“Israele wa kwa Lesa” ne “Bumba Likalamba”

“Naliloleshe, moneni, kwali ibumba likalamba ilishingapendwa ku muntu nangu umo.”—UKUSOKOLOLA 7:9.

1-3. (a) Filolelo nshi ifya bukata ifya ku muulu ifyo Abena Kristu basubwa bakwata? (b) Ni shani fintu Satana aonawile icilonganino ca mu mwanda wa myaka uwa kubalilapo? (c) Cinshi cacitike mu 1919 icalangile ukuti ukubombesha kwa kwa Satana ku kubosha icilonganino ca Bena Kristu basubwa kwalifililwe?

UKWIMIKAKO “Israele wa kwa Lesa” mu 33 C.E. kwali ni ncitilo ikalamba mu kufikilishiwa kwa mifwaile ya kwa Yehova. (Abena Galatia 6:16) Ifilundwa fya uko ifyasubwa bakwata isubilo lya kuba ifibumbwa fya ku mupashi ifya bumunshifwa no kuteka na Kristu mu Bufumu bwa kwa Lesa ubwa ku muulu. (1 Abena Korinti 15:50, 53, 54) Muli cilya cifulo babomba nga basolwesolwe mu kushishe shina lya kwa Yehova no kushonaula umutwe wa Cibambe cikalamba, Satana Kasebanya. (Ukutendeka 3:15; Abena Roma 16:20) E mulandu wine kanshi Satana acitile apo engapesha ku konaula ici cilonganino cipya, ukubomfya inshila shonse shibili ukupakasa cene no kwesha ukucibosha!—2 Timote 2:18; Yuda 4; Ukusokolola 2:10.

² Ilintu abatumwa bali bacili aba mweo, Satana alifililwe ukutunguluka. Pa numa ya mfwa yabo, nangu cibe fyo, ubusangu bwalisalangene ukwabulo kucilimwa. Mu kupelako, ukulingana ne mimwene ya buntunse, icilonganino casanguluka ica Bwina Kristu icaimikwe na Yesu camoneke nge caboshiwe lintu Satana aleteleko imipepele ya busangu iyabotelela iyaishibikwa ilelo nga Kristendomu. (2 Abena Tesalonika 2:3-8) Nangu ni fyo, ubuKristu bwa cine bwalitwalilile.—Mateo 28:20.

³ Mu cilangililo cakwe ica ngano na mankumba, Yesu asobele ukuti Abena Kristu ba cine pa ciputulwa cimo ica nshita baali no kukulila capamo na “mankumba,” nelyo Abena Kristu ba bufi; kabili ici calicitike. Lelo na kabili asosele ukuti mu nshiku sha kulekelesha, “abana baume ba bufumu” baali no kumoneka na kabili mu kuibela ukufuma ku “mankumba.” (Mateo 13:36-43) Ici na co e fyo caishileba. Mu 1919 Abena Kristu ba cine abasubwa balifumine muli bunkole bwa Babiloni. Lesa alibeshibishe ngo “musha wa cishinka kabili uwashilimuka,” kabili mu kushipa batendeke ukushimikila imbila nsuma iya Bufumu. (Mateo 24:14, 45-47; Ukusokolola 18:4) Mupepi na bonse bene baali Bena fyalo; lelo pa mulandu wa kuti balikwete icitetekelo ca kwa Abrahamu, mu cine cine baali ‘bufyashi bwa kwa Abrahamu.’ Baali filundwa fya “Israele wa kwa Lesa.”—Abena Galatia 3:7, 26-29.

“Ibumba Likalamba”

