Palameni Kuli Lesa
Alitemwa Umulinganya
BUSHE balimufyengapo nelyo ukumucusha, nalimo ku muntu uwa kuti acita ifi ukwabula no kuti bamukande nelyo umwine ukubipilwa? Kwena cilakalipa nga nshi nga bamufyenga, maka maka uwamufyenga nga muntu uo mulemona ukuti alingile ukumutemwa nelyo ukumusakamana. Nalimo kuti mwaipusha amuti, ‘Mulandu nshi Lesa alekela ifya musango yu ukucitika?’a Icishinka ca kuti Lesa alipata ulufyengo lonse. Icebo cakwe, Baibolo, cilatweba ukutila abacita ulubembu ukwabula ukulapila tabakapusuke ilyo Lesa akabapingula. Natulande pa mashiwi ya mutumwa Paulo ayaba pa AbaHebere 10:26-31.
Umutumwa Paulo alembele ati: “Nga tulacita ulubembu ku mufulo fye pa numa ya kwishiba icine bwino bwino, ninshi takwashala na kabili ilambo nangu limo ilya pa membu shesu.” (Icikomo 26) Abantu ababembukila ku mufulo fye e balufyanya sana. Mulandu nshi? Umulandu wa kubalilapo wa kuti tababembuka pa mulandu wa kukanaishiba, filya bonse tulufyanya limo limo pa mulandu wa kukanapwililika. Bena balabembuka lyonse. Umulandu wa bubili wa kuti babembuka fye ku mufulo. Aba nomba balikunkuma ukucita ifyabipa. Umulandu wa butatu wa kuti ico babembukila te mulandu wa kukanaishiba iyo. ‘Balishiba icine bwino bwino’ pa kufwaya kwa kwa Lesa na pa fyo afwaya tulecita.
Bushe Lesa amona shani aba babembu abashilapila kabili abankalwe? Paulo atila “takwashala na kabili ilambo nangu limo ilya pa membu” shabo. Ilambo lya kwa Kristu, ilyaba bupe Lesa apeela abantunse, lilafimba pa membu tucita pa mulandu wa kukanapwililika. (1 Yohane 2:1, 2) Lelo abacita imembu ukwabula ukulapila balanga ukuti tabacindika ubu bupe bwawamisha. Lesa amona ukuti ‘balanyantaula Umwana wa kwa Lesa kabili bamona umulopa’ wa kwa Yesu ukuti “tawacindama sana.” (Icikomo 29) Ku micitile yabo, balanga ukuti tabacindika Yesu kabili bamona umulopa wakwe kwati “cintu ca fye,” kwati tawacindama ukucila umulopa wa bantunse bonse abashapwililika. (Diocese of Mbala) Abantu ba musango yu abashitasha te kuti bamwenemo mwi lambo lya kwa Kristu.
Cinshi cikacitikila ababifi? Lesa wa mulinganya alilaya ukuti: “Nine mfwile ukulandula; nine nkabweseshapo.” (Icikomo 30) Balya abatemwa ukucita ulubembu no kufyenga abanabo bafwile ukwishiba ukuti tapali nangu umo uwingapula mu mafunde ya kwa Lesa ku mufulo fye ukwabula ukukandwa. Ilingi, ababifi balacula pa mulandu wa membu shabo. (Abena Galatia 6:7) Nangu tabaculile pali ino nshita, bali no kulubulula kuli Lesa nomba line ilyo akesa mu kufumya ulufyengo lonse pa calo. (Amapinda 2:21, 22) Paulo asokele ukuti: “Ca kutiinya ukuwila mu minwe ya kwa Lesa wa mweo.”—Icikomo 31.
Ukusambilila ukuti Yehova Lesa tatemwa ababembukila ku mufulo kulasansamusha no kukoselesha, maka maka kuli balya abacula pa mulandu wa muntu uwakunkuma ku lubembu. Kuti twalekela Lesa ukwisalandula no kucetekela ukuti Lesa akacita ifi pantu alipata ulufyengo lonse.
[Futunoti]
a Nga mulefwaya ukumfwa na fimbi pa mulandu Lesa asuminishisha ukucula, belengeni pa mabula 106-114 mu citabo citila Bushe Cinshi Baibolo Isambilisha? icalembwa ne Nte sha kwa Yehova.