Fundeni Abana Benu

Rebeka Ali-itemenwe Ukucita Ifyo Yehova Alefwaya

ISHINA lya kuti Rebeka lyaliseeka sana. Bushe walishibako umuntu uwakwata ili shina?—a Rebeka ali muntu uwacindama nga nshi uwalembwa mwi buuku ilyaishibikwa sana pano calo, ne li buuku ni Baibolo. Finshi waishibapo pali Rebeka?—Tufwile ukusambilila pali Rebeka pantu ifyo acitile kuti fyatwafwa ukubombela Lesa wa cine Yehova.

Rebeka e mwanakashi walenga bubili uwalumbulwa muli Baibolo uwali kapepa wa cine uwa kwa Yehova. Bushe walishiba umwanakashi wabalilepo ukuba kapepa wa cine uwa kwa Yehova?—Ni Sara, umukashi wa kwa Abrahamu. Ilyo Sara ali umukote aishilekwata Isaki, kabili uyu e mwana fye akwete. Natumone ifyo Rebeka aitemenwe ukucita ukufwaya kwa kwa Yehova ne fyo cali pa kuti opwe kuli Isaki.

Palipitile imyaka ukucila 60 ukutula apo Lesa aebele Abrahamu na Sara ukuti bafume mu calo ca Harani no kuya ku calo ca Kanaani. Ilyo Abrahamu na Sara bakotele sana, Lesa abalaile ukuti bakakwata umwana uo bali no kwinika ukuti Isaki. Nga fintu fye na iwe wingenekela, Isaki balimutemenwe sana ku bafyashi bakwe. Ilyo Sara afwile, ali ne myaka 127, apa ninshi Isaki mukalamba kabili alyumfwile sana ubulanda ilyo banyina bafwile. Abrahamu talefwaya Isaki ukuupa umwanakashi umwina Kanaani pantu abena Kanaani tabalepepa Yehova. E ico atumine umubomfi wakwe, napamo Eliesere, ukuyafwaila Isaki umukashi pali balupwa lwa kwa Abrahamu abali ku Harani, ukwalepele amakilomita 800!—Ukutendeka 12:4, 5; 15:2; 17:17, 19; 23:1.

E fyo Eliesere na babomfi bambi aba kwa Abrahamu bafikile ku Harani, ninshi nabasenda ne mpunda 10 ishasendele ifya bupe ifyalekanalekana. Baiminine pa cishima ca menshi pantu Eliesere alishibe ukuti inshita ya kasuba e yo abantu batemenwe ukuya mu kutapa amenshi ya ndupwa shabo ne fitekwa. Lyena Eliesere apepele ukuti uo alasala ukuba umukashi wa kwa Isaki, mukashana wa kuti nga amulomba amenshi ya kunwa, asuke ukuti: “Nwenimo, nalamunwensesha ne ngamila.”

Ifi fine e fyacitike! Rebeka, “umwanakashi uwayemba icine cine” alishile ku cishima mu kutapa amenshi. Ilyo Eliesere amulombele amenshi ya kunwa, Rebeka atile: “Ne ngamila shenu na sho ndeshitapila.” Ilyo alebutuka, “aleti atapa abwekela ku cishima ku kutapa amenshi na yambi,” Eliesere alemulolekesha fye “ninshi napapa.” Tala elenganya! Pa kuti fye icilaka ca ngamila cipwe, Rebeka alingile ukushitapila amenshi ukufika ku malita 1,000!

Eliesere apeele Rebeka ifya bupe ifisuma nga nshi, kabili aishileishiba ukuti Rebeka mwana wa kwa Betuele, lupwa wa kwa Abrahamu. Rebeka aebele Eliesere na banankwe ukuti baye ku ng’anda ku mwabo e ko ‘bayesendama.’ Lyena abutukile ukuya mu kweba balupwa lwakwe ukuti Abrahamu natuma abeni abafumine ku Kanaani abeshile mu kubamona.

Ilyo Labani, ndume ya kwa Rebeka amwene ifya bupe ifya mutengo ifyo bapeele nkashi yakwe kabili ilyo aishibe no kuti Eliesere ali mubomfi wa kwa Abrahamu, alimwingishe mu ng’anda. Lelo Eliesere atile: “Nshalye kano nsose ifyo nyendeele.” Lyena alandile ifyo Abrahamu amutumine. Betuele no mukashi wakwe e lyo na Labani balitemenwe kabili balisumine ukuti Rebeka opwe kuli Isaki.

Pa numa ya kulya, Eliesere pamo na bantu ali na bo balisendeme. Ilyo bwacele, Eliesere atile: “Ndekeni nje kuli shikulu.” Lelo banyina ba kwa Rebeka na ndume yakwe balefwaya ukuti bekaleko “inshiku fye 10.” Ilyo baipwishe Rebeka nga ca kutila alefwaya ukuya na Eliesere lilya line, ayaswike ukuti, “Ee ndeya nankwe.” Awe ilyo line Rebeka aliile na Eliesere. Ilyo bafikile, Rebeka aishileba umukashi wa kwa Isaki.—Ukutendeka 24:1-58, 67.

Bushe uletontonkanya ukuti Rebeka calimwangukile ukusha balupwa lwakwe ne fibusa no kuya ku cifulo ukutali, ukwa kuti limbi tali na kumonapo balupwa lwakwe ne fibusa na kabili?—Awe tacamwangukile. Lelo Rebeka alipaalilwe pantu ali-itemenwe ukucita ifyo Yehova alefwaya. Aishileba icikolwe umwaishilefyalilwa Umulubushi wesu, Yesu Kristu. Na ifwe bene tukapaalwa nga tuleitemenwa ukucita ifyo Yehova afwaya, nga filya Rebeka acitile.—Abena Roma 9:7-10.

[Futunoti]

AMEPUSHO:

▪ Bushe Rebeka ali nani, kabili ni kwi bakumene na Eliesere?

▪ Mulandu nshi Abrahamu ashalefwaila ukuti Isaki ope umwanakashi umwina Kanaani?

▪ Finshi Rebeka acitile ifyalangile ukuti ali no kuba umukashi umusuma?

▪ Finshi tufwile ukucita pa kuti tupashanye Rebeka?