Bushe ‘Mulalolela’?

“Imwe mufwile ukuba abantu ba musango wa myendele ya mushilo ne milimo ya kuipeelesha kuli bukapepa, abalolela no kulaibukisha ukubapo kwa bushiku bwa kwa Yehova!”—2 PETRO 3:11, 12.

1, 2. Cilangililo nshi twingalanda pa lwa ‘kulolela’ ubushiku bwa kwa Yehova?

TUTILE ulupwa lulelolela abeni ku ca kulya. Inshita balefikilapo ilepalama lubilo lubilo. Abakashi balesondwelela ukupekanya ica kulya. Abalume na bana baleafwa ku kushininkisha ukuti fyonse fyapekanishiwa. Bonse nabatemwa. Ulupwa lonse lulefwaisha ukumona abeni kabili lulefwaisha ukuliila pamo na bo ifilyo fisuma no kubishanya na bene.

² Fwe Bena Kristu, tulelolela icacilapo ukucindama. Bushe ni cinshi? Ifwe bonse tulelolela “ubushiku bwa kwa Yehova”! Ukufikila bukafike, tufwile ukuba nga kasesema Mika, uwatile: “Lelo ine nakulalolela Yehova. Nakulalindilila Lesa we pusukilo lyandi.” (Mika 7:7) Bushe ico cipilibula ukwikala fye? Iyo. Kuli ifingi ifya kucita.

 3. Ukulingana na 2 Petro 3:11, 12, mibele nshi Abena Kristu bafwile ukukwata?

³ Umutumwa Petro atwafwa ukuba ne mibele isuma ilyo tulelolela. Atila: “Imwe mufwile ukuba abantu ba musango wa myendele ya mushilo ne milimo ya kuipeelesha kuli bukapepa, abalolela no kulaibukisha ukubapo kwa bushiku bwa kwa Yehova!” (2 Petro 3:11, 12) Moneni ukuti taletwishika umusango wa bantu tufwile ukuba. Petro taleipusha icipusho. Muli bakalata bakwe babili abapuutwamo na Lesa, alondolwele umusango wa bantu Abena Kristu bafwile ukuba. Kabili abakonkomeshe ukutwalilila ukuba ne “myendele ya mushilo ne milimo ya kuipeelesha kuli bukapepa.” Nangu ca kuti imyaka nalimo 30 yali naipita ukutula apo Yesu Kristu apelele icishibilo “ca mpela ya bwikashi,” Abena Kristu tabali na kuleka ukuba abalola. (Mateo 24:3) Bali no kuba “abalolela no kulaibukisha” ukubapo kwa bushiku bwa kwa Yehova.

 4. Cinshi casanshiwa mu “kulaibukisha ukubapo kwa bushiku bwa kwa Yehova”?

⁴ Ishiwi lya ciGriki ilyapilibulwa pano ati “ukulaibukisha” lipilibula “ukukalakasha.” Kwena tatwingalenga ubushiku bwa kwa Yehova ‘ukwangufyanya’ ukwisa. E ico, ‘tatwaishiba ubushiku nangu ni nshita’ ilyo Yesu Kristu akaleta ubupingushi pa balwani ba kwa Wishi. (Mateo 24:36; 25:13) Ulupapulo lumo lulondolola ati ishiwi lya “kukalakasha” lipilibula “‘ukulenga icintu ukwangufyanya’ e co lyayampana sana no kuba ‘uwapimpa, uwacincila, uwayangwako.’” E ico, Petro alekonkomesha abasumina banankwe ukufwaisha ubushiku bwa kwa Yehova. Kuti bacite ci pa kutwalilila ukwibukisha ubu bushiku. (2 Petro 3:12) Apo “ubushiku bwa kwa Yehova, ubukulu kabili ubwa kutiinya” nabupalama nga nshi, na ifwe tufwile ukuba ne mibele imo ine.—Yoele 2:31.

Beni ne “Myendele ya Mushilo” Ilyo Mulelolela

 5. Kuti twalanga shani ukuti tulefwaisha ukumona “ubushiku bwa kwa Yehova”?

⁵ Nga ca kuti tulefwaisha ukupusuka ubushiku bwa kwa Yehova, tukalange co ku “myendele ya mushilo ne milimo ya kuipeelesha kuli bukapepa.” Amashiwi ya kuti “imyendele ya mushilo” kuti yatucinkulako ulwa kukonkomesha kwa kwa Petro ukwa kuti: “Nga bana ba cumfwila, mwilengwa umwabela ulunkumbwa mwakwete kale mu kukanaishiba kwenu, lelo, umwabela Uwa mushilo uwamwitile, e fyo na imwe mube aba mushilo mu myendele yenu yonse, pantu calembwa aciti: ‘Beni aba mushilo, pantu ine ndi wa mushilo.”’—1 Petro 1:14-16.

