Ifipusho Ukufuma ku Babelenga
◼ Bushe Yehova Lesa alandile kuli Adamu mu kulungatika, nelyo bushe alandile ukupitila muli Cebo, Umwana wafyalwa eka uwa kwa Lesa?
Baibolo taitupeela icasuko cakumanina kuli ici cipusho. Ilintu Lesa kuti pambi alandile mu kulungatika ku mwana wakwe umuntunse uwapwililika mu Edene, mu kupalako Aumfwene na Adamu ukupitila muli Cebo.
Baibolo ilingi line ilanda pa lwa kwa Lesa ukucita ifintu lintu mu cine cine aficitile ukupitila muli umo nelyo bamalaika bafulilako. Ku ca kumwenako, Ukutendeka 1:1 kutwebo kuti: “Ku kutendeka Lesa alengele umuulu na pano isonde.” E conse ico Baibolo yasosele pa kutendeka kwa kubumbwa konse, kuti pambi twasondwelela ukuti Lesa akubumbile mu kulungatika, kwati ni ku minwe yakwe iine. Amalembo ya Bwina Kristu aya ciGreek, nangu cibe fyo, yalakusha ukumfwikisha kwesu. Tubelenga ukuti: “Pantu muli wene [Umwana wa kwa Lesa] e mo fyalengelwe ifintu fyonse mu muulu na pano isonde, ifimoneka ne fishimoneka . . . kabili muli wene e mo fyonse fyakobenkana.” (Abena Kolose 1:16, 17) Amalembo yambi yashinina ulubali lwa Mwana mu kubumba ukubumbwa konse. (Yohane 1:3, 10; AbaHebere 1:1, 2) Nalyo line, ulubali lwakwe lwali pamo ngo wa kubomba na o uwacepako kuli Yehova, uwatendeke, ukukosha, no kutungulula ububumbo.—Ilumbo 19:1.
Lesa asosele ku muntu wa kubalilapo ukuti: “Umuti onse wa mwi bala, ukulya ulelyako.” (Ukutendeka 2:16, 17) Yehova talekabila icibombelo ca fyela nelyo ica elekitroniki, pamo nge ca kupishishamo iciunda nelyo radio ya matamba. Nga fintu Ulupungu lwa kwa Kalinda ulwa August 1, 1989, lwatile: “Umuntu tamwene uuli onse ulelanda. Ishiwi lyafumine ku bufumu bushimoneka, ubushalemoneka, kabili lyalelanda kuli wene. Lyali lishiwi lya kwa Kalenga wa muntu, Kabumba wakwe! . . . Umuntu takabile radio wa muno nshiku wa busayansi ku kumfwa ishiwi lya bulesa. Lesa alandile na wene mu kulungatika.”
Bushe Lesa alandile ukupitila muli malaika, nakalimo Logos, uwaishileba Yesu? Ico kuti cabe fyo. Ilintu tatalele fye, C. T. Russell alembele ukuti: “Yesu nakalimo aali Mwiminishi wa kwa Lesa mwi Bala lya Edene kuli Adamu.” (The Watch Tower, February 1, 1915) Umwana we beli uwa kwa Lesa abombele pa nshita ntali mu cifulo casansabikwa ica kwa Wishi nga “Cebo,” nelyo uwa Kulandilamo, kuli bamalaika na bantu. (Yohane 1:1; 12:49, 50; Ukusokolola 1:1, 2) E co nangu fye nga fintu icalembwa ca Ukutendeka cipisha ukwebekesha ukuti Lesa alandile mu kulungatika kuli Adamu aali eka, ico tacifumyapo ukulanda Kwakwe ukupitila muli malaika, ukusanshako Cebo, Umwana wa ku mulu uwa kwa Yehova. Ukucilisha ici kuti cabe fyo pa kulanguluka ukuti Yehova abomfeshe Logos ku kubumba umuntu mu kubalilapo, kabili uyo umo ‘alitemenwe ifintu ukusanshako na bana ba bantu.’—Amapinda 8:22, 31; Yohane 1:3.
Languluka, ku ca kumwenako, akashita lintu Mose aile ku Lupili lwa Sinai. Ukufuma 19:21-24 kushimika ukuti: “E lyo Yehova atile kuli Mose, . . . Kabili Mose atile kuli Yehova, . . . Na o Yehova atile kuli wene.” Lyene icalembwa ca kupeela Amalango Ikumi citendeka muli iyi nshila: “Kabili Lesa asosele ifyebo ifi fyonse.” (Ukufuma 20:1) Bushe ico caumfwika ngo kuti Lesa alelanda pa lwakwe amashiwi ya Amalango? Ukwebekesha kwa musango yo kuti kwasanga ukwafwilishiwa mu kuti twalyebwa ukuti Lesa alandile kuli Mose “impumi ne mpumi.”—Ukufuma 33:11, NW.
Nalyo line, twalikwata ukusokolola kwalundwapo pali ici. Umutumwa Paulo alembele pa lwa Amalango ukuti: “Yasonteelwe kuli bamalaika mu minwe ya kwa kawikishanya.” (Abena Galatia 3:19) Pa numa, Paulo mu kulungatika apusenye amakambisho Lesa apayenye mu Malango na cintu Abena Kristu bapokelele ukupitila muli Yesu. “Nge cebo icalandiilwe muli bamalaika cabe caikata, na conse ica bumpulamafunde ne ca bucintomfwa . . . , tukapusuka shani nga tatusakamene ipusukilo ilyakule fi? ilyabalilepo ukulanda Shikulu [Yesu], kabili lyaikashiwe kuli ifwe ku bamuumfwile.” (AbaHebere 2:2, 3) E co Lesa talandile amashiwi ya mu Malango mu kuba ne shiwi lyakwe line, nangu tabomfeshe Logos. Ukucila, asalilepo ukubomfya bamalaika bambi.
Cinshi cili icishinka ca kubalilapo, nangu ni fyo? Ilingi line lintu tubelenga pa lwa kwa Lesa ukulanda ku bantunse, tumona ukuti acitile fyo ukupitila mu fibumbwa fyakwe ifya ku mupashi ifya cumfwila ifyamulandileko. (Linganyeniko Ukutendeka 18:2, 3, 33; 19:1; Ukufuma 3:2-4; Abapingushi 6:11, 12, 20-22.) Ukwinikwa kwa kwa Yesu nga Cebo kutubulula ukuti aali e umo uo Lesa abomfeshe ilingi mu kumfwana ne fibumbwa fyakwe fimbi. Bushe ico casanshishemo umwana wa kwa Lesa uwapwililka Adamu? Mu cine cine.—Luka 3:38.
Ca cine ukuti lintu Logos pa numa aishile pe sonde, Wishi imiku itatu alandile mu kumfwika pa kuti uyu “Adamu wa kupelelekesha” engomfwa. (1 Abena Korinti 15:45; Mateo 3:16, 17; 17:1-5; Yohane 12:28-30) Pali utu tushita, mulandu nshi Lesa alingile ukulanda ku nelyo pa lwa Mwana wakwe uwaumo mutengo ukupitila muli malaika wa kuwikishanya? Mu kucilapo amano, Yehova kuti alanda mu kulungatika; Umwana wakwe uwapwililika, nangu fye bantunse bashapwililika abali mupepi, balyumfwile ishiwi lya kwa Lesa umwine. E co lintu umuntu wapwililika Adamu abumbilwe, Wishi wakwato kutemwa kuti pambi abombele mu kulungatika ne ci cibumbwa cipya. Nangu cibe fyo, mu cilolwa ca fyafumako, cili icamonekesha ukuti abomfeshe Cebo.