 4. Libumba nshi ilya Bena Kristu ilyaishile mu kumoneka, ukucilisha muli ba 1930?

⁴ Mu kutendekelako, abo abayankwile ku kushimikila kwa aba Bena Kristu basubwa na bo bene babele abena Israele ba ku mupashi, abashalapo ba ba 144,000, abakwate subilo lya ku muulu. (Ukusokolola 12:17) Nangu cibe fyo, ukucilisha muli ba 1930, ibumba na limbi lyalishilemoneka. Aba baishibikwe nge “mpaanga shimbi” isha mu cilangililo ca macinka ya mpaanga. (Yohane 10:16) Baali basambi ba kwa Kristu abakwete isubilo lya bumi bwa ciyayaya pe sonde lya paradise. Baali bufyashi bwa ku mupashi, ukucilandila muli iyo nshila, ubwa Bena Kristu basubwa. (Esaya 59:21; 66:22; linganyako 1 Abena Korinti 4:15, 16.) Baishibe icilonganino ca Bwina Kristu ica basubwa ngo musha wa cishinka kabili uwashilimuka, kabili ukupala bamunyinabo abasubwa, balitemenwe Yehova mu kushika, batetekele mwi lambo lya kwa Yesu, baali abapimpa mu kulumbanya Lesa, kabili baliitemenwe ukuculila ubulungami.

 5. Ni shani fintu icifulo ca mpaanga shimbi caisa mu kumfwika bwino panono panono?

⁵ Pa kubalilapo tabaumfwikishe bwino icifulo ca ishi mpaanga shimbi, lelo ilyo inshita yalepita, ifintu fyaishileumfwika. Mu 1932 Abena Kristu basubwa bakoseleshiwe ukucincisha impaanga shimbi ukwakana mu mulimo wa kushimikila—ico impaanga shimbi ishingi kale kale balecita. Mu 1934 impaanga shimbi shakoseleshiwe ukuinashisha ku lubatisho lwa mu menshi. Mu 1935 baishileishibikwa nge “bumba likalamba” ilya mu Ukusokolola icipandwa 7. Mu 1938 balilaalikwe ukusangwa ku Cibukisho ca mfwa ya kwa Yesu Kristu nga ba kutambako. Mu 1950 abaume bakosoka pali bene bamwenwe ukuba pa kati ka “bacilolo” ababomba ngo “mwa kufisama ku mwela, ngo mwa kubelama ku kupongoloka kwa mfula.” (Ilumbo 45:16; Esaya 32:1, 2) Mu 1953, ukuteyanya kwa kwa Lesa ukwa pe sonde—pali ilya nshita ulubali lukalamba lwapangilwe ne mpaanga shimbi—kwamwenwe nge cifulo ca pa kati ica sosaite wa pe sonde uukabako mu calo cipya. Mu 1985 caumfwikilwe ukuti pa cishinte ce lambo lya cilubula ilya kwa Yesu, impaanga shimbi balalungamikwa nge fibusa fya kwa Lesa kabili mu kuba ne cilolwa ca kupusunsuka Armagedone.

 6. Kwampana nshi kwabako pa kati ka basubwa ne mpaanga shimbi ilelo, kabili fipusho nshi fileimako?

⁶ Ukufika pali nomba, muli cino ciputulwa ca kupelako ica “nshiku sha kulekelesha,” ubwingi bwa ba 144,000 balifwa no kupokelela icilambu cabo ica ku muulu. (2 Timote 3:1; Ukusokolola 6:9-11; 14:13) Abena Kristu ababa ne subilo lya pe sonde nomba e balebomba umulimo ukalamba uwa kushimikila, kabili bacipenda nge shuko ukwafwilisha bamunyina basubwa aba kwa Yesu muli uyu mulimo. (Mateo 25:40) Nangu cibe fyo, aba abasubwa e musha wa cishinka kabili uwashilimuka mu o ica kulya ca ku mupashi capayanishiwilwa ukupulinkana shino nshiku sha kulekelesha. Cikaba shani ku mpaanga shimbi lintu abasubwa bonse bapokelela icilambu cabo ica ku muulu? Kupayanya nshi lyene kukacitwa ku mpaanga shimbi? Mu kwipifya ukulanguluka Israele wa ku kale kwalatwaafwa ukwasuka ifyo fipusho.

Icipasho ca “Bufumu bwa Bashimapepo”

7, 8. Kufika ku cipimo nshi Israele wa pa kale abele ubufumu bwa bashimapepo kabili uluko lwa mushilo pe samba lya cipingo ce Funde?