 6. Pa kuba aba mushilo, cinshi tufwile ukucita?

⁶ Pa kuba aba mushilo, tufwile ukuba no musangwela mu fyo tutontonkanya, mu mibele, na lwa ku mupashi. Bushe tuleipekanishisha “ubushiku bwa kwa Yehova” pa kuba aba mushilo nga bantu abasenda ishina lya kwa Yehova? Lelo tacayanguka ukuba no musangwela wa musango yu pantu imibele mu calo ilebipilako. (1 Abena Korinti 7:31; 2 Timote 3:13) Bushe imibele yesu ilepusanininako fye ne ya bantu ba ku calo? Nga tailepusana, ninshi tufwile ukucitapo cimo. Bushe kuti caba ukuti ifipimo fyesu, nangu ca kuti fyaba pa muulu ukucila ifya ba ku calo, filebwelela pa nshi? Nga e fyo cili, tufwile ukucitapo cimo ku kulungika ifintu pa kuti tutemune Lesa.

7, 8. (a) Bushe kuti twalaba shani ubucindami bwa kuba ne “myendele ya mushilo”? (b) Finshi tufwile ukucita pa kulungika ifintu?

⁷ Pa mulandu wa kufula kwa fikope fye shiku pa Intaneti ne fyo umuntu engafitamba ukwabula bambi ukwishiba, bamo abashaletamba ifikope fye shiku nomba balesanga “ifikope fishaifulila ifya kulaala kwa mwaume no mwanakashi,” e fisosa dokota umo. Nga ca kuti twalatamba ifintu fya musango yu ifishili fya musangwela pa Intaneti, ninshi tulesuula ukufunda kwa Baibolo ukwa ‘kukanaikata icakowela.’ (Esaya 52:11) Bushe nga tulecite fyo ninshi ‘tuleibukisha ukubapo kwa bushiku bwa kwa Yehova’? Nelyo limbi tulefwaya ubushiku bwikafika bwangu, ukutontonkanya ukuti nangu twakowesha amatontonkanyo yesu ku fyabipa, tucili natukwata inshita ya kuisangulula fwe bene? Nga ca kuti twalikwata ubwafya bwa kutamba ifikope fye shiku, tufwile bwangu bwangu ukupaapaata Yehova ‘ukwalula amenso yesu yeba mu kuloleshe fya fye no kutulenga ukuba no mweo mu mibele yakwe’!—Amalumbo 119:37.

⁸ Icinabwingi ca Nte sha kwa Yehova, abaice na bakalamba, balekonka ifipimo fya kwa Lesa ifya pa muulu ifya mibele isuma kabili baletaluka ku kubeleleka kwabipa ukwa calo. Pa kwishiba ukuti tuli mu nshita she pamfya no kusoka kwa kwa Petro ukwa kuti “ubushiku bwa kwa Yehova bukesa ngo mupuupu,” batwalilila ukuba ne “myendele ya mushilo.” (2 Petro 3:10) Ifyo bacita filanga ukuti ‘balelolela no kwibukisha ukubapo kwa bushiku bwa kwa Yehova.’a

Beni ne “Milimo ya Kuipeelesha Kuli Bukapepa” Ilyo Mulelolela

 9. Bushe ukuipeelesha kuli bukapepa kulingile ukutulenga ukucita cinshi?

⁹ “Imilimo ya kuipeelesha kuli bukapepa” na yo yalicindama sana pa kwibukisha ubushiku bwa kwa Yehova. Mu “kuipeelesha kuli bukapepa” mwaba na katiina ka kuli Lesa akatulenga ukucita ifimutemuna. Ukuba na bucishinka kuli Yehova kutulenga ukubomba imilimo ya kuipeelesha kuli bukapepa. Afwaya “abantu ba misango yonse bakapusuke no kufika ku kwishiba bwino bwino icine.” (1 Timote 2:4) Lesa “tafwaya umuntu nangu umo ukonaulwa lelo afwaya bonse bafike ku kulapila.” (2 Petro 3:9) E co, bushe ukuipeelesha kuli bukapepa takufwile ukutucincisha ukulundako umulimo wesu uwa kwafwa abantu ukusambilila pali Yehova no kumupashanya?—Abena Efese 5:1.

