Palameni Kuli Lesa

‘Akaleka Mukamusange’

1 IMILANDU 28:9

BUSHE Lesa mwali mwishiba? Ukwasuka ici cipusho takwa-anguka. Ukwishiba Lesa cipilibula ukwishiba bwino bwino ukufwaya kwakwe ne mibele yakwe. Ukwishiba Lesa muli iyi nshila kulatwafwa ukukwata bucibusa bwa pa mutima nankwe ne co cilakuma imikalile yesu yonse. Bushe kuti cacitika ukukwata bucibusa bwa musango uyu na Lesa? Finshi twingacita pa kutila tube cibusa wa kwa Lesa? Ifyasuko kuli ifi fipusho kuti fyasangwa mu mashiwi Imfumu Davidi yaebele umwana wa iko Solomone, ayasangwa pali 1 Imilandu 28:9.

Elenganyeni ifyo cali. Davidi ninshi nateka icalo ca Israele pa myaka mupepi na 40, kabili icalo cili mu mutende. Solomone, uuli no kupyana Davidi pa bufumu, acili mwaice sana. (1 Imilandu 29:1) Mashiwi nshi aya kulekelesha ayo Davidi aeba umwana wakwe?

Apo Davidi ali-imwena amapaalo yaba mukubombela Lesa, aeba umwana wakwe ati: “Solomone mwana wandi, ishiba Yehova Lesa wa kwa wiso.” Davidi afwile alelosha mu kuti Solomone alekabila ukwishiba ifingi ukucila pa kwishiba fye ukuti Lesa e ko aba. Kale kale Solomone apepa Yehova, Lesa wa kwa Davidi wishi. Ukufika pali ino nshita Amalembo ya ciHebere ayengi ninshi yalilembwa, kabili Solomone afwile alishiba ifyo aya Malembo ya mushilo yalanda pali Lesa. Uwasoma umo atile, ishiwi lya ciHebere ilyo bapilibula ukuti “ishiba” kuti lyalosha na kuli “bucibusa bwa pa mutima.” Ukwabula no kutwishika, Davidi alefwaya umwana wakwe ukuti abe cibusa wa pa mutima uwa kwa Lesa nga filya na o aba cibusa wa kwa Lesa.

Bucibusa bwa musango uyu na Lesa bufwile ukukuma sana imibele ya kwa Solomone ne mikalile yakwe yonse. Davidi aeba umwana wakwe ati: “[Ulebombela Lesa] no mutima onse no mweo wa nsansa.” Moneni ukuti cilya fye amweba ukuti afwile ukwishiba Lesa, akonkeshapo na mashiwi ya kuti e o alebombela. Kanshi ukwishiba bwino Lesa kulalenga abantu ukutendeka ukulamubombela. Lelo tatufwile ukuba aba mitima ibili nelyo aba bumbimunda pa kubombela Lesa. (Amalumbo 12:2; 119:113) Davidi akonkomeshe umwana wakwe ukuti aleitemenwa ukubombela Lesa no mutima onse.

Mulandu nshi Davidi aebela umwana wakwe ukuti alepepa Lesa no mutima wakwe onse no kutontonkanya kwakwe konse? Davidi alondolola ukuti: “Pantu Yehova alafwaya mu mitima yonse, kabili aleluka na matontonkanyo yonse.” Solomone talekabila ukubombela Lesa pa kutila fye asekeshe wishi, Davidi. Lesa afwaya abantu ababika imitima yabo pa kubombela fye ena e ka.

Bushe Solomone akaba cibusa wa kwa Yehova nga wishi? Cili kuli Solomone umwine. Davidi aeba umwana wakwe ati: “Nga wamufwaya, akaleka ukamusange; lelo nga wamusha, akakukaana umuyayaya.” Pa kuti alepepa Lesa no kuba cibusa wakwe uwa pa mutima, Solomone alekabila ukubikako sana amano ku kwishiba Yehova.a

Amashiwi Davidi aebele umwana wakwe yaletulanga ukuti Yehova afwaya ukuti twapalama kuli ena, twaba ifibusa fyakwe. Lelo pa kuti tukwate bucibusa bwa musango uyu na ena tulekabila “ukumufwaya,” ukusokota mu Malembo pa kuti tumwishibe bwino. Ukwishiba Lesa kufwile ukutulenga ukufwaya ukumubombela no mutima onse kabili ukwabula ukupatikishiwa. Ifi e fyo Yehova afwaya ukuti tulemupepa. Na kuba, alilinga ukupepwa muli iyi nshila.—Mateo 22:37.

[Futunoti]