Bushe Lesa Amona Ukusefya Konse Ukuti Kwaliba Fye Bwino?

Yehova afwaya tuleba ne nsansa e lyo no kwangalilako pamo na banensu inshita shimo. Lelo bushe amona ukuti ukusefya konse na maholide fyaliba fye bwino? Kuti twalanga shani ukuti twalitemwa Yehova ilyo tulesefya nelyo ilyo tulesala amaholide ayo twingasefyako?

1. Cinshi Yehova apatila ukusefya ukwingi?

Nalimo kuti mwapapa nga mwaishiba ukuti ukusefya ukwingi takumfwana ne fyo Baibo isambilisha nelyo nga mwaishiba ukuti kwafuma ku mipepele ya bufi. Muli uku kusefya nalimo kuti mwaba ukumfwana ne fibanda, nelyo ukucita ifingatungilila icisambilisho ca kuti umweo taufwa. Ukusefya kumo kwafuma ku kupupa imipashi nelyo ku kusumina ukuti kwaliba lesa we shuko. (Esaya 65:11) E mulandu wine Yehova asokela abamupepa ukuti: “Fumenimo muli bena . . . kabili lekeni ukwikata ku cishasanguluka.”—2 Abena Korinti 6:17.a

2. Bushe Yehova omfwa shani pa kusefya umo abantu bapeela abantu banabo umucinshi bashilingile ukubapeela?

Yehova alatusoka ukuti tatulingile ‘ukucetekela abantunse.’ (Belengeni Yeremia 17:5.) Mu kusefya kumo abantu balacindikisha sana bakateka nelyo abashilika. E lyo mu kusefya kumbi balacindikisha ifishibilo fya calo nelyo ukusefya ubushiku icalo capokele ubuntungwa. (1 Yohane 5:21) Pa kusefya kumbi nako, abantu balacindikisha utubungwe twa fikansa fya calo nelyo utubungwe utwafwilisha abantu mu mikalile. Bushe Yehova kuti aumfwa shani nga tulecindikisha umuntu nelyo akabungwe, maka maka umuntu nelyo akabungwe akacita ifyapusana no bufwayo bwa kwa Lesa?

3. Finshi abantu bacita nga balesefya, ifilenga Yehova apate ukusefya kumo?

Baibo yalikaanya ‘ukunwesha umwangashi, ukuwowota, no kukolwakolwa.’ (1 Petro 4:3) Pa kusefya kumo abantu tabailama kabili balacita ifintu ifyabipa. Pa kuti tutwalilile ukuba ifibusa fya kwa Yehova, tatulingile ukulasangwa ku kusefya uko abantu bacita ifyabipa.

SAMBILILENI NA FIMBI

4. Mwilasangwa ku kusefya ukushilenga Yehova acindikwa

Belengeni Abena Efese 5:10, lyena lanshanyeni aya mepusho:

• Finshi tulingile ukutontonkanyapo nga tulefwaya ukwishiba nampo nga kuti twasefyako holide nelyo iyo?

• Maholide nshi ayaseeka uko mwikala?

• Bushe mulemona ukuti Yehova alitemwa aya amaholide?

Ku ca kumwenako, bushe mwalitontonkanyapo ifyo Yehova amona ukusefya inshiku sha kufyalwa? Baibo tayalandapo ukuti ababomfi ba kwa Yehova balesefya inshiku sha kufyalwa, lelo yalanda fye pa bantu babili abashalebombela Yehova abasefeshe inshiku sha kufyalwa. Belengeni Ukutendeka 40:20-22 na Mateo 14:6-10. Lyena lanshanyeni aya mepusho:

• Finshi ifyacitike ifyapalana, ilyo aba babili abo Baibo yalandapo basefeshe inshiku sha kufyalwa?

• Ukulingana na ya malembo twabelenga, bushe mulemona ukutila Yehova amona shani ukusefya inshiku sha kufyalwa?

Nalimo kuti mwayipusha amuti, ‘Bushe Yehova alabikako amano nga nasefyako ubushiku bwa kufyalwa nelyo ukusefya kumbi ukwapusana ne fyo Baibo ilanda?’ Belengeni Ukufuma 32:1-8. Lyena tambeni VIDIO no kulanshanya amepusho yakonkapo.

VIDIO: Ukusefya na Maholide Ifyo Lesa Apata (5:07)

• Mulandu nshi tulingile ukubikilako sana amano ku kumona nga ca kuti ifyo tulefwaya ukucita kuti fyalenga Yehova alesekelela?

• Kuti twacita shani pa kuti tatucitile ifingafulwisha Yehova?