⁷ Lintu Yehova asalile Israele ngo luko lwakwe ulwaibela, acitile icipingo na bene, ukusoso kuti: “Ukuumfwa nga mwakulaumfwe shiwi lyandi, no kubake cipope candi, ninshi mwakulaba kuli ine icikwatwa icaibela mu bantu na ’bantu bonse (pantu icalo conse candi): na imwe mwakulaba kuli ine ubufumu bwa bashimapepo kabili uluko lwa mushilo.” (Ukufuma 19:5, 6) Abena Israele baali bantu baibela aba kwa Yehova pa cishinte ca cipingo ce Funde. Nangu ni fyo, ni shani fintu ubulayo bwabimbilemo ubufumu bwa bashimapepo no luko lwa mushilo bwali no kufikilishiwa?

⁸ Lintu Israele abele uwa busumino, aishibe bumulopwe bwa kwa Yehova no kupokelela wene nge Mfumu yabo. (Esaya 33:22) Muli fyo, baali bufumu. Lelo, nga fintu casokolwelwe pa numa, ubulayo pa lwa “bufumu” bwali no kupilibula ifyacila na pali ico. Mu kulundapo, lintu baumfwilile Ifunde lya kwa Yehova, baali abasanguluka, abapaatulwako ku nko shabashingulwike. Baali luko lwa mushilo. (Amalango 7:5, 6) Bushe baali bufumu bwa bashimapepo? Cisuma, mu Israele umukowa wa kwa Lebi walipaatwilweko ku kubomba imilimo ya pe tempele, kabili mu kati na nkati ka ulya mukowa mwalimo ibumba lya bashimapepo aba bwina Lebi. Lintu Ifunde lya kwa Mose lyaimikwe, kwaliko ukukabushanya kwa bena Lebi abaume na mabeli ya ndupwa shishali sha cina Lebi.a (Ukufuma 22:29; Impendwa 3:11-16, 40-51) Muli ifyo, ulupwa lonse muli Israele, ukucilandila mu mampalanya, lwalimininweko mu milimo ya pe tempele. E nshila fye yapalamisha iyo uluko lwabelelemo ulwa bushimapepo. Nangu ni fyo, baiminineko Yehova ku nko. Umuntu umbi umbi uuli onse uwafwaile ukupepa Lesa wa cine aali umuntungwa ukucite co pa kubishanya na Israele.—2 Imilandu 6:32, 33; Esaya 60:10.

 9. Cinshi calengele Yehova ukukaana ubufumu bwa ku kapinda ka ku kuso ubwa Israele ‘ku kuba bashimapepo kuli wene’?

⁹ Pa numa ya mfwa ya kwa Solomone, abantu ba kwa Lesa balyakanikene mu luko lwa ku kapinda ka ku kuso ulwa kwa Israele pe samba lya Mfumu Yeroboamu no luko lwa ku kapinda ka ku kulyo ulwa kwa Yuda pe samba lya Mfumu Rehoboamu. Apantu itempele, icifulo ca pa kati ica kupepa kwasanguluka, lyali mu cifulo ca kwa Yuda, Yeroboamu aimikeko umusango wa kupepa uushali wa mwi funde pa kwimikako ifipasho fyabaswa mu cifulo ca luko lwakwe lwine. Mu kulundapo, “acitile imisansama amayanda ya kupepelamo, no kucita bashimapepo, ukubasala mu bantu bonse, abashali ba mu bana baume ba kwa Lebi.” (1 Ishamfumu 12:31) Uluko lwa ku kapinda ka ku kuso lwalitotobele mu kupepa kwa bufi ukwacilanapo lintu Imfumu Ahabu yasuminishe umukashi wa iko umwina fyalo, Yesebele, ukwimikako ukupepa Baali mu calo. Mu kupelako, Yehova abilishe ubupingushi pa bufumu bwa bucipondoka. Ukupitila muli Hosea, atile: “Abantu bandi baonaulwa ku kubulo kwishiba; pantu iwe wakaano kwishiba, na ine ndekukaana mu kuba shimapepo kuli ine.” (Hosea 4:6) Mu kwangufyanya pa numa, abena Ashuri balipyangilepo ubufumu bwa ku kapinda ka ku kuso ubwa kwa Israele.

10. Ni mu nshila nshi ubufumu bwa ku kapinda ka ku kulyo ubwa Yuda, bwaiminineko Yehova ku nko lintu bwabele ubwa busumino?

