulyo aka Iluriki. Pa kuti Paulo alembe ukuti alishimikile “ukufika ku Iluriki” calangilila ukuti afwile limbi ailefika ku mupaka wa Iluriki nangu fye ukwingila na mu kati mwine. Te mulandu ne fyo cali, Paulo afwile alishimikile na mu ncende yaba ku kapinda ka ku kulyo mu Albania. Kanshi Paulo e wabalilepo ukushimikila imbila nsuma ya Bufumu mu Albania.

Palipitile imyaka iingi, Amabufumu yalekanalekana yalimine no kuwa. Kabili ifyalo fyalekanalekana fyatendeke ukuteka iyi ncende ya mu Bulaya ukufikila fye lintu icalo ca Albania capokele ubuntungwa mu 1912. Ilyo papitile imyaka nalimo 10, ukushimikila pa Bufumu bwa kwa Yehova mu calo ca Albania kwalitendeke na kabili.

Intendekelo Isuma Iya Muno Nshiku

Abena Albania bamo abaileikala ku United States mu myaka ya ba1920 kabili baleyampana na Basambi ba Baibolo, nga fintu Inte sha kwa Yehova baleitwa ilya nshita. Ilyo babwelele ku Albania, bailesambilishako bambi ifyo basambilile. Pali aba pali baNasho Idrizi. Abantu bamo batendeke ukukonka ifyo balesambilila. Mu 1924 iofesi lya musambo mu Romania lyaebelwe ukulatungulula umulimo wa kushimikila mu Albania pa kuti bengasambilisha abantu abengi abalefwaisha ukusambilila icine.

Pa basambilile pali Yehova mu Albania muli iyo myaka pali baThanas Duli (Athan Doulis). BaDuli bashimika ukuti: “Mu 1925 mu Albania, mwali fye ifilonganino fitatu, na Basambi ba Baibolo abali mu fifulo ifishaleshimikilwako sana ukusanshako na balefwaisha ukusambilila icine abaleikala mu ncende shapusanapusana mu Albania mwine. Balitemwanene sana ukucila . . . ifyo abantu bambi batemwanene!”a

Imyendele yalyafishe mu Albania pantu imisebo yalibipile. Te mulandu no bu bwafya bakasabankanya bacincila tabalekele ukushimikila. Ku ca kumwenako, Areti Pina uwaleikala mu Vlorë, umusumba wabela mu lulamba lwa bemba ku kapinda ka ku kulyo, abatishiwe mu 1928 lintu ali ne myaka 18. Pa kuya mu kushimikila, Areti Pina aleninika no kutentemuka impili uku ninshi naikata Baibolo mu minwe. Alelongana mu cilonganino icali mu Vlorë umwali bakasabankanya abacincile mu kushimikila mu myaka ya ba1930.

Mu mwaka wa 1930, iofesi lya musambo mu musumba wa Atena mu Grisi e lyaletungulula umulimo wa kushimikila mu Albania. Mu 1932 kangalila wenda ukufuma ku Grisi atandalile Albania ku kukoselesha no kucincisha bamunyinefwe. Abengi abalesambilila icine ca mu Baibolo pali ilya nshita bakwete isubilo lya ku muulu. Ukwishibikwa kwabo ukuti bali bantu ba busaka kabili abasuma kwalengele abantu ukuli konse ukubapeela umucinshi ukalamba. Imilimo ya aba bamunyina ba citetekelo yalengele abengi ukusambilila icine. Mu 1935, mu Albania bashalike impapulo 6,500 kabili na mu 1936 bashalike icipendo cimo cine ica mpapulo.

Bushiku bumo, baNasho Idrizi balishishe ilyashi lya kwa Munyinefwe J. F. Rutherford ilyali pa cilimba ca maseleti pa kati ke tauni lya Vlorë. Abantu balisele amatuuka yabo no kuyakutika ku lyashi ilyo Munyinefwe Idrizi alepilibula mu lulimi lwa bena Albania. Ukubombesha kwa abo bakasambilisha ba Baibolo aba kubalilapo abashabwelele numa mwafuminemo ifisuma. Mu 1940, mu Albania mwali baNte 50.