Ifyo twingeshiba nga ca kuti ukusefya kuti kwafulwisha Lesa

• Bushe uku ukusefya kulomfwana ne fyo Baibolo isambilisha? Pa kuti mwishibe nga kulomfwana ne fyo Baibolo isambilisha, mufwile ukwishiba ifyo uko ukusefya kwatendeke.

• Bushe uku ukusefya kuti kwalenga twalacindikisha abantunse, utubungwe nelyo ifishibilo fya calo? Tucindikisha Yehova ukucila icintu nelyo umuntu uuli onse, kabili twacetekela ukuti Yehova e ukapwisha fye amafya yonse ayo fwe bantunse tukwata.

• Bushe ifyo abantu bacita pali uku kusefya fyalipusana ne fyo Baibolo ilanda? Tatulingile ukulacita ifyo Yehova apata.

5. Muleba no mucinshi ilyo mulelondolwela abantu ico mushilesefeshako holide

VIDIO: Mulelondolwela Abantu Ifyo Mwasuminamo Ukwabula Ukubakalifya (2:01)

Belengeni Mateo 7:12, lyena lanshanyeni aya mepusho:

• Ukulingana ne li lembo, bushe mufwile ukupatikisha balupwa wenu abashili ba Nte ukukanasefyako holide?

• Finshi nalimo mwingacita pa kuti mulange balupwa wenu ukuti mwalibatemwa kabili mwalibabikako amano, nangu ca kuti tamusefyako amaholide ayo basefya?

6. Yehova afwaya tuleba ne nsansa

Yehova afwaya tulesansamukila capamo na balupwa ne fibusa. Belengeni Lukala Milandu 8:15, lyena lanshanyeni ici cipusho:

• Bushe ili lembo lilanga shani ukuti Yehova afwaya tuleba ne nsansa?

Yehova afwaya abantu bakwe balesansamukila capamo. Tambeni VIDIO pa kuti mumone ifyo ababomfi bakwe basansamukila capamo pa kulongana kwa citungu ukwa bafuma mu fyalo ifingi.

VIDIO: Ifyo Aba Bwananyina Balanga Ukuti Balapokelela Abeni Ilyo Kuli Ukulongana kwa Bantu Abafuma ku Fyalo Ifingi (5:40)

Belengeni Abena Galatia 6:10, lyena lanshanyeni aya mepusho:

• Bushe pa kuti “tulecitila bonse ifisuma,” kano fye tulesefyako amaholide ayo abengi basefya?

• Ni cisa mwingatemwapo, ukupeela umuntu ubupe pa mulandu fye wa kuti e fyo abantu bacita pa kusefya holide nelyo ukupeela umuntu ubupe ukufuma panshi ya mutima wenu?

• Ba Nte abengi inshita shimo balapekanya fimo pa kuti basansamukile capamo na bana babo, kabili limo balabapeelako fye ne fya bupe. Nga ca kuti mwalikwata abana, finshi fimo ifyo mwingacita pa kuti musansamukile capamo nabo?

IFYO MUSAMBILILE

Yehova afwaya tulesansamukila capamo na balupwa ne fibusa. Lelo tafwaya tulesangwa ku kusefya uko apata.

Ukupitulukamo

• Mepusho nshi twingaipusha pa kuti twishibe nga ca kuti ukusefya ukuliko kulafulwisha Yehova nelyo iyo?

• Kuti twacita shani pa kuti tulenge balupwa ne fibusa beshibe ico tushilesefeshako holide?

• Mwaishiba shani ukuti Yehova alafwaya tuleba ne nsansa?

ISHIBILENIPO NA FIMBI

Moneni amaholide yamo ayo Abena Kristu bashisefyako.

“Mulandu Nshi Inte sha kwa Yehova Bashisefeshako Amaholide Yamo?” (Icipande ca pa jw.org)

Belengeni ifintu 4 ifyalenga tusumine ukuti ukusefya inshiku sha kufyalwa kulafulwisha Lesa.

“Mulandu Nshi Inte sha kwa Yehova Bashisefeshako Inshiku sha Kufyalwa?” (Icipande ca pa jw.org)

Moneni ifyo abana abanono abatemwa Yehova bengalenga alasekelela ilyo kuli ukusefya amaholide.

Walicindama Kuli Yehova (11:35)

Abena Kristu abengi nga nshi balisalapo ukukanalasefyako Krisimasi. Bushe bomfwa shani pa fyo basalapo?

“Balisanga Icacila Pali Krisimasi” (Ulupungu lwa kwa Kalinda, December 1, 2012)