Ukulongana ‘Kulatukuula, Kulatukoselesha no Kutusansamusha’

13. (a) Bushe abantu bafwile ukumfwa shani nga basangwa mu kulongana? (b) Cipusho nshi icacindama sana kuli baeluda?

¹³ Paulo alandile ukuti icikalamba ico ukulongana kwabelako, ‘kukuula, ukukoselesha no kusansamusha’ abasangilweko.c (1 Kor. 14:3) Cinshi baeluda bafwile ukucita pa kuti amalyashi yabo yalekoselesha no kusansamusha bamunyinabo na bankashi? Pa kwasuka ici cipusho natulande pa kulongana Yesu atungulwile ilyo abukile fye ku bafwa.

14. (a) Finshi fyacitike ilyo Yesu talaita abasambi ukuti balongane? (b) Cinshi twingalandila ukuti abasambi bafwile balisansamwike ilyo ‘Yesu apaleme uko bali, no kulanda nabo?’

¹⁴ Intanshi moneni ifyacitike ilyo kulya kulongana takulabako. Ilyo Yesu ali mupepi no kwipaiwa, abatumwa “balimushile no kufulumuka,” kabili nga fintu casobelwe, ‘balisalangene umo umo ku ng’anda ku mwakwe.’ (Marko 14:50; Yoh. 16:32) Ilyo abuushiwe, Yesu aitile abatumwa bakwe abali no bulanda sana ukuti basangweko kuli kulya kulongana pa kuti bakoseleshiwe.d Baibolo itila: “Abasambi 11 baile ku Galili ku lupili uko Yesu abapekanishishe.” Ilyo bafikile kulya, ‘Yesu apaleme uko bali, no kulanda nabo.’ (Mat. 28:10, 16, 18) Elenganyeni ifyo abatumwa basansamwike ilyo Yesu alandile nabo! Cinshi Yesu abebele?

15. (a) Finshi Yesu alandilepo, kabili cinshi ashacitile? (b) Bushe kulya kulongana kwalenge abasambi ukumfwa shani?

¹⁵ Yesu atendekelepo ukubeba ukuti: “Nabampela amaka yonse mu muulu na pano isonde.” Lyena abapeele umulimo ilyo atile: “Kabiyeni, kalengeni [abantu] ukuba abasambi.” Na pa kulekelesha abakoseleshe ati: “Nakulaba na imwe inshiku shonse.” (Mat. 28:18-20) Bushe namumona ico Yesu ashacitile? Takalipile abasambi bakwe, kabili talangilepo ukuti tabacetekele, e lyo talengele baumfwa sana ububi pali filya icitetekelo cabo canakile pa nshita iinono. Lelo Yesu abapeele umulimo uukalamba uwabakoseleshe no kulenga baishiba ukuti ena na Wishi balibatemwa. Bushe ifyo Yesu acitile fyalengele abatumwa ukumfwa shani? Fyalengele bakuulwa, bakoseleshiwa e lyo no kusansamushiwa ica kuti ilyo papitile fye inshita inono, batendeke na kabili ‘ukusambilisha no kubila imbila nsuma.’—Imil. 5:42.

16. Bushe ukupashanya Yesu kuti kwa-afwa shani baeluda pali lelo ukulalanda amalyashi ya kukoselesha pa kulongana?

¹⁶ Baeluda bafwile ukupashanya Yesu. Nabo balingile ukulaibukisha ukuti ukulongana kulabapeela ishuko lya kukoselesha abasumina banabo ukuti Yehova alitemwa abantu bakwe icine cine. (Rom. 8:38, 39) E ico, mu malyashi balanda, baeluda bafwile ukulanda sana pa fisuma ifyo bamunyinabo bacita, te pa filubo fyabo. Tabafwile ukulalanda ifingalenga bamunyinabo balamona ukuti tababacetekela. Lelo ifyo balelanda fifwile ukulanga ukuti balicetekela ukuti bamunyinabo balitemwa Yehova kabili balafwaya ukucita icalungama. (1 Tes. 4:1, 9-12) Na lyo line baeluda limo balakabila ukufunda icilonganino conse nga kuli ifilubene, lelo nga ca kutila banono fye abafwile ukulungikwa, kuti cawama aba bene fye e bo balanda nabo no kubafunda. (Gal. 6:1; 2 Tim. 2:24-26) Ilyo balelanda ku cilonganino conse, baeluda bafwile ukulatasha bamunyinabo umo balecita bwino. (Esa. 32:2) Bafwile ukwesha na maka ukulanda ifingalenga bonse abacisangwako ukusansamushiwa no kukoshiwa.—Mat. 11:28; Imil. 15:32.