10. Mulandu nshi tulingile ukuibakila ku “longolo lwa fyuma”?

¹⁰ Ubumi bwesu bukaba ubwaisulamo imilimo ya kuipeelesha kuli bukapepa nga ca kuti tulefwaya intanshi Ubufumu bwa kwa Lesa. (Mateo 6:33) Ici cisanshamo ukukanatemwisha ifya ku mubili. Yesu asokele ati: “Cenjeleni no kuibaka ku musango onse uwa lunkumbwa, pantu umuntu nangu fye akwate ifingi nga nshi, ubumi bwakwe tabwaba mu fintu ifyo akwata.” (Luka 12:15) Nangu cilemoneka kwati tatwingakopekwa ku ndalama, tufwile ukwishiba ukuti “amasakamika ya bwikashi buno no longolo lwa fyuma” kuti “fyatushe cebo” ca kwa Lesa. (Mateo 13:22) Tacayanguka ukusanga umwa kuliila. Mu fyalo fimo, abengi batontonkanya ukuti pa kuti bekale bwino, bafwile ukukuukila ku calo icikankaala, napamo ukusha ulupwa lwabo pa myaka iingi. Na bantu ba kwa Lesa bamo balitontonkanyapo ifyo. Nga baya ku calo cimbi, nalimo kuti bakumanisha ukupeela ulupwa lwabo ifya muno nshiku ifilekabilwa. Lelo, cinshi cingacitika kuli bumupashi bwa batemwikwa babo abashele? Ukwabula bumutwe bwine bwine pa ng’anda, bushe bakaba na bumupashi ubukabilwa ku kupusuka ubushiku bwa kwa Yehova?

11. Bushe umuntu umo uwaile ku kubombela ku calo cimbi alangile shani ukuti imilimo ya kuipeelesha kuli bukapepa yalicindama ukucile fyuma?

¹¹ Umuntu umo uwafumine ku Philippines no kuyabombela ku calo cimbi asambilile icine ku Nte sha kwa Yehova mu Japan. Pa numa ya kusambilila imilimo ya mu Malembo iyo umutwe wa lupwa akwata, akutulwike ukuti alekabila ukwafwa ulupwa lwakwe ukuba bakapepa ba kwa Yehova. (1 Abena Korinti 11:3) Umukashi wakwe uwashele ku Philippines talefwaya imipepele yakwe iipya kabili alefwaya ukuti atwalilile ukutuma indalama ukucila ukubwela no kusambilisha ulupwa ifisumino fya mu Baibolo. Lelo, pa mulandu wa nshita ye pamfya no kwangwa ayangwa batemwikwa bakwe, alibwelelemo. Ukutekanya kwakwe pa kwafwa ulupwa kwalengele ulupwa lwakwe ukumwenamo. Mu kuya kwa nshita, ulupwa lwakwe lwalikatene mu kupepa kwa cine, kabili umukashi wakwe atendeke ubutumikishi bwa nshita yonse.

12. Mulandu nshi tulingile ukubikila intanshi ifya ku mupashi mu bumi bwesu?

¹² Imibele tulimo kuti yapashanishiwa ku bantu abali mu cikuulwa cilepya. Bushe kuti cawama ukufwaya ukuyafumya ifipe mu cikuulwa cilepya icalabongoloka? Bushe, tacingacilapo ukucindama ukuipususha fwe bene ne ndupwa shesu na bambi abali mu cikuulwa? Kwena, buno bwikashi bubifi bulebutukila ku mpela, kabili abantu bali mu busanso. Apo twaishibe ci, tufwile ukubika intanshi ifya ku mupashi no kuba abapimpa mu mulimo wa kupususha uwa kushimikila pa Bufumu.—1 Timote 4:16.

Tufwile Ukuba “Ababula Akabi”

13. Bushe tufwaya ukuba shani ilyo ubushiku bwa kwa Yehova bukesa?

¹³ Pa kukomaila pa bucindami bwa kulolela, Petro asosa ukuti: “Mwe batemwikwa, apo mulelolela ifi fintu, ibikilisheniko ukuti [Lesa] akasuke akamusange ababula akabi kabili ababula akalema kabili mu mutende.” (2 Petro 3:14) Ukulunda pa kukonkomesha kwakwe ukwa kuba ne myendele ya mushilo ne milimo ya kuipeelesha kuli bukapepa, Petro akomaila na pa bucindami bwa kusangwa kuli Yehova abantu abasangululwa ku mulopa waumo mutengo uwa kwa Yesu. (Ukusokolola 7:9, 14) Ici cikabila umuntu ukutetekela ilambo lya kwa Yesu no kuba umubomfi wa kwa Yehova uwaipeela kabili uwabatishiwa.

