Amepusho Ukufuma ku Babelenga

Amalango 14:21 yatila: “Mwilalya conse icaifwila.” Bushe aya mashiwi tayapilikana na mashiwi yaba pa Ubwina Lebi 11:40, ayatila: “Uwalyako icitumbi ca iko, asambe ifya kufwala fyakwe no kukowela ukufika ku cungulo”?

Ifi fikomo fibili tafipilikana iyo. Amalango 14:21 yabwekeshapo fye ifunde lya kukanalya inama iyaifwila, tutile inama iyaipaiwe ku ciswango. (Ukufuma 22:31; Ubwina Lebi 22:8) Ubwina Lebi 11:40 bulondolola ico umwina Israele ali no kucita nga apula muli ili funde, maka maka nga acite ci mu kukanaishiba.

Te kutila cimo nga calibindilwe mwi Funde ninshi takwali nangu umo uwali no kupulamo muli ilyo funde. Ku ca kumwenako, kwali amafunde ayabindile ukwiba, ukwipaya, ukwikalilo bunte bwa bufi, na yambi. Lelo kwali na mafunde ya kukanda abapula muli ayo mafunde ya kwa Lesa. Ukukandwa muli uyo musango kwalekosha amafunde kabili kwalelanga ifyo yacindeme.

Uwapulile mwi funde no kulya inama iyaifwila ali no kuba uwakowela mu menso ya kwa Yehova kabili alingile ukusangululwa bwino bwino. Nga afilwa ukuisangulula bwino bwino, ali no “kushingamwa amampuulu yakwe.”—Ubwina Lebi 17:15, 16.