Icebo ca kwa Yehova ca Mweo

Ifyo Twingafwaisha Ukwishiba mwi Buuku lya Bubili Ilya Imilandu

ILYO ibuuku lya mu Baibolo ilya 2 Imilandu lyatendeka, Solomone ninshi aleteka abena Israele. Ili buuku lisondwelela na mashiwi ya Mfumu Koreshe iya ku Persia ayo aebele abaYuda basendelwe bunkole ku Babele aya kuti: “[Yehova] ansobolola ku kumukuulile ng’anda mu Yerusalemu uuli mu Yuda. Onse uwa muli imwe pa bantu bakwe bonse, Yehova Lesa wakwe abe nankwe, anine, [aye ku Yerusalemu].” (2 Imilandu 36:23) Shimapepo Esra apwishishe ukulemba ili buuku mu 460 B.C.E., kabili lilanda pa fyacitike mu myaka 500, ukutendeka mu 1037 B.C.E. ukufika mu 537 B.C.E.

Icipope ca kwa Koreshe calenga abaYuda ukubwelela ku Yerusalemu no kuyabwesha ukupepa Yehova na kabili. Nomba, imyaka iingi iyo baikele muli bunkole ku Babele yalenga ifintu ukwafya sana. Ababwelele ukufuma muli bunkole tabaishibe ilyashi lya kale ilya luko lwabo. Ibuuku lya bubili ilya Imilandu lyalondolola bwino mu kwipifya ifyacitike ku shamfumu ishali mu lupwa lwa bufumu ulwa kwa Davidi. Ili lyashi lisuma na kuli ifwe pantu lilanda pa mapaalo yafuma mu kumfwila Lesa wa cine ne fifuma mu kukanamumfwila.

IMFUMU YAKUULILA YEHOVA ING’ANDA

(2 Imilandu 1:1–9:31)

Yehova apeela Imfumu Solomone ifyo ilefwaisha, e kutila amano no kwishiba kabili amupeela ne fyuma no bukata. Imfumu yakuulila Yehova ing’anda ya lulumbi mu Yerusalemu, kabili abantu “bali ne nsansa kabili ne mitima iyasekelela.” (2 Imilandu 7:10) Solomone ‘akula ukucile shamfumu shonse sha pano isonde ku bucindami na mano.’—2 Imilandu 9:22.

Pa numa ya kuteka abena Israele imyaka 40, Solomone ‘asendama kuli bawishi, na Rehoboamu mwane abe mfumu mwi punda lyakwe.’ (2 Imilandu 9:31) Esra talandapo pa fyo Solomone afumine mu kupepa kwa cine. Ifilubo fye alandapo pa mfumu ni filya yashitile bakabalwe abengi ukufuma ku Egupti na filya yaupile umwana mwanakashi wa kwa Farao. Kanshi, Esra ena alembele pa fisuma ifyo Solomone acitile.

Amasuko ku Mepusho ya mu Baibolo:

2:14—Cinshi ulupwa lwafyalilwemo intukushi ulwalandwa muli ici cikomo lwapusanina na lulya ulwaba pali 1 Ishamfumu 7:14? 1 Ishamfumu itila nyina kwa ntukushi aali ni “mukamfwilwa uwa mu mukowa wa kwa Naftali” pantu aupilwe ku mwaume wa muli ulya mukowa. Lelo, uyu mwanakashi ena ali wa mu mukowa wa kwa Dani. Lintu umulume wakwe afwile, aupilwe ku mwaume umwina Turi, kabili ni muli ici cupo e mo iyi ntukushi yafyelwe.

2:18; 8:10—Ifi fikomo fitila impendwa ya bacilolo abaleangalila ababomfi yali 3,600 ukubikapo na 250, lelo 1 Ishamfumu 5:16; 9:23, yena itila bali 3,300 ukubikapo na 550. Cinshi impendwa yapusanina? Ubupusano bulemoneka kwati bwaba mu fyo aba bacilolo bayakanishiwe. Napamo 2 Imilandu ipusanya abashali bena Israele 3,600 kuli bacilolo abena Israele 250, nomba 1 Ishamfumu yena ipusanya abaleangalila ababomfi abali 3,300 kuli bakangalila bakalamba abali 550. Lelo kwena, impendwa ya bacilolo bonse pamo yali 3,850.

