Amepusho Ukufuma ku Babelenga

Mulandu nshi Mose akalipile Eleasari na Itamari, abana ba kwa Aarone pa numa ya mfwa ya kwa Nadabu na Abihu bamunyinabo, kabili cinshi calengele umutima wakwe ukutontoloka?—Lebi 10:16-20.

Pa numa ya kubikako bushimapepo pe tempele, Yehova aipeye Nadabu na Abihu abana ba kwa Aarone pantu batuulile umutuulo bashasuminishiwe. (Lebi 10:1, 2) Mose aebele ba mwana Aarone abashele aba mweo ukuti beloosha bamunyinabo. Ilyo papitile fye inshita iinono, Mose akalipile Eleasari na Itamari pantu tabaliile imbushi ya mutuulo wa pa lubembu. (Lebi 9:3) Mulandu nshi Mose afuliilwe?

Amafunde Yehova apeele Mose yalandile ukuti shimapepo uwatuula umutuulo wa pa lubembu afwile ukulyako inama atuulile mu lubansa lwa cikuulwa ca mushilo. Ukucita ifyo kwali cilangililo ca kuti shimapepo nao nashingamwa imembu sha upeele umutuulo. Lelo nga ca kuti umulopa we lambo lya mutuulo bautwala mu Muputule wa Mushilo, e kuti umuputule wa kubalilapo, ninshi uyo mutuulo tabaulye, balaoca fye mu mulilo.—Lebi 6:24-26, 30.

Cimoneka kwati pa numa ya mfwa ya kwa Nadabu na Abihu, Mose alefwaya ukushininkisha ukuti nabacita fyonse ifyo Yehova abebele. Ilyo Mose aishibe ukuti imbushi ya mutuulo wa lubembu nabayoca, bukali bukali aipwishe Eleasari na Itamari umulandu bashaliliileko ilya mbushi ukulingana ne funde, pantu umulopa wa ilya nama tabautwele Umwa Mushilo ku ku-utuula kuli Yehova.—Lebi 10:17, 18.

Aarone e wayaswike icipusho ca kwa Mose, pantu e wasumininishe bashimapepo bashele ukucita ifyo bacitile. Pa mulandu wa kuti abana bakwe babili balipaiwe, Aarone nalimo aletwishika nga ca kuti kampingu ya bashimapepo bashele yalebasuminisha ukulya umutuulo wa pa lubembu pali bulya bushiku. Nalimo aletontonkanya ati Yehova ali no kufulwa nga balyako inama, nangu ca kuti te balengele ukuti Nadabu na Abihu babembuke.—Lebi 10:19.

Aarone afwile aletontonkanya ukuti pa bushiku ubo ulupwa lwakwe lwabalilepo ukubomba imilimo ya bushimapepo, nga caliwene lwabikako sana amano pa kuti lwatemuna Lesa na mutuntu utunono. Lelo te fyo cali, Nadabu na Abihu balisaalwile ishina lya kwa Yehova, no bukali bwa kwa Lesa bwalishile pali bena. Kanshi Aarone napamo alemona kwati aba mu lupwa lwa bushimapepo umwacitike ulubembu lwa musango yu tabali no kulyako umutuulo wa mushilo.

Mose afwile alyumfwile ifyo munyina amwebele, pantu ilembo litila: “Ilyo Mose aumfwile ci, e lyo caweme mu menso yakwe.” (Lebi 10:20) Ukwabula no kutwishika, na Yehova wine alitemenwe ifyo Aarone alandile.