Shunemu Aishibikilwe ku Kutemwa no Lukaakala

KU KAPINDA ka ku kulyo aka Galili, kabili lwa ku kabanga ku mpela ya mupokapoka wa Yesreele, kwali umusumba wa Shunemu. Uyu musumba unono walolenkene no bulwi bubili ubwalumbuka nga nshi mu lyashi lya kale ilya Baibolo, lelo na kabili waishibikwe ngo kwafyalilwe abanakashi babili abalangile ukutemwa kwa bucishinka.

Akapili akatunganishiwa ukuba More kali ku numa ya Shunemu, kwi shilya lya mupokapoka mupepi na makilomita 8 ukutalukako kwali Ulupili lwa Gilboa. Pa kati ka shilya mpili shibili, pali impanga iya menshi, kabili iyafunda—ni imo iya ncende ishifumyo bulimi nga nshi mu Israele.

Iyi mpanga iyafumba iya Shunemu, ipayanya icifulo calinga ica lyashi limo ilishaiwamina ilya citemwiko ilyatalile alishimikwapo—Ulwimbo lwa Nyimbo. Ulu lwimbo lushimika pa mukashana uwayemba umwina Shunemu uwasalilepo ukuupwa ku munankwe kacema ukucilo kusumino kubo musano wa Mfumu Solomone. Solomone abomfeshe amano ne fyuma fyakwe fyonse, pa kuti ongole umukashana. Amulumbenye mu kubwekeshabwekeshapo, ati: “Nani uyu alelengela nga macaca, uwayemba ngo mweshi, uwalengama nga kasuba?” Kabili alaile ukuti akatentemba wene no tupe tonse utwauma umutengo uto engelenganya.—Ulwimbo lwa Nyimbo 1:11; 6:10.

Pa kuti umukashana asondeko ubumi bwa kwi sano, Solomone na bakapyunga bakwe baendele pamo nankwe ku Yerusalemu, ninshi nabashindikwa ku mpalume shakwe ishashintililwapo 60. (Ulwimbo lwa Nyimbo 3:6-11) Amutekele mu ng’anda yakwe, ing’anda iyali iyapuulama ica kuti imfumu yanakashi iya ku Sheba lintu yaimwene, “tamwali kabili muli yene amano.”—1 Ishamfumu 10:4, 5.

Lelo umukashana wa ku Shunemu ali uwa bucishinka ku mulumendo kacema. Atile: “Ngo muapele mu miti ya mu mutengo, e fyabo watemwikwa wandi.” (Ulwimbo lwa Nyimbo 2:3) Lekeni Solomone asaamwe na mabala yakwe ikana limo aya myangashi. Ibala limo ilya myangashi—pamo no mutemwikwa wakwe—fyalimulingile. Ukutemwa kwakwe takwatelentenshiwe.—Ulwimbo lwa Nyimbo 8:11, 12.

Na umbi umwanakashi uwayemba aikele mu Shunemu. Pa lwa mimonekele yakwe tatwaishibapo nangu cimo, lelo mu kushininkisha aali uwayemba umutima. Baibolo isosa ukuti ‘alisakamene’—nelyo ukupilikita—mu kupayanishisha kasesema Elisha ifilyo fya lyonse no mwa kusendama.—2 Ishamfumu 4:8-13.

Kuti twaelenganya fintu Elisha pa numa ya lwendo ulutali kabili ulwa kunasha aletasha lintu abwela ku muputule unono uwa pa muulu untu umwanakashi no mulume wakwe bamupekanishishe. Nalimo aletandalile ng’anda yabo libili libili, pantu ubutumikishi bwakwe bwatantalile pa myaka 60. Mulandu nshi uyu mwanakashi umwina Shunemu apampamine pa kuteeka Elisha pa mwabo lyonse ilyo alepita ilya nshila? Pantu alikatamike umulimo wa kwa Elisha. Uyu kasesema uwaicefya, kabili uwabula bukaitemwe, abombele nga kampingu wa luko, mu kucinkula ishamfumu, bashimapepo, na bapabi ku cishingamo cabo ica kubombela Yehova.

Ukwabulo kutwishika, umwanakashi umwina Shunemu aali umo uwa abo Yesu aibukishe lintu atile: “Uusekelela kasesema pantu ni kasesema akapokelele cilambu ca kwa kasesema.” (Mateo 10:41) Yehova apeele icilambu icaibela kuli uyu mwanakashi uwaletiina Lesa. Nelyo ali ni ng’umba pa myaka iingi, aishilefyala umwana umwaume. Na kabili Lesa alimwafwile mu myaka yakonkelepo lintu icipowe ica myaka 7 caponene mu calo. Ili lyashi lya kucincimusha litwibukisho kuti Lesa Shifwe uwa mu muulu takalabe icikuuku tulanga ku babomfi bakwe.—2 Ishamfumu 4:13-37; 8:1-6; AbaHebere 6:10.