4:2-4—Mulandu nshi babomfeshe bacilume ba ng’ombe aba mukuba ukupanga ica kutekapo icishiba caengwa? Mu Malembo, ing’ombe cishibilo ca maka. (Esekiele 1:10; Ukusokolola 4:6, 7) Ifi basalile ukubomfya bacilume ba ng’ombe calilingile pantu pa ng’ombe 12 isha mukuba e paikele “icishiba” cikalamba icafinine amatani 30. Ukupanga bacilume ba ng’ombe ku kutekapo icishiba caengwa takwali kupula mwi funde lya bubili ilyabindile ukupanga icipasho ca kupepa.—Ukufuma 20:4, 5.

4:5—Bushe icishiba ca mukuba icaengwa cakulile shani? Nga kwisushamo amenshi, icishiba kuti caingisha amalita napamo 66,000. Lelo, amenshi ayo balebikamo nakalimo yalefika fye amalita 44,000. Pali 1 Ishamfumu 7:26 patila, icishiba “cali ica kubamo amabati amakana yabili [amalita 44,000].”

5:4, 5, 10—Fipe nshi ifyali mwi hema lya kale ifyaishilebikwa mwi tempele Solomone akuulile? Icipe fye icafumine mwi hema lya kulaishanya ico babikile mwi tempele Solomone akuulile, cali Cipao. Ilyo itempele lyakuulilwe, bafumishe ihema ku Gibeone no kulitwala ku Yerusalemu kabili e ko bafwile balisungile.—2 Imilandu 1:3, 4.

Ifyo Twingasambililako:

1:11, 12. Ifyo Solomone alombele fyalangile Yehova ukuti ico imfumu yalefwaisha kuba na mano no kwishiba. Ca cine, amapepo tupepa kuli Lesa yalasokolola ifyo tufwaisha. Cisuma ukutontonkanyapo pa fyo tulomba.

6:4. Ukutasha kwa kufuma pa nshi ya mutima pa luse lwa kwa Yehova no busuma bwakwe fifwile ukutulenga ukucindika Yehova—e kutila, ukumulumbanya no kutemwa no kumutasha.

6:18-21. Nangu ca kuti Yehova te kuti ekale mu cikuulwa icili conse, itempele lyali e cifulo cikalamba ica kupepelamo Yehova. Muno nshiku, Amayanda ya Bufumu aya Nte sha kwa Yehova e fifulo fikalamba ifya kupepa kwa cine mu bwikashi.

6:19, 22, 32. Yehova aleumfwa amapepo ya bantu bonse—amapepo ya mfumu pamo fye na mapepo ya wacepesha mu luko—ukubikapo fye na mapepo ya bambi bambi abapepele kuli wene mu bufumacumi.a—Amalumbo 65:2.

IFYAKONKENE ISHAMFUMU SHA MU LUPWA LWA KWA DAVIDI

(2 Imilandu 10:1–36:23)

Ubufumu bwa Israele ubwaikatene kale, nomba bwapaatukana kabili kwaba ubufumu bwa ku kapinda ka ku kulyo ubwa mikowa 10 no bwa ku kapinda ka ku kuso ubwa mikowa ibili iya kwa Yuda na Benjamini. Bashimapepo na bena Lebi muli Israele onse baba aba cishinka ku cipingo ca Bufumu ukucila ukutungilila uluko lwabo kabili batungilila Rehoboamu mwana Solomone. Ilyo papita imyaka ukucilako fye panono pali 30 pa numa ya kupwisha ukukuula itempele, ifipe fyonse ifya mwi tempele fyaibwa.

Pa shamfumu 19 ishateeka pa numa ya kwa Rehoboamu, ishamfumu shisano fye e shili isha cishinka, shitatu shatendeka fye bwino lelo shaleka ukuba ne cishinka, kabili imfumu imo e yalapiile no kuleka ukucite fyabipa. Imfumu shonse ishashala shalecita ububi mu menso ya kwa Yehova.b Imibombele ya shamfumu shisano ishacetekele Yehova e yalandwapo sana. Ilyashi lya kwa Hisekia ilya kutendeka cipya cipya imilimo ya pe tempele ne lyashi lya kwa Yoshia ilya kupekanya ica Kucilila cikalamba, yafwile yalikoseshe sana abaYuda abalefwaya ukubwesha ukupepa Yehova mu Yerusalemu.

