Mulecita fye Ifyo Mwingakwanisha pa Kuti Muleba ne Nsansa

“NA UNO muku nafilwa!” Miku inga mwalandapo aya mashiwi pa mulandu wa kuti mwalifililwe ukucita ifyo mwalefwaya? Umwina Kristu wacaice uukwete umwana umunono nga nshi kuti alanda aya mashiwi pa mulandu wa kuti alanaka sana pantu inshita iikalamba abika amano ku mwana wakwe ica kuti alomfwa ubulanda ico alafilwa ukubika sana amano ku fingakosha bucibusa bwakwe na Lesa. E lyo Umwina Kristu umbi kuti alemona kwati tabomba imilimo ya mu cilonganino ukulingana na po engapesha. Ifyo bamukushishe e fingalenga alemona kwati tabomba ukufika apapelele amaka yakwe. Nte umukoloci nalimo kuti aba no bulanda pa mulandu wa kuti alefilwa ukubomba imilimo ya mu cilonganino nge fyo alebomba ilyo ali na maka. BaChristiane balafwaya sana ukulabombesha mu mulimo wa kwa Yehova, lelo ukusakamana ulupwa kwalenga ukuti balefilwa ukubomba ukulingana ne fyo bafwaya. BaChristiane batile: “Limo ndalila nga nakutika ku lyashi ililekoselesha ukubombako bupainiya.”

Finshi twingacita nga ca kuti na ifwe e fyo tumfwa? Bushe Abena Kristu bamo bacitile shani pa kuti batendeke ukulabomba ukulingana na po bengapesha? Busuma nshi bwaba mu kulacita fye ifyo twingakwanisha?

Mulecita fye Ifyo Mwingakwanisha

Umutumwa Paulo atweba ifyo tufwile ukucita pa kuti twingatwalilila ukuba ne nsansa. Atila: “Sekeleleni lyonse muli Shikulu. Ndetila kabili, Sekeleleni! Lekeni umutembo wenu wishibikwe ku bantu bonse.” (Fil. 4:4, 5) Nga tulefwaya ukulaba ne nsansa ilyo tulebombela Lesa, tufwile ukubomba fye ukulingana na papela amaka yesu. Ukulafwaya fye ukucita ifyo twishibe ukuti nangu tweshe shani te kuti tukwanishe ukuficita kuti kwalenga twalasakamana fye kabili kuti tulenaka twafuma na kwi fupa. Lelo, tufwile ukucenjela sana pa kuti tatutendeke ukutontonkanya ukutila tatufwile ukulabombesha pantu teti tukwanishe, ukulamona no tumafya utunono ngo mwa kubepekesha ica kuti twalabomba fye panono mu mulimo wa kushimikila.

Te mulandu na mafya twingakwata, Yehova enekela ifwe ukulabomba na maka yesu yonse, e kutila ukulamubombela no mweo wesu onse no mutima wesu onse. (Kol. 3:23, 24) Nga tatulebombela Yehova ukulingana na papelele amaka yesu, ninshi tatulefikilisha umulapo twalaile uwa kuipeela kuli ena. (Rom. 12:1) Na kabili, ninshi tuleipusula ubusuma bwaba mu kubombela Yehova, insansa sha cine, na mapaalo yambi ayo tuipakisha nga tulemubombela no mweo onse.—Amapi. 10:22.

Mu Baibolo ishiwi bapilibula ukuti “umutembo” lilasanshamo no kulangulukilako bambi. Lipilibula ukuba uwanakilila. (Yako. 3:17) Na kabili lisanshamo ukukanapampamina fye pa cintu cimo. E co, kanshi, nga tuli ba mutembo tukalacita fye ifintu ifyo twingakwanisha. Bushe kuti cayafya ukucite fyo? Bamo kuti cabakosela, nangu cingati bena limbi kuti balalangulukilako abanabo. Ica kumwenako fye, nga ca kuti umunenu uo mwatemwa sana alemoneka uwanaka nga nshi pa mulandu wa kuti acicilamo ukubombesha, bushe teti cibe bwino ukumweba ukuti alingile ukulabomba fye mu kulinga? Na ifwe bene tufwile ukulailuka bwangu nga twaumfwa ukuti tulebombesha ukucila mu cipimo.—Amapi. 11:17.

Nga ca kuti abafyashi besu baletubomfya sana ilyo twali abaice kuti cayafya ukulaishiba bwino ifyo twingakwanisha ukucita. Bamo ilyo bali abaice lyonse balebombesha sana ukutontonkanya ukuti e lyo bali no kutemwikwa ku bafyashi babo. Na ifwe nga e fyo batukushishe, ninshi nalimo tatwaishiba bwino bwino icalenga ukuti Yehova atutemwe. Ico Yehova atutemenwa ni co tumubombela no mutima onse. Icebo ca kwa Lesa citweba ukuti Yehova ‘aliishibe mibumbilwe yesu, ebukisho kuti tuli lukungu.’ (Amalu. 103:14) Alishiba ifyo tushingacita kabili alatutemwa nga tuli abacincila ilyo tulemubombela te mulandu no kuti tulafilwa ukukwanisha ukucita fimo. Ukulaibukisha ukuti Lesa enekela ifwe ukucita fye ifyo twingakwanisha kukatwafwa ukulabomba apapela amaka yesu mu mulimo atupeela.—Mika 6:8.

