Amepusho Ukufuma ku Babelenga

Cinshi cilelenga “ifisuma fya mu nko shonse” ukwisa mu “ng’anda” ya kwa Yehova?—Hagai 2:7, NW.

Muli kasesema Hagai, Yehova asobele ukuti: “Nkatensha inko shonse, kabili ifisuma fya mu nko shonse fikesamo; na ine nkesusha iyi ng’anda no bukata.” (Hagai 2:7, NW) Bushe ukutensha “inko” e kulelenga “ifisuma” fya mu nko, e kuti abantu abafumacumi, ukwisa mu kupepa kwa cine? Ubwasuko ni iyo.

Taleni tontonkanyeni pa citensha inko e lyo na pa fifumamo. Baibolo itila ‘inko shaba mu cimfulumfulu na bantu ba mu nko bang’winta ica fye.’ (Amalumbo 2:1, NW) “Ica fye” ico ‘bang’winta,’ nelyo ukutontonkanyapo, kufwaisha kwabo ukwa kutwalilila ukuteka. Kanshi icitiinya imitekele yabo e cibatensha.

Umulimo wa Nte sha kwa Yehova uwa kushimikila pa Bufumu bwa kwa Lesa ubuleteka waba cintiinya ku nko. Na kuba, Ubufumu bwa kwa Lesa ubwa buMesia ubo Yesu Kristu abapo Imfumu “bukashonaula no kupesha . . . mabufumu yonse [aya bantunse].” (Daniele 2:44) Mu mulimo wesu uwa kushimikila mwaliba ubukombe ubwa kusoka abantu. Kanshi ubukombe tushimikila bulatensha inko. (Esaya 61:2) Kabili ilyo uyu mulimo wa kushimikila ulekulilako, inko shilatenkana nga nshi. Mulandu nshi twingasosela ukuti uku kutensha kwasobelwa pali Hagai 2:7 kwaba cishibilo?

Pali Hagai 2:6, [NW] tubelengapo ukuti: “Pantu e fyo Yehova wa milalo asosa, ‘Kucili inshita imo—inshita inono—kabili nkatensha imyulu ne calo na bemba no mulundu.’” Umutumwa Paulo ayambwile ici cikomo lintu alembele ukuti: “Alaya, ati: ‘Na kabili te sonde fye lyeka nkatenkanya lelo no muulu wine.’ Amashiwi ayatila ‘Na kabili’ yalangilila ukufumishiwapo kwa fintu ifiletenshiwa ifyalengwa, pa kuti ifintu ifishiletenshiwa [e kuti Ubufumu] fiikalilile.” (AbaHebere 12:26, 27) Kanshi, ubwikashi buno ubwabipa bukatenkana, e kuti bukonaulwa pa kuti Lesa akalete icalo cipya.

Abantu abafumacumi balesa mu kupepa kwa cine, lelo te kutensha inko kulenga. Icitensha inko, e cilenga no kuti abafumacumi baleisa mu kupepa Yehova, ne ci caba mulimo wa kushimikila pa Bufumu bwa kwa Lesa ubuleteka. Ukubila “imbila nsuma ya muyayaya” e kulenga abafumacumi ukwisa mu kupepa Lesa wa cine.—Ukusokolola 14:6, 7.

Ubukombe bwa Bufumu, bukombe bwa bupingushi kabili ubwe pusukilo. (Esaya 61:1, 2) Mu kubilisha ubu bukombe mwi sonde lyonse mufuma ifintu fibili: ukutensha inko e lyo no kwisa kwa fisuma fya mu nko ifipeela Yehova ubukata.