¹⁰ Ni shani pa lwa luko lwa ku kapinda ka ku kulyo, ulwa Yuda? Mu nshiku sha kwa Hisekia, Yehova asosele kuli bene ukupitila muli Esaya ati: “Imwe muli nte shandi, . . . kabili muli babomfi bandi abo nasala, . . . abantu abo naibumbiile ku kuleka balondolole ukuntasha.” (Esaya 43:10, 21; 44:21) Lintu babele aba busumino, ubufumu bwa ku kapinda ka ku kulyo bwabombele ku kubilisha ku nko ubukata bwa kwa Yehova no kucebusha abalungama ku kumupepa pe tempele lyakwe no kupyungilwa na bashimapepo ba mwi funde abena Lebi.

Abantu Bambi Bambi mu Israele

11, 12. Lumbulako abantu bambi bambi abaishile mu kubombela Yehova pamo na bena Israele.

¹¹ Ukukuma ku bantu bambi bambi abayankwile kuli ubu bunte bwa luko, ukupayanya kwalicitilwe ukukuma kuli bene mwi Funde ilyapeelwe ukupitila muli Mose—uo umukashi wakwe, Sipora, aali mwina Midiani. “Icintobentobe cikalamba” ica bashali bena Israele bashile Egupti pamo na Israele kabili e po baali lintu Ifunde lyapeelwe. (Ukufuma 2:16-22; 12:38; Impendwa 11:4) Rahabu no lupwa lwakwe balipusushiwe mu Yeriko kabili pa numa balipokelelwe mu cilonganino ca ciYuda. (Yoshua 6:23-25) Mu kwangufyanya pa numa, abena Gibeone bacitile umutende na Israele kabili bapeelwe imilimo yalundene ne ca kwikalamo.—Yoshua 9:3-27; mona na kabili 1 Ishamfumu 8:41-43; Estere 8:17.

¹² Mu kupelako, abantu bambi bambi babombele mu fifulo fyasumbuka. Uria umwina Hiti, umulume wa kwa Bati-sheba, apendelwe pa kati ka “mpalume” sha kwa Davidi, pamo fye nge fyali Seleke umwina Amone. (1 Imilandu 11:26, 39, 41; 2 Samwele 11:3, 4) Ebede-meleke, umwina Kushi, abombele mwi sano kabili alefika fye na ku mfumu. (Yeremia 38:7-9) Pa numa Israele abwelele ukufuma muli bunkole ku Babiloni, abashali bena Israele abena Netinimu balipeelwe ifishingamo fyalundwapo mu kwafwilisha bashimapepo. (Esra 7:24) Apantu ubwingi bwa aba bantu bambi bambi, nelyo abalebeshi ba busumino, bamonwa nga bacitileko icikope ibumba likalamba ilya lelo, cili bwino ukuti tulanguluke imibele yabo.

13, 14. (a) Mashuko nshi ne fishingamo ifyo insangu bakwete mu Israele? (b) Ni shani fintu abena Israele baali no kumona insangu sha busumino?

¹³ Aba musango yo bali ni nsangu, bakapepa baipeela aba kwa Yehova pe samba lye Funde lya kwa Mose abaipaatwile ku nko ku kuba pamo na bena Israele. (Abena Lebi 24:22) Baninike amalambo, batalwike ku kupepa kwa bufi, kabili baibakile ku mulopa, pamo fye nga fintu abena Israele bacitile. (Ubwina Lebi 17:10-14; 20:2) Balyafwile ukukuula itempele lya kwa Solomone kabili bailundile mu kubwesha ukupepa kwa cine pe samba lya Mfumu Asa ne Mfumu Hisekia. (1 Imilandu 22:2; 2 Imilandu 15:8-14; 30:25) Lintu Petro abomfeshe ulufungulo lwa kubalilapo ulwa Bufumu pa Pentekoste 33 C.E., amashiwi yakwe yalyumfwilwe ku “baYuda ne nsangu [abashali baYuda].” Mu kupalishako, bamo pa makana yatatu ababatishiwe bulya bushiku bali ni nsangu. (Imilimo 2:10, 41) Mu kwangufyanya pa numa, insangu umwina Etiopia alibatishiwe kuli Filipi—pa ntanshi Petro talabomfya ulufungulo lwa kupelako ulwa Bufumu kuli Korneli no lupwa lwakwe. (Mateo 16:19; Imilimo 8:26-40; 10:30-48) Mu kumonekesha, insangu tashamwenwe nga Bena fyalo.