Amasuko ku Mepusho ya mu Baibolo:

13:5—Bushe amashiwi ya kuti “icipingo ca mucele” yalola mwi? Pa mulandu wa kuti umucele walikwata amaka ya kulenga ifintu ukukanabola bwangu, wali cishibilo ca kuti ico mwapangana ninshi cikabelelela kabili tacifwile ukwalulwa. Kanshi, “icipingo ca mucele” cipilibula icipangano icishifwile ukutobwa.

14:2-5; 15:17—Bushe Imfumu Asa yalibongolwele “imisansama” yonse? Afwile tabongolwele yonse. Asa afwile abongolwele fye imisansama iyo balepepelapo balesa ba bufi lelo tabongolwele imisansama iyo abantu balepepelapo Yehova. Na kabili, limbi imisansama yaishilekuulwa fye na kabili mu myaka ya kulekelesha iya kuteka kwa kwa Asa. Iyi misansama e yo Yehoshafati, umwana wakwe aishilebongolola. Na kuba, imisansama tayafumishiwemo yonse na lintu Yehoshafati aleteka.—2 Imilandu 17:5, 6; 20:31-33.

15:9; 34:6—Bushe aba mukowa wa kwa Simeone baleikala kwi kabili imipepele yabo yali shani ilyo ubufumu bwa Israele bwayakanikene? Apo Simeone apokelele incende ishali mu mpanga ya kwa Yuda ukuba icikwatwa, umukowa wa kwa Simeone waikele mu bufumu bwa kwa Yuda na Benjamini. (Yoshua 19:1) Lelo, uyu mukowa waletungilila ubufumu bwa ku kapinda ka ku kulyo mu fya mipepele na mu fya mitekele. (1 Ishamfumu 11:30-33; 12:20-24) E ico, Simeone alependelwa pa bufumu ubwa mikowa 10.

16:13, 14—Bushe icitumbi ca kwa Asa balicocele ilyo afwile? Awe, amashiwi ya kuti “bamocelele ica koca cikalamba nga nshi” yalosha ku fyanunke cisuma ifyo baocele, te mubili wa kwa Asa baocele iyo.

35:3—Bushe Icipao ca mushilo ico Yoshia aletele mwi tempele afumishe kwi? Baibolo tayalanda nampo nga ni umo pa mfumu shabipa e wafumishe Icipao nelyo nga ni Yoshia e wailecisungila kumbi ukwali bwino ilyo balewamya itempele. Ukufuma mu nshiku sha kwa Solomone, umuku wakonkapo uo Baibolo yalandapo fye pa Cipao ni lilya line Yoshia aciletele mwi tempele.

Ifyo Twingasambililako:

13:13-18; 14:11, 12; 32:9-23. Kuli ifi fikomo, kuti twasambililako isambililo lya maka nga nshi ilya kuti calicindama ukushintilila fye pali Yehova!

16:1-5, 7; 18:1-3, 28-32; 21:4-6; 22:10-12; 28:16-22. Mu kwampana na bena fyalo na bashasumina mulafuma ifyabipa. Mwaliba amano sana mu kukanacitako ifili fyonse ifya mu calo.—Yohane 17:14, 16; Yakobo 4:4.

16:7-12; 26:16-21; 32:25, 26. Ukuituumika kwalengele ukuti Imfumu Asa icite icabipa mu myaka ya kulekeleshako iya bumi bwa iko. Ukuituumika kwalengele Usia ukukandwa. Hisekia acitile icintu cabula amano kabili afwile aali ne cilumba ilyo alangile abeminishi ba ku Babele ifyuma akwete. (Esaya 39:1-7) Baibolo itusoka ukuti: “Amatutumuko yatangililo kufunaulwa, no kutuuma kwa mutima kutangililo kuipununa.”—Amapinda 16:18.

16:9. Yehova alafwa ababa no mutima wa cishinka kuli wena, kabili alafwaisha ukubomfya amaka yakwe ku kubafwa.

18:12, 13, 23, 24, 27. Ukupala Mikaya, tufwile ukuba abakosa kabili abashipa ilyo tulelanda pali Yehova na pa bufwayo bwakwe.