14. Ukuba “ababula akabi” kusanshamo cinshi?

¹⁴ Petro atukonkomesha ukubombesha pa kusangwa “ababula akabi.” Bushe ifya kufwala fyesu ifya myendele ya Bwina Kristu no buntu bwesu fili ifyabula akabi, ukukanakantaikwa kuli cino calo? Ilyo twamona itoni pa ca kufwala cesu, ilyo line tulalifumyapo. Nga ca kuti ca kufwala twatemwisha e cikwete itoni, tulabikako sana amano ukufumyapo lilye toni. Bushe e fyo tuumfwa lintu ifya kufwala fyesu ifya Bwina Kristu fyakowela, pa mulandu wa cilubo mu buntu bwesu nelyo imyendele?

15. (a) Mulandu nshi abena Israele baali no kucitila inseela ku fisempe fya fya kufwala fyabo? (b) Mulandu nshi ababomfi ba kwa Yehova aba nomba bapusaninina na ba ku calo?

¹⁵ Abena Israele bali no kucita “inseela pa fisempe fya fya kufwala fyabo” no “kukako luseela lwa cisempe ne cisempe ku mwando wa kafifi.” Mulandu nshi? Pa kuti baleibukisha amalango ya kwa Yehova, ukuyakonka, no “kuba aba mushilo” kuli Lesa wabo. (Impendwa 15:38-40) Pamo nga babomfi ba kwa Yehova aba nomba, twalipusana ku ba ku calo pantu tukonka amalango ya kwa Lesa ne fishinte. Ku ca kumwenako, twaba aba musangwela mu mibele, twalishiba ukuti umulopa walishila, kabili tatupepo tulubi. (Imilimo 15:28, 29) Abengi balitupeela umucinshi pa kupampamina pa kukanaikowesha.—Yakobo 1:27.

Tufwile Ukuba “Ababula Akalema”

16. Cinshi casanshiwa mu kuba “ababula akalema”?

¹⁶ Petro asosa no kuti tufwile ukusangwa “ababula akalema.” Kuti twasangwa shani fyo? Itoni kuti lyafumishiwapo lelo te kalema. Akalema kalanga ukuti cimo nacilubana lwa nkati. Umutumwa Paulo akonkomeshe Abena Kristu banankwe mu Filipi ati: “Twalilileni ukucita ifintu fyonse ukwabula ukung’winta no kukansana, ukuti mube ababulo mulandu kabili aba kaele, abana aba kwa Lesa ababula akalema mu kati ka nkulo yapondama kabili iyapotama, muli iyo mulebalika nge fyengelo muno calo.” (Abena Filipi 2:14, 15) Nga ca kuti twakonka uku kufunda, tatwakabe abang’winta nelyo aba fikansa kabili tukabombela Lesa no buyo busuma. Ukutemwa Yehova na banensu kukatulenga ukushimikila “imbila nsuma iyi ya bufumu.” (Mateo 22:35-40; 24:14) Kabili, tukatwalilila ukubila imbila nsuma nangu ca kuti abantu abengi tabengomfwikisha umulandu tubomfesha inshita yesu ku kwafwa bambi ukusambilila pali Lesa ne Cebo cakwe, Baibolo.

17. Mulandu nshi tulingile ukufwaila ukutinamina imilimo mu cilonganino ca Bwina Kristu?

¹⁷ Pa kufwaisha ukusangwa “ababula akalema,” tufwile ukubebeta umulandu tulebombela iyo milimo. Twalileka ukucita ifintu pa mulandu wa bukaitemwe nga filya aba ku calo bacita, pamo ngo kutukuta ukunonka ifyuma nelyo amaka. Nga ca kuti tuletinamina imilimo mu cilonganino ca Bwina Kristu, natube no buyo busuma kabili lyonse natulecincishiwa no kutemwa twatemwa Yehova na bantu bambi. Cilawama ukumona abaume ba bumupashi ‘baletinamina bukangalila’ no kusekelela no kuicefya ku kufwaya ukubombela Yehova na basumina banabo. (1 Timote 3:1; 2 Abena Korinti 1:24) Cine cine, abafikapo ukubomba bueluda ‘bacema umukuni wa kwa Lesa ku kuitemenwa, te ku kutemwa ubunonshi bwa nsoni, kano ku kucincila, te ku kutitikisha abali ubupyani bwa kwa Lesa, kano ukuba ifya kumwenako ku mukuni.’—1 Petro 5:1-4.