Nangu cingati Abena Kristu balishiba ukuti Lesa enekela bena ukucita fye ifyo bengakwanisha, bamo balafilwa ukulabomba ukulingana na papelele amaka yabo. Nga ca kuti na imwe e fyo mucita, mulandu nshi mushingepushisha Umwina Kristu wafikapo uwamwishiba bwino ukumwafwa? (Amapi. 27:9) Ica kumwenako fye, bushe mulafwaya ukuba painiya wa nshita yonse? Ubu buyo busuma nga nshi! Bushe cilamukosela ukufikilisha ubu buyo? Nalimo mulekabila aba kumwafwa ukwangusha imikalile yenu. Nelyo Umwina Kristu munenu uo mwacetekela limbi kuti alanshanya na imwe pa kuti mumone nga kuti calinga ukuba painiya wa nshita yonse nangu nga te kuti mukwanishe pa mulandu wa milimo ya kusakamana ulupwa iyo mukwete pali ino nshita. Kuti amwafwa ukumona nga mwingakwanisha ukulabomba bupainiya nelyo ukumwafwa ukumona ifyo mwingacita pa kuti mukalebomba bwino mu mulimo. Abalume nabo e bengalinga ukwafwa abakashi babo ukwishiba ifyo bengacita pa kuti balebomba ukulingana na papelele amaka yabo. Ica kumwenako fye, abalume kuti baeba abakashi babo ukutuushako ilyo umweshi uo bakabombeshamo sana ushilafika. Ukucita ifyo kuti nalimo kwalenga abakashi ukuba na maka kabili kuti kwalenga baleba ne nsansa ilyo balebomba umulimo wa kushimikila.

Mulepanga fye Ukucita Ifyo Mwingakwanisha

Ukukula nelyo ukulwala kuti kwalenga twalafilwa ukubomba imilimo imo iyo Yehova atupeela. Nga muli bafyashi, limbi kuti mulemona kwati muleipusula sana isambililo lya pa lwenu nelyo ukulongana kwa Bwina Kristu pa mulandu wa kuti mulepoosa inshita iikalamba na maka ku kusakamana abana banono. Bushe ukulatontonkanya sana pa fyo mushikwanisha ukucita kulalenga ukuti limo mulefilwa ukwishiba ifyo mwingakwanisha ukucita?

Akale sana, kwali umwina Lebi uwalefwaisha ukucita ifyo tali na kukwanisha. Alikwete ishuko lya kulabomba pe tempele imilungu ibili cila mwaka. Nangu cibe fyo, alefwaisha ukulaikala lyonse mupepi ne cipailo. (Amalu. 84:1-3) Cinshi calengele uyu mwaume wa cishinka ukuleka ukufwaya ifyo ashingacita? Ailwike ukuti ukuba mu mansa she tempele ubushiku fye bumo kwali lishuko ilikalamba. (Amalu. 84:4, 5, 10) Na ifwe bene, tatulingile ukulatontonkanya sana pa fyo tushingakwanisha ukucita, lelo tufwile ukwishiba ifyo twingakwanisha ukucita no kulatasha pali ifyo fine twacita.

Natulande pali nkashi Nerlande, uwikala mu Canada uwendela pa ncinga ya balemana. Uyu nkashi aleumfwa ubulanda pantu alefilwa ukubombesha mu mulimo wa kushimikila. Nangu cibe fyo, alilekele ukumfwa ubulanda lintu atendeke ukulashimikila lyonse pa matuuka ayali mupepi. Alanda ukuti: “Njikala pa ncinga yandi mupepi ne benchi. Ndaba ne nsansa ukushimikila ku bantu abesa mu kutushisha pe benchi.” Ukushimikila pa matuuka kulalenga baNerlande ukuba ne nsansa.

Alukeni umo Mwingakabila Ukwaluka

Umwela ulalenga ubwato ubwa matanga ukubutuka sana. Lelo, uuleensha ubwato nga amona ukuti kwaba icikuuku, alapatikishiwa ukubwesha amatanga. Te kuti aleshe icikuuku, lelo nga abwesha amatanga, kuti atwalilila ukwensha bwino ubwato. Cimo cine e cicitika na kuli ifwe, ilingi line tatukwata amaka ya kupwisha amafya tupitamo ayo twingapashanya ku cikuuku. Lelo kuti twaaluka mu fyo tucita ne fyo tutontonkanyapo. Nga tulecita fye ifyo twingakwanisha no kuleka ukulatontonkanya sana pa fyo tushingakwanisha ukucita, tukalaba ne nsansa pantu tukalabombela Lesa ukulingana na papelele amaka yesu.—Amapi. 11:2.

