Bushe Mwalikwata Umucetekanya?

ILYO Mose alesala bakapingula ba bena Israele, aeseshe na maka ukusanga “abantu ba mano kabili aba mucetekanya, kabili [ababelesha, NW].” (Amalango 1:13) Mose pa kusala talelolesha fye pa kubelesha ukwisako no bukokole iyo. Amano no mucetekanya na fyo fyalicindeme.

Umuntu wa mucetekanya alasala amashiwi ilyo alelanda kabili imyendele yakwe ilaba iisuma. Webster’s Ninth New Collegiate Dictionary itila, umuntu wa mucetekanya na kabili “tasosa cisosesose.” Ca cine, kwaliba “inshita ya kusosa,” kabili kwaliba “inshita ya kutalala,” e co umuntu wa mucetekanya alatesekesha ubu bupusano. (Lukala Milandu 3:7) Ilingi line, caliwama ukuba tondolo, pantu Baibolo itila: “Mu bwingi bwa fyebo tamubula bupulumushi, uulame milomo yakwe alishilimuka.”—Amapinda 10:19.

Abena Kristu balaba aba mucetekanya ilyo babomba na banabo. Umuntu uusosa libili libili nelyo uwalandisha te kuti ninshi e wacindama atemwa ukuti e waishiba fyonse. Ibukisheni, Mose ali “uwa maka mu cebo,” lelo alifililwe ukutungulula uluko lwa Israele ukufikila ilyo aishiletendeka ukulangisha ukutekanya, ubufuuke, no kuilama. (Imilimo 7:22) E ico, abo abasalwa ukuba intungulushi pali bambi bakabila ukwesha na maka ukuba abafuuka kabili abakutika na kuli bambi.—Amapinda 11:2.

Bantu Yesu Kristu apeela “fyonse ifyo akwata” balondololwa ukuba ‘aba cishinka kabili abashilimuka’ mu Cebo ca kwa Lesa. (Mateo 24:45-47) Baba abaicefya ico tabatangilila Yehova pa kulanda pa fyaisa fye mu mutwe; nelyo kushalila ku numa ilyo Lesa abalanga umwa kuya. Balishiba ilyo balingile ukusosa ne lyo balingile ukwikala tondolo ukulolela ukumfwa ubulondoloshi bwalundwako. Kuti caba bwino nga ca kuti Abena Kristu bonse bapashanya icitetekelo cabo no kuba abashilimuka, nga fintu ibumba lya musha baba.—AbaHebere 13:7.