Tufwile Ukuba “mu Mutende”

18. Mibele nshi Inte sha kwa Yehova baishibikilwako?

¹⁸ Mu kulekelesha, Petro atweba ukusangwa “mu mutende.” Pa kuti tucite ci, tufwile ukuba mu mutende na Yehova na banensu. Petro akomaila pa bucindami bwa ‘kutemwana nga nshi’ no kusunga umutende na Bena Kristu banensu. (1 Petro 2:17; 3:10, 11; 4:8; 2 Petro 1:5-7) Pa kuti tube no mutende, tufwile ukutemwana. (Yohane 13:34, 35; Abena Efese 4:1, 2) Ukutemwa kwesu no mutende filamoneka sana ilyo kwaba amabungano yesu aya pa kati ka fyalo. Pe bungano ku Costa Rica mu 1999, uwaleshitisha ifintu pa cibansa ca ndeke alikalipe pantu baNte ba kuli ici calo abaile mu kupokelela abaleisa kwi bungano mu kukanaishiba bacingile ifyo aleshitisha. Lelo ubushiku bwakonkelepo, amwene ukuti aba beni bapokelelwe ne citemwiko kabili mu mutende, nangu ca kuti tabamonanapo na baNte ba ku Costa Rica. Ubushiku bwa kulekeleshako, uyu shimakwebo na o atendeke ukupokelela aba beni kabili alombele isambililo lya Baibolo.

19. Mulandu nshi cacindamina sana ukukonkelela umutende na basumina banensu?

¹⁹ Ukufumaluka kwesu mu kukonkelela umutende na bamunyinefwe aba ku mupashi na bankashi kuti kwalanga ifyo tulolela ubushiku bwa kwa Yehova ne calo cakwe cipya ico alaya. (Amalumbo 37:11; 2 Petro 3:13) Tutile catukosela ukuba pa mutende no wasumina munensu. Bushe kuti twaelenganya ukuti tukekala nankwe mu mutende mu Paradaise? Nga ca kuti munyinefwe natufimbila, tufwile bwangu bwangu ‘ukuwikishanya nankwe.’ (Mateo 5:23, 24) Ukucite fyo kwalicindama nga tulefwaya ukuba pa mutende na Yehova.—Amalumbo 35:27; 1 Yohane 4:20.

20. Bushe ‘ukulolela’ kufwile ukumonekela mu nshila nshi?

²⁰ Bushe ifwe umo umo ‘tulelolela no kwibukisha ukubapo kwa bushiku bwa kwa Yehova’? Ukufwaisha ukumona impela ya bubifi kulangwa pa kuba aba mushilo muli cino calo ca bupulumushi. Kabili, ukufuluka ukwisa kwa bushiku bwa kwa Yehova no bumi mu kuteka kwa Bufumu, kumonekela mu milimo yesu iya kuipeelesha kuli bukapepa. Kabili ukwenekela ukwikala mu calo cipya ica mutende kumonekela mu kukonkelela umutende na bakapepa banensu nomba. Nga tulecite fi, tulanga ukuti ‘tulolela’ no “kulaibukisha ukubapo kwa bushiku bwa kwa Yehova.”

[Futunoti]

Bushe Muleibukisha?

• Cipilibula nshi “ukulaibukisha ukubapo kwa bushiku bwa kwa Yehova”?

• Bushe ‘ukulolela’ kulangwa shani mu myendele yesu?

• Mulandu nshi “milimo ya kuipeelesha kuli bukapepa” yacindamina?

• Cinshi tufwile ukucita pa kuti Yehova akatusange “ababula akabi kabili ababula akalema kabili mu mutende”?

[Icikope pe bula 11]

‘Ukulolela’ kumonekela mu myendele ya mushilo

[Ifikope pe bula 12]

Umulimo wa kushimikila pa Bufumu ulapususha

[Icikope pe bula 14]

Ilyo tulelolela ubushiku bwa kwa Yehova, natukonkelele umutende na bambi