Ukumfwila Yehova Kwalicindama Sana

“We mwana wandi, ube uwa mano, ulenge umutima wandi ukusamwa.”—Amapinda 27:11.

 1. Mibele nshi iyaseeka sana mu calo pali lelo?

B UCINTOMFWA no kulaicitila fye ifyo umuntu umwine alefwaya nafiseeka sana mu calo pali lelo. Umutumwa Paulo alilondolola umulandu cibelele ifi muli kalata alembele Abena Kristu ba ku Efese. Atile: “Mwaendele inshita imo umwabela ubwikashi bwa cino calo, umwabela kateeka wa maka ya mu lwelele, umupashi uyo nomba ubomba mu bana ba bucintomfwa.” (Abena Efese 2:1, 2) Ca cine, Satana Kaseebanya, “kateeka wa maka ya mu lwelele,” alatunka abantu mu calo ukuba bacintomfwa. Mu mwanda wa myaka uwa kubalilapo Satana alengele abantu ukubulwe cumfwila kabili ukutula mu nshita ya Inkondo ya Calo iya kubalilapo, lintu bamupoosele ukufuma mu muulu, alicilanamo ukutunka abantu ukuba bacipondoka.—Ukusokolola 12:9.

2, 3. Mulandu nshi tulingile ukubela ne cumfwila kuli Yehova?

² Lelo, fwe Bena Kristu twalishiba ukuti tulingile ukulaumfwila Yehova Lesa no mutima onse pantu e watubumbile, e utungilila imyeo yesu, ni Kalubula wesu, kabili Mulopwe uwatutemwa. (Amalumbo 148:5, 6; Imilimo 4:24; Abena Kolose 1:13; Ukusokolola 4:11) Abena Israele ba mu nshiku sha kwa Mose balishibe ukuti Yehova e wabapeele ubumi kabili e walebapususha. E mulandu wine Mose abebele ukuti: “Muleangwo kucita ifyo Yehova Lesa wenu amwebele.” (Amalango 5:32) Kanshi balingile ukuba ne cumfwila kuli Yehova. Lelo, tapakokwele balekele ukulaumfwila Lesa wabo.

³ Bushe ukumfwila Kalenga wa myulu ne calo kwacindama shani? Ilyo Samwele ali umumi, Lesa amutumine ukuyaeba Shauli ukuti: “Ukunakila kwawamo kucile lambo.” (1 Samwele 15:22, 23) Mulandu nshi icumfwila cawamina ukucile lambo?

Ifyo Icumfwila ‘Cawama Ukucile Lambo’

 4. Bushe cinshi twingapeela Yehova?

⁴ Yehova e wabumba ifintu fyonse, kanshi e mwine wa fyonse ifyo twakwata. Apo Yehova e mwine wa fyonse, bushe kuli ico twingamupeela? Ee, kwaliba icacindama nga nshi ico twingamupeela. Bushe cinshi ico cine? Icasuko kuti twacisanga muli aya mashiwi yatila: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.” (Amapinda 27:11) Kanshi ico twingapeela Lesa, kuba ne cumfwila kuli ena. Nangu cingati inkulilo ne fyo tupitamo filapusana, nga tuleumfwila Lesa, ifwe bonse kuti twashinina Satana Kaseebanya ukutila filya asosele ati abantu teti babe ne cishinka kuli Lesa nga baleeshiwa fya bufi. We shuko nobe ulakula!

 5. Bushe bucintomfwa bulenga Kabumba wesu ukumfwa shani? Langilileni.

⁵ Lesa alabikako amano ku fyo tusalapo ukucita. Nga twasalapo ukukanaba ne cumfwila kuli ena, tulamukalifya. Bushe tumukalifya shani? Alomfwa sana ubulanda ukumona umuntu asalapo ukucita ifikamuletelela ku ntanshi. (Amalumbo 78:40, 41) Natulangilile: Tutile umulwele wa shuga akaana ukulalya ifyo badokota bamweba ukulya e lyo alalya ifyo bamukaanya, bushe dokota uumundapa kuti aumfwa shani? E fyo na Yehova omfwa ubulanda nga abantu baleka ukumumfwila pantu alishiba icifuma mu kukanaumfwila amafunde atupeela pa kuti tutwalilile ukuba no mweo.