Icalo ca Bamukana Lesa

Mu 1939, baFascist ba ku Italy batendeke ukuteka icalo ca Albania. Ubuntungwa bwa kushimikila mwi funde ukwa Nte sha kwa Yehova kwalipokelwe no mulimo wa kushimikila walibindilwe. Tapakokwele, imilalo ya fita ifya ku Germany yaishiletaasha icalo ca Albania. Lintu Inkondo ya Calo iya Bubili yapwile, Enver Hoxha umukalamba wa bashilika, e waishileba intungulushi. Akabungwe kakwe aka Komyunisiti kalicimfishe ukusala kwaliko mu 1946, kabili aishileba kateka. Imyaka yakonkelepo yaitilwe inshita ya kulubuka, lelo ku Nte sha kwa Yehova yali ni nshita ya kucula.

Panono panono, ubuteko bwatendeke ukukaanya ukupepa. Pa kukanafwaya ukuitumpa mu milandu ya calo, Inte sha kwa Yehova mu Albania balikeene ukubomfya ifyanso no kuyobeka mu mapolitiki. (Esaya 2:2-4; Yohane 15:17-19) Abengi balibapoosele mu cifungo, balebatana ifya kulya na fyonse ifyo balekabila. Ilingi line, bankashi ba ku mupashi abashali mu cifungo e balebacapila ifya kufwala no kubepikila ifya kulya.

Abashipa Nangu Babacushe Shani

Ku kutendeka fye kwa ba1940, Frosina Xheka, umukashana wacaice uwaleikala mu mushi uwali mupepi ne citungu ca Përmet, aumfwile icine ico bandume yakwe abakalamba balesambilila kuli baNasho Dori abalepanga insapato.b Ubuteko bwalecusha Inte sha kwa Yehova, lelo abafyashi ba kwa Frosina tabatemenwe ukumona uko icitetekelo cakwe calekoselako. Frosina ashimika ukuti: “Balemfishile nsapato kabili lyonse nga nafuma ku kulongana kwa Bwina Kristu balempuma. Bafwaile no kungufya ku ushasumina. Balintamfishe pa ng’anda lintu nakeene ukuupwako. Pali bulya bushiku kwalitalele nga nshi. BaNasho Dori balombele Munyinefwe Gole Flloko uwaleikala mu Gjirokastër ukuti ndeikala nankwe, kabili natendeke ukulaikala no lupwa lwakwe. Bandume yandi balibakakile imyaka ibili pa kukanaibimba mu milandu ya calo. Lintu bafumine mu cifungo, nakukiile ku Vlorë mu kwikala nabo.”

BaNasho Dori balanda ukuti: “Bakapokola balyeseshe ukumpatikisha ukuipoosa mu tubungwe twa mapolitiki nomba nalikeene. Balinjikete, bantwele mu muputule, no kunshinguluka. Kapokola umo alentiinya ati: ‘Bushe nawishiba ifyo twingakucita?’ Namwaswike nati: ‘Kuti mwacita fye ico Yehova engamusuminisha ukucita.’ Alyaswike bukali bukali ukuti: ‘Ufwile naupena! Fuma pano!’”

Bamunyinefwe ba mu Albania balangishe bucishinka bwa musango uyo pa myaka iingi. Ilyo calefika mu 1957, bakasabankanya ba Bufumu bafikile 75. Mu kubangilila fye kwa ba1960, Ibumba Litungulula lyatumine Munyinefwe John Marks, umwina Albania uwakukiile ku United States, ukuyatandala ku Tiranë no kuyaafwilishako ukuteyanya bwino umulimo wa Bwina Kristu.c Nangu cali fyo, papitile fye inshita inono, bamunyinefwe pamo nga baLuçi Xheka, baMihal Sveci, baLeonidha Pope, na bambi abali pa ntanshi mu mulimo wa kushimikila babatwele mu nkambi sha kucushishamo abantu.

Isubilo Lya Kwilulukwa

Pa ntanshi ya 1967 tabalefwaya amacalici nangu yamo mu Albania. Pa numa baliyabindile umupwilapo. Takwali shimapepo nangu umo uwa ciKatolika, iciOrthodox, nelyo uwa ciShilamu uwalesuminishiwa ukupepesha pa kusefya ukuli konse ukwalecitwa. Amacalici ne fikuulwa fya kupepelamo ifya baShilamu fyaliseelwe, fimo bafyalwile ukuba ifikuulwa fya mangalo, fimbi fyaishileba amayanda ya babenye, e lyo na fimbi bafisangwile imishika. Takwali uo basuminishe ukukwata Baibolo kabili takwali no kulanda ukuti nalisumina muli Lesa.