¹⁴ Nangu ni fyo, icifulo ca nsangu muli cilya calo tacali cimo cine nge ca bena Israele ba cifyalilwa. Insangu tashabombele nga bashimapepo, kabili amabeli yabo tayaimininweko muli bushimapepo bwa ciLebi.b Kabili insangu tashalepyane mpaanga mu Israele. Nalyo line, abena Israele bakambishiwe ukulangulukilako insangu sha busumino no kubamona nga bamunyinabo.—Ubwina Lebi 19:33, 34.

Uluko lwa ku Mupashi

15. Cinshi cafuminemo lintu Israele wa cifyalilwa akeene ukupokelela Mesia?

¹⁵ Ifunde lyabeleleko ku kusungilila Israele uwasanguluka, uwapaatukako ku nko shabashingulwike. Lelo kwaliko imifwaile na imbi. Umutumwa Paulo alembele ati: “Amalango yali kafundisha wesu ukufika na kuli Kristu, ukuti tulungamikilwe ku kutetekela.” (Abena Galatia 3:24) Ku ca bulanda, abena Israele abengi balifililwe ukutungululwa kuli Kristu pa kubomfya Amalango. (Mateo 23:15; Yohane 1:11) E co Yehova Lesa alikeene lulya luko no kulenga ukuti “Israele wa kwa Lesa” engafyalwa. Mu kulundapo, atambulwile ubwite ku bashali baYuda ukuba abekashi bene bene muli uyu Israele mupya. (Abena Galatia 3:28; 6:16) Caba ni pali ulu luko lupya e po ubulayo bwa kwa Yehova ubwa pa Ukufuma 19:5, 6 pa lwa bushimapepo bwa cifumu bufikilishiwa busaka busaka, kabili mu kupelako. Mu nshila nshi?

16, 17. Ni mu mano nshi Abena Kristu basubwa pe sonde babela “ubufumu”? “bashimapepo”?

¹⁶ Petro ayambwile Ukufuma 19:6 lintu alembeele Abena Kristu basubwa aba mu kasuba kakwe ukuti: “Imwe muli lupwa ulwasalwa, bushimapepo bwa bufumu, uluko lwa mushilo, abantu abo aikwatila.” (1 Petro 2:9) Cinshi cintu ici cipilibula? Bushe Abena Kristu basubwa abali pe sonde ni bashamfumu? Iyo, bushamfumu bwabo bucili ku ntanshi. (1 Abena Korinti 4:8) Nangu ni fyo, baali “bufumu” mu mano ya kuti balisalwa ku kubomba amashuko ya mulimo wa cifumu ku nshita ya ku ntanshi. Nelyo fye ni nomba baba luko pe samba lya mfumu, Yesu, uwasontwa na Mulopwe Mukalamba, Yehova Lesa. Paulo alembele ukuti: “[Yehova atupokolola] ku lupaka lwa mfifi, no kutupilibwila mu bufumu bwa Mwana wakwe uwatemwikwa.”—Abena Kolose 1:13.

¹⁷ Bushe Abena Kristu basubwa abali pe sonde ni bashimapepo? Mu mano yamo, ee. Pamo nge cilonganino, babomba umulimo wa bushimapepo ukwabula no kutwishika. Petro alondolwele ici lintu asosele ukuti: “Imwe bene . . . mukuulwe ŋanda ya bumupashi, ku kuba bushimapepo bwa mushilo.” (1 Petro 2:5; 1 Abena Korinti 3:16) Ilelo, abashalapo ba Bena Kristu basubwa pamo nge bumba baba e “musha wa cishinka kabili uwashilimuka,” ipitilo umupayanishiwilwa ica kulya ca ku mupashi. (Mateo 24:45-47) Nga fintu cali muli Israele wa pa kale, abali bonse abalefwaya ukupepa Yehova bali no kucite co pa kubishanya na aba Bena Kristu basubwa.