 6. Cinshi cingatwafwa ukuba ne cumfwila kuli Lesa?

⁶ Cinshi cingafwa ifwe bonse ukuba ne cumfwila kuli Lesa? Bonse tufwile ukulomba ‘umutima wa kumfwila’ Lesa nge fyo Imfumu Solomone yacitile. Solomone alombele umutima wa kumfwila Lesa pa kuti aleiluka “ubusuma no bubi” pa kupingula abena Israele banankwe. (1 Ishamfumu 3:9) Pa kuti tuleishiba icisuma ne cabipa muli cino calo cafulamo bacintomfwa, tulingile ukuba no ‘mutima wa cumfwila.’ Lesa alitupeela Icebo cakwe, ifitabo ifitwafwa ukwishiba ifyo Baibolo isambilisha, ukulongana kwa Bwina Kristu, na baeluda abatusakamana pa kuti twingaba no ‘mutima wa cumfwila.’ Bushe tulabomfya bwino ifi fintu Lesa atupeela?

 7. Mulandu nshi Yehova acindamikila icumfwila ukucila amalambo?

⁷ Mwilaba ukuti kale Yehova aebele ababomfi bakwe ukuti icumfwila cilicindeme sana ukucila amalambo ya nama. (Amapinda 21:3, 27; Hosea 6:6; Mateo 12:7) Apo Yehova e waebele abena Israele ukulatuula amalambo ya nama, mulandu nshi asosele ukuti icumfwila calicindeme ukucila amalambo? Bushe cinshi cilenga abantu ukulatuula ilambo? Bushe ukufwaya ukutemuna Lesa e kulenga baletuula amalambo? Nelyo bushe batuulila fye ico cine pantu e fyo bafwile fye ukucita? Nga umuntu alafwaisha sana ukutemuna Lesa, akulaumfwila amafunde ya kwa Lesa yonse. Lesa takabila amalambo ya nama, lelo icumfwila e cacindama sana ico twingamupeela.

Ilyashi Ilya Kutusoka

 8. Mulandu nshi Lesa afumishe Shauli pa bufumu?

⁸ Ilyashi lya mu Baibolo ililanda pa Mfumu Shauli lilanga ukuti icumfwila calicindamisha sana. Ilyo Shauli bamubikile pa bufumu ali uwafuuka kabili uwaicefya, ali ‘umunono mu menso yakwe.’ Lelo pa numa aishileba ne cilumba kabili aleilungamika mu fyo alecita. (1 Samwele 10:21, 22; 15:17) Bushiku bumo, Shauli aliiteyenye ukulwisha abaPelishiti. Samwele aebele imfumu ukuti imulolele ese atuule amalambo kuli Yehova no kuyeba fimbi ifyo yali no kucita. Lelo, Samwele tafikile pa nshita balemwenekela, kabili abantu batendeke ukubwelelamo ku mwabo. Ilyo Shauli amwene abantu batendeka ukusalangana, ‘aninike ica kuninika ne fya mutende.’ Ico acitile calibipile mu menso ya kwa Yehova. Ilyo Samwele afikile, imfumu yatendeke ukuilungamika, yatile ico yafililwe ukumfwila ifyo ayebele ni co Samwele alikokwele, e mulandu wine ‘yapatikishiwe’ ukutuula ilambo pa kuti isengule icinso ca kwa Yehova. Ukutuula ilambo kwalicindeme sana ku Mfumu Shauli ukucila ukumfwila ifyo bayebele ukulolela Samwele aye atuule ilambo. Samwele aebele Shauli ukuti ico ucitile buwelewele sana pantu “taubakile ifunde lya kwa Yehova Lesa obe ilyo akwebele.” Ukukanaumfwila Yehova kwalengele Shauli bamufumye pa bufumu.—1 Samwele 10:8; 13:5-13.

