Icebo ca kwa Yehova ca Mweo

Ifyo Twingafwaisha Ukwishiba mwi Buuku lya Ukusokolola—2

CINSHI cikacitikila abapepa Yehova Lesa e lyo na bashimupepa? Cinshi cikacitikila Satana ne fibanda fyakwe? Mapaalo nshi ayo abantu ba cumfwila bakapokelela mu Kuteka kwa kwa Kristu Ukwa Myaka 1,000? Ifyasuko kuli ifi ifipusho e lyo ne fipusho fimbi ifyacindama fyalilondololwa mwi buuku lya Ukusokolola 13:1–22:21.a Muli ifi ifipandwa e mwaba ifimonwa fya kulekeleshako 9 pali filya 16 ifyo umutumwa Yohane amwene mu 96 C.E.

Umutumwa Yohane alembele ati: “Alipaalwa uubelenga, na bomfwa amashiwi ya muli uku kusesema, na bakonka ifyalembwamo.” (Ukus. 1:3; 22:7) Ukulabelenga no kulakonka ifyo tulesambilila mwi buuku lya Ukusokolola kuti kwatucincisha ukulabombela Lesa, kuti kwalenga twakwata icitetekelo cakosa muli Lesa na mu Mwana wakwe Yesu Kristu, kabili kuti kwalenga twakwata ne subilo line line.b—Heb. 4:12.

IMBALE SHAFONKA 7 ISHA CIPYU CA KWA LESA SHAPONGOLOLWA

(Ukus. 13:1–16:21)

Pa Ukusokolola 11:18 patila: “Inko shena shakalipa, no bukali [bwa kwa Lesa] bwaisa, ne nshita ya kupingula . . . ne ya konaula abaleonaula isonde.” Pa kuti ico ubukali bwa kwa Lesa bwaishiile cishibikwe, icimonwa calenga 8 calondolola imilimo ya “ciswango . . . cali ne nsengo ikumi (10) ne mitwe cinelubali (7).”—Ukus. 13:1.

Mu cimonwa calenga 9, Yohane amona “Umwana wa mpaanga naiminina pa Lupili lwa Sione, kabili ali pamo na ba makana umwanda umo na makana amakumi yane na makana yane (144,000).” Aba “bashitilwe mu bantu.” (Ukus. 14:1, 4) Lyena pakonka imbila ya bamalaika 6. Mu cimonwa cakonkapo, Yohane amona “bamalaika cinelubali abali ne finkunka cinelubali.” Kwena, afwile ukuba ni Yehova e webele bamalaika ukupongolwela “ubukali bwa kwa Lesa” pa fyalekanalekana ifya mu calo ca kwa Satana. Mu mbale shafonka muli ubukombe no kusoka pa bupingushi ubo Lesa akaleta. (Ukus. 15:1; 16:1) Ifi ifimonwa fibili filalondolola sana pa bupingushi ubo Ubufumu bukaleta ubwakuma ukulisha ipenga lyalenga 7 no bucushi bwa citatu.—Ukus. 11:14, 15.

Amasuko ku Mepusho ya Mu Baibolo:

13:8—Bushe “ibuuku lya mweo ilya Mwana wa Mpaanga” libuuku nshi? Libuuku lya mampalanya umwaba amashina ya bakateka na Yesu Kristu mu Bufumu bwakwe ubwa mu muulu. Mwaba na mashina ya Bena Kristu basubwa abacili pano isonde, lelo abakwata isubilo lya kuya ku muulu.

13:11-13—Ni mu nshila nshi umo iciswango ca nsengo shibili cicitila ifintu kwati cing’wena no kulenga umulilo ukupona mu muulu? Pa mulandu wa kuti iciswango ca nsengo shibili, cilanda kwati cing’wena, cipilibula ukuti calitemwa sana ukutiinya, cilatitikisha abantu, kabili cilalulunkanya abantu pa kuti bengasumina ubutungulushi bwa ciko. Ici ciswango e fyalo fyakwatisha amaka, America na Britain. Cilenga umulilo ukupona mu muulu, pantu cilaifungushanya kwati ni kasesema wa cine, na pa mulandu wa kuti cilaitunga ukuti calicimfya ububi mu nkondo sha calo shibili isha muli ba 1900 no kuti calicimfya imitekele ya Komyunisimu.

16:17—“Lwelele” nshi apapongolwelwa ifyali mu mbale yafonka iyalenga cinelubali? “Ulwelele” nangu umwela cipilibula ukutontonkanya kwa busatana, “umupashi [amano] uyo nomba ubomba mu bana bacintomfwa.” Uyu mwela uwabipa nga sumu, abantu balaupeema mu calo ca kwa Satana conse fye.—Efes. 2:2

Ifyo Twingasambililako:

13:1-4, 18. “Iciswango” icimininako amabuteko ya bantunse ‘calefuma muli bemba,’ e kutila, muli cinkupiti walulunkana uwa bantunse. (Esa. 17:12, 13; Dan. 7:2-8, 17) Ici ciswango cafuma kuli Satana kabili e wacipeela na maka, cakwata inambala 666, ukulangilila ukuti calipelebela nga nshi. Ukwishiba bwino iciswango kulatwafwa ukukanacikonka nangu ukulacikumbwa no kupepa te kuti tulecipepa pamo nge ficita abantu abengi.—Yoh. 12:31; 15:19.

