Abrahamu—Ashikilwe Pano, Lelo Bushe Acili Umumi?

Pa myanda ya myaka abaYuda, abaShilamu, na Bena Kristu balifika kuli cino cifulo.

Kuti mwatandalila cene mu musumba wa pa kale uwa Hebrone, ku kapinda ka ku kulyo aka Yerusalemu. Ici cikuulwa cainikwa Haram el-Khalil kabili Inshishi ya Fikolwe. Ee, ici calipokelelwa ku cinabwingi nge cifulo apashikilwe ifikolwe Abrahamu, Isaki, na Yakobo, capamo na bakashi babo Sara, Rebeka, na Lea.

Ibukisheni ukufuma muli Baibolo ukuti pa mfwa ya mukashi wakwe uwatemwikwa, Sara, Abrahamu ashitile ininga pamo nge cifulo ca kushikapo ne mpanga imo pa Makpela, mupepi na Hebrone. (Ukutendeka 23:2-20) Pa numa, Abrahamu na o wine ashikilwe pano, nge filundwa fimbi ifya lupwa. Imyanda ya myaka pa numa ya ico, mupepi ne nshishi ya cishilano, Herode Mukalamba akulilepo icikuulwa calulubala ico mu kupita kwa nshita cayalwilwe no kukushiwako kuli bakacimfya, ku kubelebesha imimwene yabo ine iya butotelo.

Lintu mwaingila, mwamona ifyaimikwa mutanda (ifibumbili nelyo inshishi shabulamo akantu). Icibikilwe mu kati cilelangilila icaimikwa cimo ica kwa Isaki, umwana wa kwa Abrahamu. Mupepi na cene pali ifilindi ifyaimbwa ukuya pa nshi, ifyabomfiwa ku kuyafika ku fyaba pa nshi. Bakasapika balisanga imiputule iyo pambi yalimo amafupa ayengi aya pa kale.

Ni shani pa lwa kwa Abrahamu? Nga ca kuti alaalikwe mu ninga nomba iyaba pa nshi ya ici cifulo, alifwa kale, bushe te ifyo? Abatandashi abengi kuti basumina. Lelo kasesema uwacila pali Abrahamu atile mu mano yamo Abrahamu acili umumi. Mu nshila nshi? Kabili kwambukila nshi uko ici cingakwata pa citetekelo cenu?

Twapaapaata belengeni icipande cileti “Abatemwikwa Bobe Abafwa—Ni kwi Baba?” (Ibula 3) Cilelangilila cintu kasesema mukalamba asosele pa lwa kuba kwa kwa Abrahamu umumi, ifyebo ifingaba ifya bucindami bukalamba kuli imwe na ku lupwa lwenu.