 9. Bushe Shauli afililwe shani ukumfwila Lesa?

⁹ Bushe Imfumu yalisambilileko kuli ici? Nakalya! Pa numa Yehova aebele Shauli ukonaula abena Amaleke bonse pantu balisanshile abena Israele apabula umulandu. Shauli alingile ukonaula fye fyonse kumo ne fitekwa. Kwena alyumfwilile Yehova ilyo “aumine Amaleke ukutula pa Telemu [nelyo Habila] ukuyafika ku Shuri.” Lintu Samwele aishile ku kumukumanya, Shauli alitemenwe sana pa kucimfya abalwani kabili atile: “Mube aba paalwa kuli Yehova! Nimfishe cebo ca kwa Yehova.” Lelo, Shauli na bantu bakwe tabacitile fyonse ukulingana ne fyo babebele, babakile umweo wa Mfumu Agagi ne “fyawama ifyaina ifya mu mpaanga ne ng’ombe, na bana ba mpaanga, ne cisuma conse.” Imfumu Shauli yatampile ukuilungamika no kusosa aiti: “Abantu batengela ifyawama mu mpaanga ne ng’ombe, ku kuleke lambo kuli Yehova Lesa wenu.”—1 Samwele 15:1-15.

10. Lisambililo nshi ilyo Shauli afililwe ukusambilila?

¹⁰ Lyena Samwele aebele Shauli ukuti: “Bushe Yehova abekelwa mu fya kuninika na malambo, nga mu kuumfwa kwi shiwi lya kwa Yehova? Mona, ukunakila kwawamo kucile lambo, kabili ukuumfwa kwawamo kucila amafuta ya basukusuku.” (1 Samwele 15:22) Apo Yehova atile filya fitekwa fyawaminwe ukonaulwa, tafyalingile ukufipeela nga amalambo kuli Yehova.

Muleba ne Cumfwila Muli Fyonse

11, 12. (a) Bushe Yehova omfwa shani nga tuleibikilishako ukucita icisuma mu menso yakwe ilyo tulemupepa? (b) Bushe umuntu kuti aleibepa shani ukutila alacita ukufwaya kwa kwa Lesa uku ninshi taba ne cumfwila kuli Lesa?

¹¹ Ala Yehova alatemwa ukumona ababomfi bakwe aba cishinka baletwalilila ukumubombela te mulandu no kubacusha! Alomfwa bwino ukumona baletwalilila ukushimikila imbila nsuma ya Bufumu nangu cingati abantu tababikako amano! Na kabili alatemwa nga nshi ukumona balesangwa ku kulongana lyonse na lintu bali na mafya! Ukulaumfwila Lesa muli ifi kulalenga umutima wakwe ukusamwa! Nga ca kuti ukutemwa Yehova e kulelenga tuleibikilishako ukumupepa, Yehova alatasha nga nshi. Abantu limbi teti babikeko amano ku fyo tucita, lelo Lesa ena alamona ifyo tumubombela no mutima wesu onse kabili takalabe imilimo yesu.—Mateo 6:4.

¹² Nomba pa kuti twingafikapo ukutemuna Lesa, tufwile ukuba ne cumfwila muli fyonse. Tatufwile ukulaibepa ukutila kuti twapulako mu mafunde yamo yamo aya kwa Lesa cikulu fye tulebombesha mu mulimo wa kubila nelyo ukusangwa ku kulongana. Ica kumwenako fye, umuntu kuti alaibepa ukuti nga alelongana lyonse no kubomba imilimo iya kwa Lesa, Yehova kuti alabako fye nga alecita ubulalelale nelyo ifintu fimbi ifyabipisha. Ala mwandini ico kuti cabipa nga nshi!—Abena Galatia 6:7, 8.