Tacayangwike ukushimikila no kusangwa ku kulongana kwa Bwina Kristu. Inte sha kwa Yehova baleesha na maka ukubombela Yehova, te mulandu ne fyo basalangene. Ukufuma muli ba1960 ukufika muli ba1980, impendwa ya Nte yalibwelele pa nshi, bashele fye abanono lelo ku mupashi bali abakosa.

Mu kupwa kwa ba1980, kwaliko ukulunduluka panono mu fya mapolitiki. Ifya kulya ne fya kufwala fyalicepele. Ici calengele abantu ukuba ne nkumbabulili. Ukwaluka mu mitekele ukwali ku kabanga ka Bulaya kwafikile na ku Albania mu kutendeka kwa ba1990. Pa numa ya myaka 45 iya kuteka kwa mutitikisha, kamfulumende yatendeke ukuteka pali iyo nshita yasuminishe amacalici yonse ukulapepa na kabili.

Lintu Ibumba Litungulula ilya Nte sha kwa Yehova lyaebele amaofesi ya musambo aya mu Austria na Grisi ifya kucita, bwangu bwangu batendeke ukulaumfwana na bamunyinefwe abali mu Albania. Bamunyinefwe abaGriki abaishibe ululimi lwa bena Albania baletele ifitabo fyapilibwilwe ifyalelanda pali Baibolo ku Tiranë na Berat. Bamunyinefwe ba mu Albania abasalangene, balisansamwike pa kukumanya Inte shafumine mu fyalo fimbi pa muku wa kubalilapo pa numa ya myaka iingi.

BaPainiya Bacincila Ukufuma mu Fyalo Fimbi Batungulula Umulimo

Ibumba Litungulula lyateyanishishe ukuti baMichael na baLinda DiGregorio, bamishonari abo ifikolwe fyabo fyafumine ku Albania, bakukiile kulya. Bakumenye abakalamba abaletwalilila aba citetekelo, no kubafwa ukwikatana pamo na kabili no kupanga ulupwa lwa ku mupashi ulwa mwi sonde lyonse. Bapainiya baibela, nelyo bakashimikila ba nshita yonse 16 ukufuma ku Italy bafikile mu Albania mu November, pamo pene na bapainiya 4 abaGriki. Pa kubafwa ukwishiba ululimi lwa bena Albania, bateyenye isukulu ilya kubasambilisha lulya lulimi.

Cila bushiku, aba bapainiya balesanga amafya mu mikalile. Inshita shimo takwaleba malaiti, kabili mu nshita ya mpepo kwaletalala sana. Abantu baletantama inshita iitali pa kuti fye bapoke ifya kulya ne fyo balekabila. Lelo, ubwafya na bumbi ubukalamba ubo bamunyinefwe bakwete bwali kusanga ififulo fya kulonganinamo ifikalamba umwingekala abantu abengi abalefwaisha ukusambilila icine!

Bapainiya abalefilwa ukulanda ululimi lwa bena Albania basangile ukuti ukusambilila ululimi kwali no ku bafwa ukushimikila bwino. Kasambilisha wa Baibolo uwalamuka abebele ukuti: “Tatulekabila ukulashimbula bwino amashiwi yonse pa kuti tumwentule bwino nelyo ukukumbatila bamunyinefwe. Abena Albania bakomfwa bwino nga mwabalanga ukutemwa ukwa cine cine, te kulumbulula amashiwi bwino iyo. Mwisakamana, bakomfwa.”

Pa numa ya kupwisha isukulu lya kubalilapo ilya kusambilila ululimi, bapainiya baile mu kushimikila mu Berat, Durres, Gjirokastër, Shkodër, Tiranë, na Vlorë. Tapakokwele ifilonganino fyatendeke ukupangwa bwangu bwangu muli iyi misumba. BaAreti Pina abali ne myaka ya bukulu 80, kabili abalelwalilila pali ilya inshita, ninshi bacili baleikala mu Vlorë. Bapainiya baibela babili balituminwe ukuyabomba pamo na baAreti. Abena Albania balipapile ukumfwa uko abena fyalo balelanda ululimi lwabo. Batile: “Bamishonari ukufuma ku macalici yambi batusambilisha icisungu nelyo iciItaliani pa kuti fye tusambilileko fimo. Lelo imwe, pa kuti fye musambilile ululimi lwesu, mufwile mwalitutemwa icine cine kabili muli no bukombe bwacindama ubo mulefwaya ukutusambilisha!” BaAreti bapwishishe umulimo wabo uwa pe sonde ne citetekelo cakosa mu January 1994, kabili bali abacincila mu kushimikila mpaka na mu mweshi bafwililemo. Ukucincila kwa baAreti na bapainiya mwafumine ifisuma. Icilonganino calitendeke cipya cipya mu Vlorë mu 1995. Nomba muli ifilonganino fitatu ifyacincila mu kushimikila muli ulya musumba waba mupepi ne cabu.