13:16, 17. Nangu ca kuti limbi kuti twakwata ubwafya pa kucita ifyapusanapusana cila bushiku, pamo nga ‘ukushita nangu ukushitisha,’ tatulingile ukuleka iciswango ukulatupatikisha ukucita ifintu ica kuti no kututungulula calatutungulula. Nga twasumina ukukwata ‘icishibilo ca ciswango pa kuboko nangu pa mpumi’ cimo fye no kusumina ukuti ciletweba ifya kucita nangu ukukuma imitontonkanishishe yesu.

14:6, 7. Ubukombe ubo bamalaika babila butusambilisha ukuti tulingile ukulabila imbila nsuma iya Bufumu ubwatendeka kale ukuteka mu muulu ukwabula ukulawayawaya. Tulingile ukwafwa abo tusambilisha Baibolo ukuba na katiina kuli Yehova no kulamulumbanya.

14:14-20. Ilyo inshita ya kuseepa “ifya kuseepa . . . pe sonde” ikapwa, e kutila, inshita ya kulonganika abakapusuka, e lyo malaika akapisha icikwakwa “umwa kukamina imyangashi umukalamba umwa bukali bwa kwa Lesa” no kulonganika “imyangashi iya pe sonde.” Imyangashi ya pe sonde, e kutila amabuteko yabipa aya kwa Satana pamo na “ifisansangu” ifya fisabo fyabipa ifya yako, fikonaulwa umupwilapo. Tulingile ukukosa pa kuti imyangashi ya pe sonde taitubeleleke.

16:13-16. “Ifyebo fyakowela” fimininako ubufi bwa fibanda fya kwa Satana ubo fibepa pa kuti nangu ubukali bwa kwa Lesa ubwaba mu mbale shafonka cinelubali bupongololwe, ishamfumu sha pe sonde shena te kuti shipilibuke, lelo kuti shatwalilila fye no bumankonso no kulalwisha Yehova.—Mat. 24:42, 44.

16:21. Ilyo impela ya cino calo ilepamina, mu kubila ubupingushi bwa kwa Yehova pa calo cabipa ica kwa Satana kuti mwaba na mashiwi yaluma nga nshi aya bupingushi bwa kwa Lesa, ubu ubupingushi napamo e bo imfula ya mabwe imininako. Na lyo line abantu abengi bakatwalilila fye ukulapontela Lesa.

IMFUMU IYACIMFYA YATENDEKA UKUTEKA

(Ukus. 17:1–22:21)

“Babiloni Mukalamba,” ukupepa kwa bufi konse ukwa mu calo, na yo ine kabungwe kabipa nga nshi aka calo cabipa ica kwa Satana. Icimonwa calenga 11 cilinganya Babiloni Mukalamba kuli “cilende mukalamba,” umwanakashi wa bulalelale ‘uwaikala pa ciswango icakashika ce.’ Ali no konaulwa umupwilapo ku “nsengo ikumi (10)” isha ciswango ico aikalapo. (Ukus. 17:1, 3, 5, 16) Mu cimonwa cakonkapo, uyu cilende apashanishiwa ku “musumba ukalamba,” kabili muli ici cimonwa babilisha no kuwa kwakwe no kweba abantu ba kwa Lesa ukuti balingile ukwangufyanya “ukufuma muli ena.” Abantu abengi balila no kuloosha pa kuwa kwa uyu musumba ukalamba. Lelo mu muulu mwaba ukusekelela pa mulandu wa “bwinga bwa Mwana wa mpaanga.” (Ukus. 18:4, 9, 10, 15-19; 19:7) Mu cimonwa calenga 13, uwanina pali “kabalwe wabuuta” aya mu kulwa ne nko kabili aonaula icalo ca kwa Satana.—Ukus. 19:11-16.

Nomba cinshi cikacitikila “icisoka ca pa kutendeka, e kutila Kaseebanya kabili Satana”? Ni lilali ilyo ‘akapooswa muli bemba wa mulilo’? Ico e cintu na cimbi icalandwapo mu cimonwa calenga 14. (Ukus. 20:2, 10) Ifimonwa fya kulekeleshako fibili filalanda patali patali pa fyo abantu bakekala ilyo Yesu akalateka pa Myaka 1,000. Ilyo ‘ukusokolola’ ifikacitika kwapwa, Yohane amona ‘umumana wa menshi ya mweo ulepita mu kati ka musebo uukalamba,’ kabili kwali ubwite ubusuma nga nshi ubwa kwita “onse uuli ne cilaka.”—Ukus. 1:1; 22:1, 2, 17.