Ica kumwenako fye, nga tatukwete sana amaka, kuti twasengauka ukubomba imilimo iingatunasha ica kuti twafilwa no kusangwa ku kulongana mu cungulo. Nga tulecita ifi, tukalanonkelamo sana mu kulongana na mu kuba pamo na Bena Kristu banensu. Nelyo nkashi alelwalika umwana ica kuti afilwa no kuya mu kushimikila ku ng’anda ne ng’anda, nalimo kuti cawama aeba nkashi ukwisa ne sambililo lyakwe ku ng’anda pa kuti engabombako umulimo wa kushimikila ilyo umwana aleele.

Nga ca kuti mulafilwa ukupekanya fyonse ifyo mukasambilila ku kulongana kwa cilonganino, bushe kuti mwacita shani? Kuti mwamona ifyo mwingakwanisha ukupekanya no kufipekanya bwino sana. Nga twafilwa ukucita ifyo twacilafwaya e lyo twacita ifyo twamona ukuti e fyo twingakwanisha, tukatwalilila ukuba ne nsansa ilyo tulebombela Lesa.

Nga twafilwa ukufikilisha ifyo twalefwaya ukucita, pa kusanga fimbi ifyo twingakwanisha ukucita tufwile ukukosapo no kupampamina pa kucita ifyo fine twapingulapo. Amapange ya baSerge na bakashi babo baAgnès, abekala mu France, yalyalwike icine cine. BaSerge balanda ukuti: “Ilyo Agnès aimite, twaishileishiba ukuti capwa tatwakabe bamishonari, nge fyo twalefwaya.” Ino nshita baSerge baba na bana babili abakashana. Batila: “Apo te kuti tube bamishonari, twapingulapo ukulabomba nga filya fine ‘bamishonari’ babomba. Nomba twaba mu cilonganino umo balanda ululimi lwa ku calo cimbi.” Bushe balinonkelamo mu fyo bapingulapo ukucita? BaSerge batila: “Tulabomba imilimo yalekanalekana mu cilonganino.”

BaOdile, ni bankashi abali ne myaka ukucila pali 70, bekala ku France kabili balikwata ubulwele bwa mu mfyufyu ubwa mu makufi, kanshi tabeminina inshita iikalamba. Balifuupwike pantu ubulwele bwabo bwalengele ukuti belabombako umulimo wa kushimikila ku ng’anda ne ng’anda. Na lyo line, tabanenwike. Lelo, batendeke ukulashimikila pali lamya. Batila: “Ukushimikila pali lamya kwalyanguka kabili kusuma ukucila ifyo naletontonkanya!” Ukulashimikila lyonse pali lamya kwalenga ukuti batemwe sana umulimo wa kushimikila imbila nsuma na kabili.

Ukulacita fye Ifyo Mwingakwanisha Kulaleta Amapaalo

Nga tulecita fye ifyo twingakwanisha tatwakaleba no bulanda sana. Ilyo twapanga ukucita ifyo twingakwanisha, tulaba ne nsansa nangu cingati kwaliba fimo ifyo tushingakwanisha ukucita. Ici cilenga ukuti tuleba ne nsansa ilyo twacita fimo, nangu cingati finono fye.—Gal. 6:4.

Nga tulecita fye ifyo twingakwanisha, tukalalangulukilako sana na Abena Kristu banensu. Ukwishiba ukuti nabo te kuti bakwanishe ukucita ifintu fyonse kukalenga ukuti tukalebatasha sana pa fyo batucitila. Nga tuletasha pali conse ico bamunyinefwe batucitila, tukaba abaikatana kabili tukalaumfwana bwino. (1 Pet. 3:8) Mwilaba ukuti, Shifwe wa kutemwa, Yehova tatweba ukucita ifyo tushingakwanisha. Kabili nga tulecita fye ifyo twingakwanisha no kubika ubuyo ubo twingabomba ukulingana na papelele amaka yesu, tukalaba ne nsansa sana ilyo tukalabomba umulimo uo Yehova atupeela.

[Amashiwi pe bula 29]

Nga tulefwaya ukulaba ne nsansa ilyo tulebombela Lesa, tufwile ukubomba fye ukulingana na papela amaka yesu

[Icikope pe bula 30]

Ba Nerlande balaba ne nsansa pantu babomba umulimo wa kushimikila ukulingana na papelele amaka yabo

[Icikope pe bula 31]

“Mulebwesha amatanga”

[Abatusuminishe]

© Wave Royalty Free/age fotostock

[Icikope pe bula 32]

BaSerge na baAgnès balinonkelemo mu fyo bapingwilepo ukucita ilyo amapange yabo yaalwike