Bushe ‘Mulalubulako Inshita’?

UMUTUMWA Paulo afundile Abena Kristu ba mu Efese aba mu mwanda wa myaka uwa kubalilapo ati: “E ico cenjeleni pa kwenda kwenu, te kwenda nga batumpa iyo, kano nga ba mano; mube ababomfye [“abalubule,” NW] nshita, ico ishi nshiku sha bubifi.” (Abena Efese 5:15, 16) Mulandu nshi uku kufunda kwalefwaikilwa? Pa kwasuka ici cipusho kano twaishiba ifyo Abena Kristu ba mu musumba wa pa kale balepitamo.

Efese yaishibikilwe ku fyuma ifingi, bucisenene, ukwanana kwa bumpulamafunde, no kupupe ifibanda. Na kabili, Abena Kristu bali no kushomboka pa kulwisha ifisumino fya mano ya buntunse pa lwa nshita. AbaGriki ba mu Efese abashali Bena Kristu tabasumine ukuti inshita ilola ku ntunga imo. Basambilile amano ya buntunse aya ciGriki ayaleti ubumi bulabwela cipya cipya. Umuntu nga aonaula inshita yakwe mu bumi bumo kuti aibwesha mu bumi bumbi. Ukutontonkanya kwa musango yu kwalengele Abena Kristu ba mu Efese ukukanasakamana ku fyo Yehova apenda inshita, na ku nshita ya bupingushi bwakwe. E co, uku kufunda kwa kwa Paulo ukwa ‘kulubulako inshita’ kwalilingile.

Paulo talelanda fye pa lwa nshita yonse. Ishiwi lya ciGriki abomfeshe lipilibula inshita iyalingwa, inshita ili no bufwayo bumo. Paulo alefunda Abena Kristu ba mu mwanda wa myaka uwa kubalilapo pa nshita iyabalingile, nelyo iyabawamine, iyo bakwete ilyo impela ishilaisa ne nkumbu sha kwa Lesa pamo ne pusukilo lyakwe tafilafumishiwapo.—Abena Roma 13:11-13; 1 Abena Tesalonika 5:6-11.

Tuleikala mu nshita iyapalako. Ukucila ukonaula iyi nshita ya luse iishakabwekeshiwepo mu kusupila umusamwe uli muli ci calo, Abena Kristu balabomfya inshita yabo mano mano muli “bukapepa” kabili balakosha bucibusa bwabo na Kabumba, Yehova Lesa.—2 Petro 3:11; Amalumbo 73:28; Abena Filipi 1:10.