Mu calo conse, abantu bali ne nsala ya ku mupashi kabili balitemenwe ifya mapepo. Balepoka no kubelenga icitabo icili conse icalelanda pali Baibolo ukufuma ku Nte sha kwa Yehova. Abaice abengi batendeke ukusambilila Baibolo, kabili mu kwangufyanya balilundulwike.

Ukucila pa filonganino 90 na mabumba fyalitwalilila ‘ukukoshiwa mu citetekelo no kulundwako impendwa ubushiku no bushiku’ mu calo conse ica Albania. (Imilimo 16:5) Inte sha kwa Yehova 3,513 ababa mu Albania bacili na bakwata umulimo uukalamba. Mu March 2005, abantu 10,144 e basangilwe ku Cibukisho ca mfwa ya kwa Kristu. Apo abena Albania baliba ne cileela, calenga ukuti amasambililo ya Baibolo ukucila pali 6,000 yaletungululwa. Ukwabula no kutwishika abantu abengi bakanonkelamo ukubelenga Baibolo wa New World Translation uwafumine nomba line mu lulimi lwa bena Albania. Ca cine, icebo ca kwa Yehova calishibikwa bwangu bwangu mu “Calo ca kwa Kapumpe,” kabili ici cilaleta umucinshi kuli Yehova.

[Amafutunoti]

[Akabokoshi pe bula 20]

ULUKAAKALA LWA MIKOWA LWAPWA MU KOSOVO!

Kosovo yalelandwapo lyonse ku kupwa kwa ba1990 lintu kwali ukulwila impanga no kukansana kwa mikowa ukwaletele inkondo iyalengele ifyalo fimbi ukuponenamo.

Lintu mu Balkan mwali inkondo, Inte sha kwa Yehova ishingi shabutukile mu fyalo fyali mupepi. Lintu inkondo yapwile, baNte abanono balibwelele ku Kosovo, kabili bali abaiteyanya ukubomba umulimo wa kushimikila. Bapainiya baibela aba ku Albania na ku Italy baliitemenwe ukuselela ku Kosovo ku kushimikila muli iyi ncende yakwata abantu 2,350,000. Nomba muli ifilonganino 4 na mabumba 6 ayabombesha, abapanga impendwa yonse pamo 130 iya bakasabankanya babombela Yehova muli iyi ncende.

Kwaliko ukulongana kwaibela ukwa bushiku bumo mu Priština muli shinde wa 2003, kabili abasangilweko bali 252. Pa basangilweko pali abakwete ifikulilo fya cina Albania, icina German, icina Gypsy, icina Italy, ne fya cina Serbia. Mu kusondwelela ilyashi lya lubatisho, kalanda aipwishe amepusho yabili. Abantu batatu, munyinefwe umwina Albania, nkashi umwina Gypsy, na nkashi umwina Serbia e baiminine ukwasuka mu kupongomoka.

Lintu baumfwile uko abalebatishiwa batatu bayasukile ca pamo mu kupongomoka ukuti “Va!” mu lulimi lwa bena Gypsy, “Da!” mu lulimi lwa bena Serbia, na “Po!” mu lulimi lwa bena Albania, ibumba lyalitotele. Abalebatishiwa bonse balikumbatene pa kuposhanya. Nomba balisangile icasuko ku kukansana kwa mikowa ukwali mu calo cabo.

[Mapu pe bula 17]

(Nga mulefwaya ukumona mapu, moneni muli magazini)

Bemba wa Mediterranean

ITALY

ALBANIA

GRISI

[Icikope pe bula 18]

BaNte abaice bapashanya ukucincila kwa bakalamba

[Icikope pe bula 18]

BaAreti Pina babombele na bucishinka ukufuma mu 1928 ukufika ne mfwa yabo mu 1994

[Icikope pe bula 19]

Ibumba lya kubalilapo ilya bapainiya abafumine ku fyalo fimbi balesangwa kwi sukulu lya kusambilila ululimi

[Abatusuminishe Ukubomfya Icikope pe bula 16]

Eagle: © Brian K. Wheeler/VIREO