Amasuko ku Mepusho ya mu Baibolo:

17:16; 18:9, 10—Mulandu nshi uo “ishamfumu sha pe sonde” shikabela no bulanda pali cilende uo ishiine shikapokolola fyonse no kumoca mu mulilo? Icikalenga ukuti bakabe no bulanda ca kuti nga bamonaula ninshi capwa pafiita bakaleka ukulamwenamo. Babiloni Mukalamba nga aonaulwa, e lyo nomba ishamfumu sha pe sonde shikamona ifyo Babiloni Mukalamba alebafwa. Pantu e walebafwa ukuti incitilo shabo isha kucusha abantu shilemoneka kwati shili fye bwino. Babiloni Mukalamba na kabili e walebafwa ukufwaya imisepela iya kuya ku nkondo. Kabili e walebombesha sana ku kulenga abantu ukunakila.

19:12.—Mulandu shi uo takwabela nangu umo uwaishiba ishina lya kwa Yesu ilishalumbulwa kano fye umwine? Cimoneka kwati ili ishina limininako icifulo cakwe ne milimo iyo akwata pamo nga ilya yalembwa pali Esaya 9:6, iyo abomba mu bushiku bwa kwa Shikulu. Takwaba nangu umo uwaishiba ishina lyakwe kano fye ena pa mulandu wa kuti imilimo yakwe yali-ibela nga nshi ica kuti ni ena fye eka e waishiba bwino ifyaba icifulo cakwe icikalamba nga nshi. Lelo kwena, Yesu tabomba fye eka iyi milimo alapeelako na baba mwi bumba lya kwa nabwinga wakwe, na kuba ‘alilemba ishina lyakwe ilipya pali bena.’—Ukus. 3:12.

19:14—Ni bani abakanina pali bakabalwe no kulakonka Yesu pa Armagedone? Abakaba pa ‘mabumba ya mu muulu’ abakailunda kuli Yesu pa nkondo ya kwa Lesa ni bamalaika pamo na basubwa abacimfya kabili abapokelela kale icilambu ca mu muulu.—Mat. 25:31, 32; Ukus. 2:26, 27.

20:11-15—Mashina ya bani ayalembwa mwi “buuku lya mweo”? Ili libuuku umwaba amashina ya bantu bonse abakakwata umweo wa muyayaya, pamo nga Abena Kristu abasubwa, aba mwi bumba likalamba, e lyo na babomfi ba cishinka aba kwa Lesa abakabuuka ku bafwa mu ‘kubuuka kwa balungama.’ (Imil. 24:15; Ukus. 2:10; 7:9) Abakabuukila ku mweo mu ‘kubuuka kwa bashalungama’ amashina yabo nabo bene yakalembwa mwi “buuku lya mweo” nga ca kuti fye babomba ukulingana ne ‘fyalembwa mu mabuuku’ ya mafunde ayakesulwa ilyo Kristu akalateka pa myaka 1,000. Lelo amashina, tayalembelwa na inki iishingafuutika. Amashina ya basubwa yalabelelela mwi buuku lya mweo nga baba fye aba cishinka mpaka ne mfwa. (Ukus. 3:5) Amashina aya bakapokelela umweo pe sonde yakabelelela mwi buuku lya mweo nga bapita pa bwesho bwa kulekelesha pa kupwa kwa Myaka 1,000.—Ukus. 20:7, 8.

Ifyo Twingasambililako:

17:3, 5, 7, 16. “Amano ayafuma ku muulu” yalatwafwa ukwishiba ‘inkama ya mwanakashi ne ya ciswango [cakashika ce] icamusendele.’ (Yak. 3:17) Pa kubalilapo fye ici iciswango ca mampalanya cali ni League of Nations e lyo kabili pa numa caisaba United Nations. Bushe ukusokololwa kwa iyi nkama takulingile ukutulenga ukuba abakosa mu kubila imbila nsuma iya Bufumu bwa kwa Lesa no kulabila pa lwa bushiku bwa bupingushi ubwa kwa Yehova?

21:1-6. Kuti twashininkisha ukuti cine cine amapaalo batulaya ilyo Ubufumu bwa kwa Lesa bukalateka yakafikilishiwa. Mulandu nshi? Pantu calilembwa pali aya mapaalo ukuti: “Fyonse nafifikilishiwa!”

22:1, 17. “Umumana wa menshi ya mweo” wimininako ukupekanya kwa kwa Yehova ukwa kuposha abantu ba cumfwila ku lubembu ne mfwa. Na muno nshiku mwine twalikwatako amenshi yanono aya musango yu. Tatulingile fye ukusumina ubu bwite bwa ‘kunwa amenshi ya mweo’ no mutima onse, lelo na ifwe tulingile ukuitemenwa ukulaitako na bambi.

[Amafutunoti]

[Icikope pe bula 5]

Ilyo Ubufumu bwa kwa Lesa bukalateka, abantu ba cumfwila bakapaalwa nga nshi!