Bushe Yehova ayafwile shani Eliya ukupwisha umwenso ne fyalemusakamika? Malaika aebele Eliya ukwiminina pa mwinshi wa lucengo. Alyumfwilile nangu cingati taishibe ifyali no kucitika. Awe kwapitile umwela ukalamba nga nshi! Ufwile walepanga sana icongo, pantu wali uukali ica kuti walelepaula impili no kutobaula amabwe. Elenganyeni Eliya ale-esha ukuifimba ica kufwala cakwe ica masako ku menso ninshi umwela ulepuupa nga nshi. Lyena ashansha pa kuti eminine pantu umushili uletenta pa mulandu wa cinkukuma! Ilyo no mwenso taulapwa umulilo uukalamba walipitile ica kuti abwelele ulubilo mu lucengo pa kuti aicingilile ku cikabilila.—1 Ishamfumu 19:11, 12.

Baibolo itila Yehova tali mu mwela, mu cinkukuma, nelyo mu mulilo. Eliya alishibe ukuti Yehova tali nga balesa ba kwelenganya fye, pamo nga Baali uo balelumbanya ku balemupepa ukuti e “Wale-ensha Amakumbi,” nelyo uwalelenga imfula ukuloka. Yehova e Ntulo ya maka yonse ayaba mu fyo abumba, kabili alikwatisha amaka ukucila ifili fyonse ifyo abumba. Nangu fye muulu wa myulu te kuti umukumane! (1 Ishamfumu 8:27) Bushe ifi fyonse fya-afwile shani Eliya? Ibukisheni ukuti Eliya alyumfwile umwenso. Apo Yehova Lesa uwakwatisha amaka ali nankwe, Eliya talekabila ukutiina Ahabu na Yesebele!—Amalumbo 118:6.

Ilyo umulilo wapitile, kwatalele na tondolo kabili Eliya aumfwile “ishiwi ilyanakilila, kabili ilyafuuka.” Ili shiwi lyalengele ukuti Eliya alande na kabili ifyali ku mutima umuku uwalenga bubili.b Ici nalimo calengele ukuti Eliya omfweko bwino. Lelo Eliya asansamushiwe sana lintu aumfwile ifyo “ishiwi ilyanakilila, kabili ilyafuuka” lyamwebele. Yehova aebele Eliya ukuti ali uwacindama nga nshi. Acindeme shani? Lesa amwebele ifyo ali no kucita kuli bonse abalepepa Baali mu Israele. Ukwabula no kutwishika, Eliya talebombela fye ibusha pantu takwali icali no kulesha ukufwaya kwa kwa Lesa ukwa konaula bonse abalepepa Baali. Na kabili, Eliya ali no kubombako uyu mulimo pantu Yehova amwebele ukubwelelamo no kumweba ifya kuyacita.—1 Ishamfumu 19:12-17.