18. Pamo nga bashimapepo, icilonganino casubwa ica Bwina Kristu pe sonde cakwata icishingamo nshi icikalamba?

¹⁸ Mu kulundapo, Abena Kristu basubwa bapyene Israele ishuko lya kucitilo bunte ku bukulu bwa kwa Yehova mu nko. Ifyashingulukako filangililo kuti lintu Petro aitile Abena Kristu basubwa pamo nga ubufumu bwa bashimapepo, alelanda pa lwa mulimo wa kushimikila. Mu cine cine, mu kwambula kumo fye akumbinkenye ubulayo bwa kwa Yehova pa Ukufuma 19:6 na mashiwi ya kwa Yehova kuli Israele pali Esaya 43:21 lintu atile “Muli . . . bushimapepo bwa bufumu, . . . ku kuleka [mulondolole] ifya bulumba fya wamwitile ukuti mufume mu mfifi mwingile mu lubuuto lwakwe ulwapesha amano.” (1 Petro 2:9) Mu kumfwana ne ci, Paulo alandile ulwa kubilisha ubulumba bwa kwa Yehova nge lambo lya pe tempele. Alembele ukuti: “Muli [Yesu] e mo tutuulile ilambo lya malumbo kuli Lesa, e kutila, icisabo ca milomo iitootele shina lyakwe.”—AbaHebere 13:15.

Ukufikilishiwa kwa mu Muulu

19. Kufikilishiwa nshi ukwa kupelako, ukwabembela ukwa bulayo bwa kuti Israele aali no kuba ubufumu bwa bashimapepo?

¹⁹ Nangu cibe fyo, Ukufuma 19:5, 6 mu kupelako kukafikilishiwa pa cipimo cacilanapo ubukulu. Mwi buuku lya Ukusokolola, umutumwa Yohane omfwamo ifibumbwa fya ku muulu filebomfya ili lembo ilyo balelumbanya Yesu wabuushiwa abati: “Mwaipaiwe, kabili mwashitiile Lesa mu mulopa wenu aba mu mikowa yonse na ’ba ndimi, na ’bantu na ’bantu, na ’ba nko; kabili mwabacita kuli Lesa wesu ukube shamfumu kabili bashimapepo, kabili bakaba no bufumu pe sonde.” (Ukusokolola 5:9, 10) Mu kufikilishiwa kwa liko ukwa kupelako, kanshi, bushimapepo bwa cifumu Bufumu bwa ku muulu ubwa kwa Lesa, amaka ya kuteka ayo Yesu atusambilishe ukupepela. (Luka 11:2) Abena Kristu basubwa bonse aba ba 144,000 abashipikisha mu busumino ukufika na ku mpela bakakana muli ilya mitantikile ya Bufumu. (Ukusokolola 20:4, 6) Mwandi kufikilishiwa kushaiwamina ukwa bulayo ubwacitilwe akale sana ukupitila muli Mose!

20. Cipusho nshi cashalako icili no kwasukwa?

²⁰ Ni shani fintu ici conse campene ne mibele ye bumba likalamba ne nshita yabo iya ku ntanshi lintu abasubwa bonse babe nabapokelela ubupyani bwabo ubwawamisha? Tuli no kumfwikisha bwino ici mu cipande ca kupelako muli kuno kukonkana.

[Amafutunoti]

Bushe Kuti Walondolola?

◻ Ni shani fintu icifulo ca mpaanga shimbi caisa mu kumfwika bwino panono panono?

◻ Mulandu nshi Yehova akaanine ubufumu bwa ku kapinda ka ku kuso ubwa Israele ku kuba bashimapepo kuli wene?

◻ Mulimo nshi Yuda abombele ku nko lintu abele uwa busumino?

◻ Mulimo nshi insangu sha busumino shabombele mu Israele?

◻ Ni mu nshila nshi icilonganino casubwa cibombelamo ngo bufumu bwa bashimapepo?

[Icikope pe bula 16]

Pamo nga bashimapepo ba cifumu, Abena Kristu basubwa babilisha ubukata bwa kwa Yehova pe sonde

[Icikope pe bula 18]

Ukufikilishiwa kwa kupelako ukwa Ukufuma 19:6 Bufumu