13. Bushe kuti twaeshiwa shani ilyo tuli fweka?

¹³ Kanshi tulingile ukuipusha atuti, ‘Bushe naliba ne cumfwila kuli Yehova muli fyonse, nangu ni lintu kushili abalemona?’ Yesu atile: “Uwa cishinka ku cacepesha e wa cishinka na ku fingi, no ushalungama ku cacepesha e ushalungama na ku fingi.” (Luka 16:10) Bushe ‘twenda muli bumpomfu bwa mutima’ na lintu tuli ‘mu kati ka ng’anda yesu’ umo bambi bashingatumona? (Amalumbo 101:2) Ca cine, kuti twaeshiwa ilyo tuli mu ng’anda yesu. Mu fyalo ifingi umo bakwata bakompyuta mu mayanda calyanguka ukutamba ifintu ifya makankamike. Kale abantu tabalemona ifya musango yo nga tabele ku fikuulwa uko batambisha ifye shiku. Bushe twakulaumfwila amashiwi ya kwa Yesu ayatila: “Onse uwatwalilila ukulolesha umwanakashi no kumukumbwa, ninshi nacita kale ubucende nankwe mu mutima wakwe”? Bushe tukakaana ukulolesha pa fye shiku? (Mateo 5:28; Yobo 31:1, 9, 10; Amalumbo 119:37; Amapinda 6:24, 25; Abena Efese 5:3-5) Nga pa mafilimu ya pa TV umwaba ulukaakala? Bushe twaba nga Lesa wesu ‘uwapata uwatemwa ulufyengo nelyo ulukaakala’? (Amalumbo 11:5) Nga ukukolwa ilyo tuli fweka? Baibolo yalikaanya bucakolwa, kabili isoka Abena Kristu ukuti tabafwile ukulanwa “umwangashi uwingi.”—Tito 2:3; Luka 21:34, 35; 1 Timote 3:3.

14. Kuti twalanga shani ukuti twaliba ne cumfwila kuli Lesa mu fya ndalama?

¹⁴ Cimbi ico tufwile ukucenjelako ni mu fya ndalama. Ica kumwenako fye, bushe kuti twatendeka amakwebo ya kufwaya ukunonka bwangu ayaba fye kwati bupuupu? Bushe tulapula mu mafunde pa kuti fye twilipila imisonko? Nelyo bushe tulomfwila no mutima onse ili funde litila “peeleni bonse ifyo bafwile ukupeelwa, ku uulefwaya umusonko, peeleni umusonko”?—Abena Roma 13:7.

Ukutemwa e Kufwile Ukutulenga Ukuba ne Cumfwila

15. Mulandu nshi mwabela ne cumfwila kuli Yehova?

¹⁵ Ukulakonka ifishinte fya mu Baibolo kulalenga umuntu ukuipakisha amapaalo. Ica kumwenako fye, ukukanapeepa fwaka, ukukanacito bulalelale, no kulamona umulopa ukuti wa mushilo, kuti kwatucingilila ku kulwala amalwele yamo yamo. Na kabili, ukulakonka amafunde ya kwa Lesa muli fyonse ifyo tucita kuti kwatunonsha mu fya ndalama, mu bwikashi, nelyo mu fyo twikala mu ng’anda yesu. (Esaya 48:17) Yonse aya mapaalo yalanga ukuti ukulakonka amafunde ya kwa Lesa kwalicindama na muno nshiku. Lelo, icikalamba twabela ne cumfwila kuli Yehova ca kuti twalimutemwa. Tatubombela Lesa pa mulandu fye wa kuti tulamwenamo. (Yobo 1:9-11; 2:4, 5) Lesa atupangile ukuti tulesala ukumfwila uo fwe bene tulefwaya. Lelo, ico ifwe twasalilapo ukulaumfwila Yehova ni co tufwaya ukulamutemuna kabili tufwaya ukulacita icalungama.—Abena Roma 6:16, 17; 1 Yohane 5:3.

16, 17. (a) Bushe ukutemwa kwalengele shani Yesu ukulaumfwila Lesa no mutima onse? (b) Bushe kuti twapashanya shani Yesu?

