ISAMBILILO 40
Finshi Tulingile Ukucita pa Kuti Lesa Aletumona Ukuti Tuli ba Busaka Kabili Twalisanguluka?
Elenganyeni ukuti umufyashi umwanakashi uwatemwa umwana wakwe umwaume umunono alemupekanya ukuya ku sukulu. Ashininkisha ukuti umwana wakwe nasamba kabili ne fya kufwala fili ifya busaka. Ici kuti calenga umwana aleba no bumi ubusuma, kabili na bantu kuti balamona ukuti abafyashi bakwe balamusunga bwino. Filya fine abafyashi bafwaya abana babo baleba aba busaka, e fyo na Shifwe uwatutemwa Yehova afwaya tuleba aba busaka kabili abasanguluka mu fyo tutontonkanya, mu fyo tulanda, na mu fyo tucita. Nga tuli aba busaka kabili abasanguluka ifintu filatuwamina kabili tulalenga ishina lyakwe lyacindikwa.
1. Finshi twingacita pa kuti tuleba aba busaka?
Yehova atweba ukuti: “Muleba aba mushilo.” (1 Petro 1:16) Pa kuba aba mushilo tulingile ukuba aba busaka kabili abasanguluka mu fyo tulanda, mu fyo tucita, e lyo na mu fyo tutontonkanya. Kuti twaba aba busaka nga tulesamba lyonse, tulewasha ifya kufwala fyesu, tulesunga amayanda yesu aya busaka, e lyo ne myotoka. Na kabili kuti tulewamyako ne Ng’anda ya Bufumu. Nga tuleba aba busaka, tukalenga abantu balecindika Yehova.—2 Abena Korinti 6:3, 4.
2. Finshi tushilingile ukulacita pa kuti tube abasanguluka?
Baibo itweba ukuti “tuisangulule kuli fyonse ifikowesha umubili no mupashi.” (2 Abena Korinti 7:1) Kanshi tulesha na maka ukukanacita ifingalenga twakowesha umubili nelyo ifingalenga twalatontonkanya pa fyabipa. Ifyo tutontonkanyapo filingile ukulalenga Yehova alesekelela, kanshi tulesha na maka ukukanatontonkanya pa fyabipa. (Amalumbo 104:34) Na kabili tulesha na maka ukuba ne milandile iisuma.—Belengeni Abena Kolose 3:8.
Finshi fimbi ifingalenga twaba aba busaka kabili abasanguluka mu fyo tulanda, mu fyo tutontonkanya, e lyo na mu fyo tucita? Ifintu fimo kuti fyakowesha umubili wesu. Kanshi tatulingile ukulasheta inseke sha betele nelyo amabula yakola aya coca, ukubomfya imiti babinda, ukubomfya imiti bubi bubi, no kupeepa fwaka ya misango yonse, ukubikako fye ne nsunko. Nga tatulecita ifi, tukaba no bumi ubusuma kabili tukalalanga ukuti twalicindika ubumi. Na kabili tulaba ne mibele iyasanguluka nga tule-esha na maka ukukanalaikataula ifya mfwalo nelyo ukutamba ifye shiku. (Amalumbo 119:37; Abena Efese 5:5) Kwena te kuti canguke ukuleka iyi imibele yabipa, lelo Yehova kuti atwafwa ukuleka.—Belengeni Esaya 41:13.
SAMBILILENI NA FIMBI
Sambilileni ifyo ukuba aba busaka kabili abasanguluka kwingalenga Yehova acindikwa, ne fyo mwingacita pa kuti muleke ukucita ifyo Yehova apata.
3. Nga tuli aba busaka kabili abasanguluka tulalenga Yehova acindikwa
Nga twabelenga amafunde Yehova apeele abena Israele, tulamona ico afwaila ukuti ababomfi bakwe baleba aba busaka. Belengeni Ukufuma 19:10 na 30:17-19, lyena lanshanyeni aya mepusho:
Bushe aya amalembo yalelanga shani ukuti Yehova afwaya ababomfi bakwe baleba aba busaka?
Finshi mulingile ukulacita lyonse ifingalenga mwaba aba busaka?
Tulakabila ukubombesha no kupoosapo inshita iikalamba pa kuti tuwamye apo tuleikala ne fipe fyesu. Lelo kuti twaba aba busaka te mulandu no ko twikala kabili te mulandu nampo nga tuli bapiina nelyo tuli bakankaala. Tambeni VIDIO, lyena lanshanyeni icipusho cakonkapo.
Cinshi abantu tubilako imbila nsuma bengacindikila sana Yehova nga bamona ukuti ifipe fyesu fya busaka?
4. Mufwile ukuleka imisango yabipa
Yehova kuti atwafwa ukuleka imisango iili yonse iyabipa
Nga mulapeepa fwaka, mulabomfya imiti babinda, nelyo nga mulabomfya imiti bubi bubi, mufwile mwalishiba ukuti calikosa ukuleka ukucita ifi. Cinshi cingamwafwa? Tontonkanyeni pa fingacitika nga tamulekele iyi imisango. Belengeni Mateo 22:37-39, lyena lanshanyeni ifyo ukupeepa fwaka, ukubomfya imiti babinda, nelyo ukubomfya imiti bubi bubi kwingakuma . . .
bucibusa bwa muntu na Yehova.
balupwa lwakwe na bantu bambi.