Imbuli Shibili Isha Kapeleko

Nangu cingati Shunemu ebukishiwa ngo kwaikele aba banakashi babili aba bucishinka, na kabili alolenkene ne mbuli shibili ishayalwile ilyashi lya kale ilya bena Israele. Mupepi pali icifulo icalinga ukulwilapo—ilungu ilyali pa kati ka mpili sha More na Gilboa. Lyonse bamushika ba bulwi abalembwa mu Baibolo balecite nkambi shabo mu fifulo ifyakwata amenshi, ifyalundumana ifingabacingilila, kabili nga cingacitika, baleikala pa cifulo icasansama no kulamwena umupokapoka uwauma lwa mwi samba icalebasuminisha ukuba ne ncende yafunguluka ku kwensha ifita, bakabalwe, na maceleta. Shunemu na Gilboa fyali fifulo ifisuma ifya musango yo.

Mu nshita sha bapingushi, umulalo umwali 135,000 abena Midiani, abena Amaleke, na bambipo bacitile nkambi pa ntanshi ya More. Ingamali shabo shali “ngo musensenga wa pa lulamba lwa bemba ku bwingi.” (Abapingushi 7:12) Uwali no kulolenkana na bo kwi shilya lya mupokapoka, mupepi ne cishima ca Harode mwi samba lya Lupili lwa Gilboa, ni Kapingula Gideone uwali ne fita fya bena Israele 32,000 epela.

Mu nshiku ilyo takulati kube ubulwi, ulubali lumo lwaleesha ukunenuna ulunankwe. Cinkupiti uwa fita ifyalewelesha, ingamali sha bulwi, amaceleta, kabili na bakabalwe kuti fyaleta umwenso ku bashilika ba pa makasa. Ukwabulo kutwishika, abena Midiani abaiteyenye kale ilyo abena Israele balelonganikwa—bashininkishe ukuba ica kutiinya. Lintu Gideone atile, “Uuletiina kabili uuletutuma nani?” (NW)—ifyakaniko fibili pali fitatu ifya milalo yakwe balifuminepo pa cifulo ca bulwi.—Abapingushi 7:1-3.

Pali nomba ifita ifya bena Israele 10,000 e fyatontele amenso ku fita ifilwani 135,000 ifyali kwi shilya lya mupokapoka, kabili mu kwangufyanya Yehova acefeshe impendwa ya fita fya bena Israele ku mpendwa ishaicepela iya 300. Ukukonka umwata uwa bena Israele, ili bumba linono lyalekanishiwe mu mpuka shitatu. Mu mfifi, balisalangene no kwiminina mu mbali shitatu ukushinguluke nkambi ya balwani. Lintu Gideone akambishe, aba mpendwa 300 batobawile imitondo iyafishile ifyenge fyabo, no kwimya ifyo fyenge, kabili babilikishe abati, “Ulupanga lwa kwa Yehova no lwa kwa Gideone!” Balishishe intandala shabo mu kukonkanya. Mu mfifi, cinkupiti uwatobenkana uwa fita atontonkenye ukuti impuka 300 e shalebasansa. Yehova alengele umuntu umo ukwalukila umunankwe, no “mulalo onse walishibwike, waweleshe no kufulumuka.”—Abapingushi 7:15-22; 8:10.

Ubulwi bwa bubili bwacitike mupepi na ku Shunemu mu nshita sha Mfumu Shauli. Baibolo ishimiko kuti “abaPelishiti balilongene, baishilecite nkambi na mu Shunemu: na o Shauli alongenye abena Israele bonse, na bo bacitile inkambi mu Gilboa,” nga fintu umulalo wa kwa Gideone wacitile mu myaka ya ku numa. Lelo Shauli, ukupusanako na Gideone, ali ne citetekelo icinono muli Yehova, wene asalilepo ukuya ku cipao ca mufwe ku En-dore. Ilyo amwene inkambi ya baPelishiti, “alitiinine, no mutima wakwe watutwime icibi.” Mu bulwi ubwaishilebako, abena Israele balifulumwike no kucimfiwa apakalamba. Shauli pamo na Yonatani balifwile.—1 Samwele 28:4-7; 31:1-6.

E fyo ilyashi lya kale pa lwa Shunemu lyaishibikilwe ku kutemwa pamo no lukaakala kabili icitetekelo muli Yehova no kushintilila pa fibanda. Muli uyu mupokapoka, abanakashi babili balangile umute wa kutemwa ne cileela, kabili intungulushi shibili isha bena Israele shalwile imbuli shibili isha kapeleko. Fyonse ifi ifya kumwenako fine, filangilila ubucindami bwa kushintilila pali Yehova, uushifilwa ukulambula abamubombela.

[Icikope pe bula 31]

Umushi wa muno nshiku uwa Sulamu wabela pa cibolya ca Shunemu, no lupili lwa More luli akatalamukila

[Abatusuminishe]

Pictorial Archive (Near Eastern History) Est.