¹⁶ Tufwile ukulapashanya Yesu pantu ena aleumfwila Yehova pa mulandu wa kuti alimutemenwe. (Yohane 8:28, 29) Ilyo Yesu ali pa calo, “asambilile icumfwila ku fintu aculileko.” (AbaHebere 5:8, 9) Bushe asambilile shani icumfwila? Yesu “aliiceefeshe kabili aishileba uwa cumfwila ukufika na ku mfwa, awe ukufika ku mfwa pa cimuti.” (Abena Filipi 2:7, 8) Nangu cingati Yesu ali ne cumfwila lintu ali ku muulu, ilyo aishile pe sonde alyeshiwe sana. Kanshi twalishinkisha ukuti alilinga ukuba Shimapepo Mukalamba pa Bena Kristu basubwa na pa Bena Kristu bambi aba cine.—AbaHebere 4:15; 1 Yohane 2:1, 2.

¹⁷ Nga ifwe, finshi twingacita pa kupashanya Yesu? Kuti twapashanya Yesu nga twaba ne cumfwila no kubika amano ku kucita ukufwaya kwa kwa Lesa. (1 Petro 2:21) Kuti twaba ne nsansa nga ca kuti ukutemwa Yehova e kulelenga tuleumfwila amafunde yakwe, na lintu tuleeshiwa nelyo lintu baletupatikisha ukucita ifyalubana. (Abena Roma 7:18-20) Ici cilesanshamo no kulaumfwila ubutungulushi bwa batutungulula mu kuteyanya kwa kwa Lesa nangu cingati tabapwililika. (AbaHebere 13:17) Ukulaumfwila amafunde yakwe na lintu bambi bashiletumona kwalicindama nga nshi kuli Yehova.

18, 19. Cinshi cifumamo nga tuleumfwila Lesa ne mitima yesu yonse?

¹⁸ Pali lelo ukumfwila Yehova kusanshamo ukushipikisha ilyo baletucusha pa kuti twingatwalilila aba cishinka kuli ena. (Imilimo 5:29) Na kabili, ukulaumfwila ifunde lya kwa Yehova ilya kushimikila no kusambilisha kusanshamo no kulashipikisha mpaka ne mpela ya buno bwikashi. (Mateo 24:13, 14; 28:19, 20) Nangu cingati limo kuti twaeshiwa nelyo ukuba na mafya, tufwile ukushipikisha no kutwalilila ukulalongana pamo na babwananyina. Lesa alamona ifyo tupitamo ne fyo tuibikilishako pa kuti fye tulemumfwila. Lelo pa kulaumfwila Yehova ne mitima yesu yonse, tufwile ukulwisha ulubembu ulwaba muli ifwe, ukupata icabipa no kutemwa icisuma.—Abena Roma 12:9.

¹⁹ Nga tubombela Yehova pa mulandu wa kuti twalimutemwa kabili tulatasha pa fyo atucitila, lyena tukaimwena fwe bene ukuti ni “kalambula wa bamufwaisha.” (AbaHebere 11:6) Ukutuula amalambo ayasuma kwalilinga kabili kulakabilwa, lelo ukumfwila Yehova no mutima onse pa mulandu wa kuti twalimutemwa e kumutemuna sana.—Amapinda 3:1, 2.

Kuti Mwayasuka Shani?

• Mulandu nshi twingasosela ukuti kwaliba ico twingapeela Yehova?

• Filubo nshi Shauli acitile?

• Kuti mwalanga shani ukutila mwalishininkisha ukuti icumfwila caliwama ukucila ilambo?

• Cinshi cilenga ukuti muleumfwila Yehova?

[Icikope pe bula 26]

Bushe dokota kuti aumfwa shani nga ca kuti umulwele talekonka ifyo amweba?

[Icikope pe bula 28]

Cinshi calengele ukuti Yehova aleke ukupaala Imfumu Shauli?

[Ifikope pe bula 30]

Bushe mulomfwila amafunde ya kwa Lesa na lintu muli mu kati ka ng’anda yenu?