19:1-3. Yehova alamonamo ubusuma muli ifwe na lintu twamufulwisha.

20:1-28. Kuti twacetekelo kutila kuti twamusanga Yehova nga ca kuti mu kuicefya twamulomba ukututungulula.—Amapinda 15:29.

20:17. Pa kumona “ukupususha kwa kwa Yehova,” tufwile ‘ukuitantamika’ pa kuba abacincila ukutungilila Ubufumu bwa kwa Lesa. Mu nshita ya kuicitila ifintu, tufwile ‘ukwiminina,’ ukushintilila pali Yehova umupwilapo.

24:17-19; 25:14. Ukupepo tulubi kwali citeyo kuli Yoashi na kuli mwane Amasia. Na lelo line, ukupepa utulubi kwaba citeyo, maka maka nga kwaishila mu musango wayafya ukwiluka uwa kuba no lunkumbwa nelyo ukutemwisha icalo cesu.—Abena Kolose 3:5; Ukusokolola 13:4.

32:6, 7. Na ifwe bene tufwile ukuba abashipa kabili abakosa pa ‘kufwala ifya bulwi fyakumanina ifya kwa Lesa’ no kutwalilila mu bulwi bwesu ubwa ku mupashi.—Abena Efese 6:11-18.

33:2-9, 12, 13, 15, 16. Umuntu alanga ukuti nalapila icine cine nga aleka ukucita ifyabipa no kubombesha ukucita icalungama. Pa mulandu wa kulapila kwa cine cine, nangu fye muntu uwacitile fyabipa nga filya Imfumu Manase yacitile, Yehova kuti amucitile nkumbu.

34:1-3. Nangu tatwakushiwe bwino ilyo twali abaice, ico te cingalenga twafilwa ukwishiba Lesa no kumubombela. Imibele isuma iyo Yoshia akwete ilyo ali umwaice afwile asambilile kuli wishikulu Manase uwalapiile. Muli uto twine bamusambilishe, nangu ca kuti nakalimo twali tunono fye, mu kuya kwa nshita mwalifumine ifisuma. E fyo cingaba na kuli ifwe.

36:15-17. Yehova wa nkumbu kabili alitekanya. Lelo, inkumbu shakwe no kutekanya fyalikwata umwa kupelela. Abantu bafwile ukumfwila ubukombe bwa Bufumu pa kuti bakapusuke ilyo Yehova akonaula buno bwikashi bwabipa.

36:17, 22, 23. Ifyo Yehova alanda lyonse fye filacitika.—1 Ishamfumu 9:7, 8; Yeremia 25:9-11.

Ibuuku Lyalengele Acitapo Cimo

Pali 2 Imilandu 34:33 patila: “Yoshia afumishe ifya muselu fyonse mu fyalo fyonse ifyakwete abana ba kwa Israele, no kulenga bonse abasangilwe muli Israele ukubomba, ukubombela Yehova Lesa wabo.” Cinshi calengele Yoshia acite co? Ilyo basangile ibuuku umwalembelwe Ifunde lya kwa Yehova, kalemba Shafani atwele ili buuku ku Mfumu Yoshia, na Yoshia amwebele ukumubelengela. Ifyo Yoshia aumfwile fyalimufikile sana pa mutima ica kuti abombeshe ukutwala pa ntanshi ukupepa kwa cine ubumi bwakwe bonse.

Ukubelenga Icebo ca kwa Lesa no kutontonkanyapo kuti kwatunonsha sana. Ukwabula no kutwishika, ukutontonkanya pa lyashi lya shamfumu isha mu lupwa lwa kwa Davidi kulatukoselesha ukupashanya abacetekele Yehova no kutaluka imisango ya balya abashacetekele Yehova! Ibuuku lya bubili ilya Imilandu litucincisha ukupepa Lesa wa cine eka fye no kutwalilila aba cishinka kuli ena. Ubukombe bwabamo cine cine bwa mweo kabili bwa maka.—AbaHebere 4:12.

[Amafutunoti]

[Icikope pe bula 18]

Bushe mwalishiba ico ing’ombe sha mukuba shalingiile ukutekapo icishiba caengwa?

[Ifikope pe bula 21]

Nangu ca kuti takwete aba kumwafwa sana ilyo ali umwaice, Yoshia aishileba uwa cishinka kuli Yehova ilyo akulile