Tantikeni ifyo mwingacita pa kuleka imisango yabipa.a Tambeni VIDIO.
Belengeni Abena Filipi 4:13, lyena lanshanyeni ici cipusho:
Bushe ukulapepa lyonse, ukulaisambilisha Baibo, no kulalongana lyonse, kuti fya-afwa shani umuntu ukuleka imisango yabipa?
5. Mwilatontonkanya pa fyabipa no kucita ifingalenga mwakowela
Belengeni Abena Kolose 3:5, lyena lanshanyeni aya mepusho:
Twaishiba shani ukuti Yehova alipata ukutamba ifye shiku, ukutumishanya amashiwi, amavidio, nelyo ifikope fye shiku pa foni, e lyo no kwikataula ifya mfwalo?
Bushe mulemona ukutila kuti twakumanisha ukuba abasanguluka mu mibele nga fintu Yehova afwaya? Cinshi mwa-asukila ifyo?
Moneni ifyo mwingacita pa kuti muleke ukutontonkanya pa fyabipa. Tambeni VIDIO.
Yesu alilandile icilangililo pa kutulanga ifyo twingacita pa kuti tube ne mibele yasanguluka. Belengeni Mateo 5:29, 30, lyena lanshanyeni ici cipusho:
Nangu ca kutila Yesu talelanda ukuti tulingile ukuilemanika, alelanda ukuti tufwile ukucitapo cimo. Finshi umuntu alingile ukucita pa kuti elatontonkanya pa fyabipa?b
Nga ca kuti mulesha na maka ukuleka ukutontonkanya pa fyabipa, Yehova alatemwa pa fyo muibikilishako. Belengeni Amalumbo 103:13, 14, lyena lanshanyeni ici cipusho:
Nga mulesha na maka ukuleka ukucita ifingamukowesha, bushe ili ilembo kuti lyamwafwa shani ukutwalilila ukulwisha pa kuti muleke ukuba ne mibele iingamukowesha?
Tekwesha ukunenuka nga mwabwekeshapo ukucita ifyo mulefwaya ukuleka!
Limo kuti mwalatontonkanya amuti, ‘Apo ni mfilwa ukuleka, kandeke fye no kwesha.’ Tontonkanyeni pa babutuka ulubilo lwa kucimfyanya. Nga ca kuti uulebutuka ulubilo awa ilyo alebutuka, tacipilibula ukuti ninshi calala capwa te kuti acimfye, nelyo ukuti alingile ukutendeka cipya cipya ukubutuka. Ifi fine e fyo caba na ku muntu uulefwaya ukuleka imisango yabipa. Inshita shimo kuti abwekeshapo ukucita ico alefwaya ukuleka. Nomba ici tacipilibula ukuti ninshi te kuti aleke. Lelo alingile fye ukutemwa pa fyo ale-esha ukwaluka. Kanshi nga abwekeshapo ukucita ifyo alefwaya ukuleka, talingile ukufuupuka. Pantu calyafya ukuleka fye pa muku umo. Kanshi na imwe tamufwile ukufuupuka nga kwaliba ifyo mufwaya ukuleka, Yehova kuti amwafwa.
ABANTU BAMO BATILA: “Kale natampa, te kuti ndeke.”
Lilembo nshi mwingabomfya ukulondolwela umuntu ukuti Yehova nga amwafwa na o wine kuti aleka imisango yabipa?
IFYO MUSAMBILILE
Tulalenga Yehova alasekelela nga tuli aba busaka kabili abasanguluka mu fyo tutontonkanya, mu fyo tulanda, na mu fyo tucita.
Ukupitulukamo
Mulandu nshi cacindamina ukuba aba busaka kabili abasanguluka?
Finshi mulingile ukulacita pa kuti muleba aba busaka?
Kuti mwacita shani pa kuti mube abasanguluka mu fyo mutontonkanya, mu fyo mulanda, na mu fyo mucita?
ISHIBILENIPO NA FIMBI
Finshi mwingacita pa kuti muleba aba busaka nangu ca kuti muli bapiina?
Moneni ifyo mwingacita pa kuti muleke ukupeepa fwaka.
Moneni ububi bwaba mu kutamba ifye shiku.
“Bushe Ukutamba Ifye Shiku Kwaliba fye Bwino?” (Ulupungu lwa kwa Kalinda, August 1, 2013)
Belengeni ifyo umwaume umo acitile pa kuti aleke ukutamba ifye shiku.
“Calingafishe Ukuleka Ukutamba Ifye Shiku” (Ulupungu lwa kwa Kalinda Na. 4 2016)
a Mu cipande cileti “Ifya Kuleka Ukupeepa,” icili apaleti “Ishibilenipo na Fimbi” muli lino line isambililo, balilondolola fimo ifyo umuntu engacita pa kuti aleke imisango yabipa pamo ngo kupeepa.
b Nga mulefwaya ukwishiba ifyo mwingacita pa kuti muleke ukwikataula ifya mfwalo, belengeni icipandwa citila “Kuti Naleka Shani Ukwikataula Ifya Mfwalo?” mu citabo citila Ifipusho Abacaice Bepusha, ne Fyasuko Ifingabafwa, Ibuuku 1, icipandwa 25.